ספר היובלים/רובין מנוקד/יא

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק יא

א

וּבַיּוֹבֵל הַחֲמִשָׁה וּשְׁלֹשִׁים בַּשָּׁבוּעַ הַשְּׁלִישִׁי בַּשָּׁנָה הָרִאשׁוֹנָה ב֑וֹ, לָקַח רְעוּ אִשָׁה וּשְׁמָהּ עָרָה בַת בֶּן־כָּֽשֶׂד:

ב

וַתֵּלֶד־לוֹ בֵן וַיִּקְרָא אֶת־שְׁמוֹ שְׂר֑וּג, בַּשָּׁנָה הַשְּׁבִיעִית לַשָּׁבֻעַ הַהוּא וּלַיּוֹבֵל הַהֽוּא:

ג

וּבְנֵי־נֹחַ הֵחֵלּוּ לְהִלָּחֵם אִישׁ בְּאָחִ֑יו, לִשְׁבוֹת שֶׁבִי וּלְהָמִית וְלִשְׁפּוֹךְ דָּם־אָדָם עַל־הָאָרֶץ וְלֶאֱכֹל דָּֽם:

ד

וְלִבְנוֹת עָרִים בְּצוּרוֹת וְחוֹמוֹת וּמִגְדָלִ֑ים, וַאֲנָשִׁים מֵהֶם הוֹאִילוּ לְהִתְנַשֵּׂא עַל־הָעָם וְלִיסוֹד מַמְלָכוֹת בְּרֵאשִׁיתָֽם:

ה

וְלַעֲשׂוֹת מִלְחָמָה וּלְסַכְסֵךְ עָם בְּעָם וְגוֹיִם בְּגוֹיִם וְעִיר בְּעִיר וּלְהָרַע אֶת־־כֹּ֑ל, וְלַעֲשׂוֹת לָהֶם חֶרֶב וַחֲנִית וּלְלַמֵּד אֶת־־בְּנֵיהֶם קָֽשֶׁת:

ו

וַיָּחֵלּוּ לִלְכֹּד עָרִים וְלִמְכֹּר עֲבָדִים וּשְׁפָחֽוֹת:

ז

וְאוּר בֶּן־כֶּשֶׂד בָּנָה אֶת־־הָעִיר אוּר כַּשְׂדִ֑ים, וַיִּקְרָא לָהּ בִּשְׁמוֹ וּבְשֵׁם אָבִיו:

ח

וַיַּעַשׂ לָהֶם כּוֹכָבִ֑ים, וַיִּשְׁתַּחוּ לְכָל־אֱלֹהֵי מַסֵּכָה אֲשֶׁר עָשָׂה־לֽוֹ:

ט

וַיָּחֵלּוּ לַעֲשׂוֹת פְּסִילִים וּמַצֵּבוֹת וְכָל־תּוֹעֵבָ֑ה, וְהָרוּחוֹת הַטְּמֵאוֹת עָזְרוּ לָהֶם וַיַּתְעוּם לֶאֱשׁוֹם אָשָׁם וּלְהִטַּמָֽא:

י

וְהַשָׂר מַשְׂטֵמָה הִתְאַמֵּץ לַעֲשׂוֹת אֶת־כָּל־זֹ֑את, וְיִפְעֹל עֲלִילוֹת רֶשַׁע וַחֲטָאִים וְכָל־־פֶּשַׁע עַל־־יְדֵי הָרוּחוֹת אֲשֶׁר תַּחַת מֶמְשַׁלְתּוֹ לְהַשְׁחִית וּלְהַאֲבִיד וְלִשְׁפֹּךְ דָּם עַל־־הָאָֽרֶץ:

יא

לָכֵן קָרָא שְׁמוֹ שְׂר֑וּג, כִּי שָׂרַךְ דַּרְכּוֹ לַעֲשׂוֹת רַק חֵטְא וָפָֽשַׁע:

יב

וַיִּגְדַל וַיֵּשֶׁב בְּאוּר כַּשְׂדִים עַל־פְּנֵי אֲבוֹת [אִמ֑וֹ], וַיִּשְׁתַּחוּ לָאֱלִילִֽים:

יג

וַיִּקַּח־לוֹ אִשָׁה בַּיּוֹבֵל הַשִּׁשָּׁה וּשְׁלֹשִׁים בַּשָּׁבוּעַ הַחֲמִישִׁי בַּשָּׁנָה הָרִאשׁוֹנָ֑ה, וּשְׁמָהּ מִלְכָּה בַּת חֶבֶר בַּת [אֲחוֹת] אָבִֽיו:

יד

וַתֵּלֶד־לוֹ אֶת־נָחוֹר בְּשָׁנָה הָרִאשׁוֹנָה לַשָּׁבֻעַ הַה֑וּא, וַיִּגְדַל וַיֵּשֶׁב בְּאוּר, בְּאוּר כַּשְׂדִֽים:

טו

וְאָבִיו חָכָם הַכַּשְׂדִים לִמֵּד אוֹתוֹ לְנַבְּאוֹת וּלְהַטִּיף עֲתִידוֹת עַל־פִּי אוֹתוֹת הַשָּׁמַֽיִם:

טז

וּבַיּוֹבֵל הַשִּׁבְעָה וּשְׁלֹשִׁים בַּשָּׁבוּעַ הַשִּׁשִּׁי בְּשָׁנָה הָרִאשׁוֹנָה לָקַח־לוֹ אִשָּׁה וּשְׁמָהּ יִסְכָּה בַת נֶסְתֶּג מִן הַכַּשְׂדִים וַתֵּלֶד־־לוֹ בֵן אֶת־־תֶּרַח בַּשָּׁנָה הַשְּׁבִיעִית לַשָּׁבֻעַ הַהֽוּא:

יז

וְיִשְׁלַח הַשָּׂר מַשְׂטֵמָה עוֹרְבִים וְצִפֳּרִים לֶאֱכוֹל אֶת־הַזֶּרַע אֲשֶׁר נִזְרַע עַל־הָאֲדָמָ֑ה, לְמַעַן שַׁחֵת אֶת־הָאָרֶץ לַחֲמוֹס מִבְּנֵי־הָאָדָם אֶת־תְּבוּאוֹתֵיהֶֽם:

יח

כִּי בְּטֶרֶם יַעֲמִיקוּ אֶת־הַזֶּרַע בַּמַּחֲרֵשָׁ֑ה, לָקְטוּ אוֹתוֹ הָעוֹרְבִים מֵעַל־פְּנֵי הָאֲדָמָֽה:

יט

לָכֵן קָרָא שְׁמוֹ תֶּרַח כִּי הִתְחָרוּ בָּהֶם הָעוֹרְבִים וְהַצִּפֳּרִ֑ים, וַיֹּאכְלוּ אָכוֹל אֶת־זַרְעָם:

כ

וַתְּחִלֶּנָה שְׁנֵי הָרָעָב מִפְּנֵי הַצִּפֲּרִ֑ים, וְאֵת כָּל־פְּרִי הָעֵץ אָכְלוּ מֵעַל הָעֵצִים [...]:

כא

וְאַךְ בְּעָמָל גָּדוֹל יָכְלוּ בִּימֵיהֶם לְהַצִּיל שָׂרִיד מִכָּל־פְּרִי הָאֲדָמָֽה:

כב

וּבַיּוֹבֵל הַתִּשְׁעָה וּשְׁלֹשִׁים בַּשָּׁבוּעַ הַשֵּׁנִי בַּשָּׁנָה הָרִאשׁוֹנָ֑ה, לָקַח־לוֹ תֶּרַח אִשָּׁה וּשְׁמָהּ עֶדְנָה בַת אֲרָם בַּת אֲחוֹת אָבִיו לוֹ לְאִשָּֽׁה:

כג

וּבַשָּׁנָה הַשְּׁבִיעִית לַשָּׁבֻעַ הַהוּא יָלְדָה בֵּ֑ן, וַיִּקְרָא אֶת־שְׁמוֹ אַבְרָם כְּשֵׁם אֲבִי אִמּוֹ כִּי־מֵת בְּטֶרֶם יְחֻבַּל בְּנָהּ וּבְנֽוֹ:

כד

וַתִּפָּקַחְנָה עֵינֵי הַנַּעַר לִרְאוֹת בְּפֶשַׁע הָאָ֑רֶץ, כִּי נִתְעוּ בַשָּׁוְא עַל־יְדֵי הַפְּסִילִים וְהַתּוֹעֵבָֽה:

כה

וַיּוֹרֵהוּ אָבִיו לִכְתּ֑וֹב, וּבִהְיוֹתוֹ בֶּן־שְׁבוּעַיִם הִתְפָּרֵד מֵאֵת אָבִיו לְבִלְתִּי הִשְׁתַּחֲוֹת כָּמוֹהוּ לֶאֱלִילִֽים:

כו

וַיּוֹאֵל לְהִתְפַּלֵּל אֶל־הַבּוֹרֵא כָּל־הַיְּק֑וּם, לְהַצִּילֵהוּ מִשְּׁגִיאַת בְּנֵי־־הָאָדָם וּלְבַל יִפּוֹל חֶבְלוֹ בְּפֶשַׁע וְרֶשַׁע אַחֲרֵי הִתְהַלְּכוֹ בְּמֵישָׁרִֽים:

כז

וַיְּהִי בִּימֵי הַזֶּרַע לְהַזּוֹרֵעַ אֶת־הָאָ֑רֶץ, וַיֵּצְאוּ כֻּלָּם יַחְדָו לִשְׁמוֹר אֶת־זַרְעָם מִפְּנֵי הָעוֹרְבִֽים:

כח

וַיֵּצֵא אַבְרָם בֵּינֵיהֶם וְהוּא נַעַר בֶּן אַרְבַּע־עֶשְׂרֵה שָׁנָ֑ה, וַתָּבֹא עֲדַת עוֹרְבִים כֶּעָנָן לֶאֱכֹל אֵת הַזָּרַֽע:

כט

וַיָּרָץ אַבְרָם לִקְרָאתָם בְּטֶרֶם יֵרְדוּ עַל־־־הָאָ֑רֶץ, וַיִּגְעַר בָּהֶם בְּטֶרֶם יִפְשְׁטוּ עַל־־הָאָרֶץ לֶאֱכֹל אֶת־הַזָּרַע לֵאמֹֽר:

ל

אַל תֵּרְדוּ הֵנָה, שׁוּבוֹ אֶל־הַמָּקוֹם אֲשֶׁר בָּאתֶם מִשָּׁ֑ם; וַיָּשׁוּבֽוּ:

לא

וַיַּעֲשׂוּ כֵן בַּיּוֹם הַהוּא לְשִׁבְעָה חֶבְלֵי עוֹרְבִ֑ים, וּמִכָּל הָעוֹרְבִים לֹא יָרַד גַּם־אֶחָד עַל־חֶלְקַת הַשָּׂדֶה אֲשֶׁר הָיָה שָׁם אַבְרָֽם:

לב

וְכָל־הָעוֹמְדִים עִמּוֹ עַל־הַשָּׂדֶה הַהוּא רָאוּ כִּי גָּעַר לֵאמֹר הָעוֹרְבִים שׁוּב֑וּ, וַיִּגְדַל שְׁמוֹ בְּכָל־אֶרֶץ הַכַּשְׂדִּֽים:

לג

וַיָּבֹאוּ אֵלָיו בַּשָּׁנָה הַהִיא כָּל־זוֹרְעֵי זָ֑רַע, וַיֵּלֶךְ אִתָּם עַד־כְּלוֹת יְמֵי הַזָּרַֽע:

לד

וַיִּזְרְעוּ אֶת־־אַדְמָתָ֑ם, וַיֶּאֶסְפוּ בַּשָּׁנָה הַהִיא אֶת־־תְּבוּאָתָם וַיֹּאכְלוּ וַיִּשְׂבָּעֽוּ:

לה

וּבַשָּׁנָה הָרִאשׁוֹנָה לְשָׁבוּעַ הַחֲמִישִׁ֑י, לִמֵּד אַבְרָם אֶת־חֲרָשֵׁי הָעֵץ הָעוֹשִׂים אֵת כְּלֵי־הַבַּקָּֽר:

לו

וַיַּעֲשׂוּ כֶלֵי מִמַּעַל לָאָרֶץ לְעֻמַּת דָּרְבַן הַמַּחֲרֵשָׁ֑ה, לָשׂוּם עָלָיו אֶת מֶשֶׁךְ הַזֶּרַע וּלְהַפִּילָהוּ מִשָּׁם אֶל־־תּוֹךְ מַעֲנִית הַזֶּרַע לְהִסָּתֵר בָּאֲדָמָֽה:

לז

וְלֹא יָרְאוּ עוֹד מִפְּנֵי הָעוֹרְבִים וַיַּעֲשׂוּ כֵן בְּכָל־דָּרְבְּנוֹת הַמַּחֲרֵשׁוֹת מִמַּעַל לְהָאָֽרֶץ:

לח

וַיִּזְרְעוּ וַיַּעַבְדוּ אֵת כָּל־הָאָרֶץ כְּכֹל אֲשֶׁר צִוָּה אוֹתָם אַבְרָ֑ם, וְלֹא יָרְאוּ עוֹד מִפְּנֵי הָעוֹרְבִֽים: