יונה ב/כתיב
< יונה ב
יונה פרק ב: דף הפרק • כתיב (אותיות בלבד) • מנוקד • מנוקד בשורות • עם טעמי המקרא • רכיבים לשוניים • עם ביאור • מהדורה מעומדת
א וימן יהוה דג גדול לבלע את יונה ויהי יונה במעי הדג שלשה ימים ושלשה לילות ב ויתפלל יונה אל יהוה אלהיו ממעי הדגה ג ויאמר קראתי מצרה לי אל יהוה ויענני מבטן שאול שועתי שמעת קולי ד ותשליכני מצולה בלבב ימים ונהר יסבבני כל משבריך וגליך עלי עברו ה ואני אמרתי נגרשתי מנגד עיניך אך אוסיף להביט אל היכל קדשך ו אפפוני מים עד נפש תהום יסבבני סוף חבוש לראשי ז לקצבי הרים ירדתי הארץ ברחיה בעדי לעולם ותעל משחת חיי יהוה אלהי ח בהתעטף עלי נפשי את יהוה זכרתי ותבוא אליך תפלתי אל היכל קדשך ט משמרים הבלי שוא חסדם יעזבו י ואני בקול תודה אזבחה לך אשר נדרתי אשלמה ישועתה ליהוה יא ויאמר יהוה לדג ויקא את יונה אל היבשה