משלי לא

מתוך ויקיטקסט, מאגר הטקסטים החופשי
(הופנה מהדף משלי ל"א)

תנ"ך > משלי > א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא


<< | ספר משליפרק ל"א |

הפרק במהדורה המוטעמת



לא א דִּ֭בְרֵי לְמוּאֵ֣ל מֶ֑לֶךְ
  מַ֝שָּׂ֗א אֲֽשֶׁר־יִסְּרַ֥תּוּ אִמּֽוֹ׃
ב מַה־בְּ֭רִי וּמַֽה־בַּר־בִּטְנִ֑י
  וּ֝מֶ֗ה בַּר־נְדָרָֽי׃
ג אַל־תִּתֵּ֣ן לַנָּשִׁ֣ים חֵילֶ֑ךָ
  וּ֝דְרָכֶ֗יךָ לַֽמְח֥וֹת מְלָכִֽין׃
ד אַ֤ל לַֽמְלָכִ֨ים ׀ לְֽמוֹאֵ֗ל
  אַ֣ל לַֽמְﬞלָכִ֣ים שְׁתוֹ־יָ֑יִן
    וּ֝לְרוֹזְנִ֗ים או אֵ֣י שֵׁכָֽר׃
ה פֶּן־יִ֭שְׁתֶּה וְיִשְׁכַּ֣ח מְחֻקָּ֑ק
  וִ֝ישַׁנֶּ֗ה דִּ֣ין כׇּל־בְּנֵי־עֹֽנִי׃
ו תְּנוּ־שֵׁכָ֥ר לְאוֹבֵ֑ד
  וְ֝יַ֗יִן לְמָ֣רֵי נָֽפֶשׁ׃
ז יִ֭שְׁתֶּה וְיִשְׁכַּ֣ח רִישׁ֑וֹ
  וַ֝עֲמָל֗וֹ לֹ֣א יִזְכׇּר־עֽוֹד׃

ח פְּתַח־פִּ֥יךָ לְאִלֵּ֑ם
  אֶל־דִּ֗֝ין כׇּל־בְּנֵ֥י חֲלֽוֹף׃
ט פְּתַח־פִּ֥יךָ שְׁפׇט־צֶ֑דֶק
  וְ֝דִ֗ין עָנִ֥י וְאֶבְיֽוֹן׃

י אֵֽשֶׁת־חַ֭יִל מִ֣י יִמְצָ֑א
  וְרָחֹ֖ק מִפְּנִינִ֣ים מִכְרָֽהּ׃
יא בָּ֣טַח בָּ֭הּ לֵ֣ב בַּעְלָ֑הּ
  וְ֝שָׁלָ֗ל לֹ֣א יֶחְסָֽר׃
יב גְּמָלַ֣תְהוּ ט֣וֹב וְלֹא־רָ֑ע
  כֹּ֗֝ל יְמֵ֣י חַיֶּֽיהָ׃
יג דָּ֭רְשָׁה צֶ֣מֶר וּפִשְׁתִּ֑ים
  וַ֝תַּ֗עַשׂ בְּחֵ֣פֶץ כַּפֶּֽיהָ׃
יד הָ֭יְתָה כׇּאֳנִיּ֣וֹת סוֹחֵ֑ר
  מִ֝מֶּרְחָ֗ק תָּבִ֥יא לַחְמָֽהּ׃
טו וַתָּ֤קׇם ׀ בְּע֬וֹד לַ֗יְלָה
  וַתִּתֵּ֣ן טֶ֣רֶף לְבֵיתָ֑הּ
  וְ֝חֹ֗ק לְנַעֲרֹתֶֽיהָ׃
טז זָמְﬞמָ֣ה שָׂ֭דֶה וַתִּקָּחֵ֑הוּ
  מִפְּרִ֥י כַ֝פֶּ֗יהָ נטע נָ֣טְעָה כָּֽרֶם׃
יז חָֽגְרָ֣ה בְע֣וֹז מׇתְנֶ֑יהָ
  וַ֝תְּאַמֵּ֗ץ זְרוֹעֹתֶֽיהָ׃
יח טָ֭עֲמָה כִּי־ט֣וֹב סַחְרָ֑הּ
  לֹא־יִכְבֶּ֖ה בליל בַלַּ֣יְלָה נֵרָֽהּ׃
יט יָ֭דֶיהָ שִׁלְּחָ֣ה בַכִּישׁ֑וֹר
  וְ֝כַפֶּ֗יהָ תָּ֣מְכוּ פָֽלֶךְ׃
כ כַּ֭פָּהּ פָּֽרְשָׂ֣ה לֶעָנִ֑י
  וְ֝יָדֶ֗יהָ שִׁלְּחָ֥ה לָאֶבְיֽוֹן׃
כא לֹא־תִירָ֣א לְבֵיתָ֣הּ מִשָּׁ֑לֶג
  כִּ֥י כׇל־בֵּ֝יתָ֗הּ לָבֻ֥שׁ שָׁנִֽים׃
כב מַרְבַדִּ֥ים עָֽשְׂתָה־לָּ֑הּ
  שֵׁ֖שׁ וְאַרְגָּמָ֣ן לְבוּשָֽׁהּ׃
כג נוֹדָ֣ע בַּשְּׁעָרִ֣ים בַּעְלָ֑הּ
  בְּ֝שִׁבְתּ֗וֹ עִם־זִקְנֵי־אָֽרֶץ׃
כד סָדִ֣ין עָ֭שְׂתָה וַתִּמְכֹּ֑ר
  וַ֝חֲג֗וֹר נָתְנָ֥ה לַֽכְּנַעֲנִֽי׃
כה עֹז־וְהָדָ֥ר לְבוּשָׁ֑הּ
  וַ֝תִּשְׂחַ֗ק לְי֣וֹם אַחֲרֽוֹן׃
כו פִּ֭יהָ פָּתְחָ֣ה בְחׇכְמָ֑ה
  וְת֥וֹרַת חֶ֝֗סֶד עַל־לְשׁוֹנָֽהּ׃
כז צ֭וֹפִיָּה הילכות הֲלִיכ֣וֹת בֵּיתָ֑הּ
  וְלֶ֥חֶם עַ֝צְל֗וּת לֹ֣א תֹאכֵֽל׃
כח קָ֣מוּ בָ֭נֶיהָ וַֽיְאַשְּׁר֑וּהָ
  בַּ֝עְלָ֗הּ וַֽיְהַלְﬞלָֽהּ׃
כט רַבּ֣וֹת בָּ֭נוֹת עָ֣שׂוּ חָ֑יִל
  וְ֝אַ֗תְּ עָלִ֥ית עַל־כֻּלָּֽנָה׃
ל שֶׁ֣קֶר הַ֭חֵן וְהֶ֣בֶל הַיֹּ֑פִי
  אִשָּׁ֥ה יִרְאַת־יְ֝הֹוָ֗ה הִ֣יא תִתְהַלָּֽל׃
לא תְּנוּ־לָ֭הּ מִפְּרִ֣י יָדֶ֑יהָ
  וִיהַלְﬞל֖וּהָ בַשְּׁעָרִ֣ים מַֽעֲשֶֽׂיהָ׃

מהדורות נוספות

לחץ למטה על [הראה] להצגת התוכן      


הנוסח בכל מהדורות המקרא בוויקיטקסט הוא על על פי כתב יד לנינגרד (על בסיס מהדורת וסטמינסטר), חוץ ממהדורת הטעמים, שהיא לפי מקרא על פי המסורה.

לפרטים מלאים ראו ויקיטקסט:מקרא.

פסוקי הפרק

א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • 

טקסטים נוספים העוסקים בפרק

פירושים ומאמרים על הפרק:


קישורים חיצוניים