ספר היובלים/רובין מנוקד/ב

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ב

א

וַיֹּאמֶר מַלְאַךְ הַפָּנִים אֶל מֹשֶׁה בִּדְבַר ה' לֵאמֹר:

ב

כְּתוֹב בְּסֵפֶר תּוֹלְדוֹת הַשָּׁמַיִם וְהָאָרֶץ כִּי־בְשֵׁשֶׁת יָמִים כִּלָּה ה' אֱלֹהִים אֶת־כָּל־מְלַאכְתּוֹ אֲשֶׁר בָּרָא לַעֲשׂוֹת וּבַיּוֹם הַשְּׁבִיעִי שָׁבַת וַיְּקַדְּשֵׁהוּ לְעוֹלְמֵי־עַד וַיְּשִׂימֵהוּ לְאוֹת עַל כָּל־מַעֲשָׂיו:

ג

הֵן בַּיּוֹם הָרִאשׁוֹן בָּרָא אֶת הַשָּׁמַיִם מִמַּעַל וְהָאָרֶץ וְהַמַּיִם וְכָל־הָרוּחוֹת הָעוֹמְדִים לְפָנָיו:

ד

וּמַלְאֲכֵי הַפָּנִים וּמַלְאֲכֵי הַקְּדוּשָׁה וּמַלְאֲכֵי רוּחַ הָאֵשׁ וּמַלְאֲכֵי רוּחַ סְעָרָה וּמַלְאֲכֵי רוּחוֹת עַנְנֵי עֲלָטָה:

ה

וּמַלְאֲכֵי הַבָּרָד וְהַכְּפוֹר וּמַלְאֲכֵי הָעֲמָקִים הָרְעָמִים וְהַבְּרָקִים, וּמַלְאֲכֵי רוּחוֹת הַקֹּר הַחֹם הַסְּתָיו הֶאָבִיב הַחֹרֶף וְהַקַּיִץ:

ו

וּמַלְאֲכֵי הָרוּחוֹת לְכָל־מַעֲשָׂיו בַּשָּׁמַיִם וּבָאָרֶץ וּבְכָל־הָעֲמָקִים, וּמַלְאֲכֵי הַחֹשֶׁךְ וְהָאוֹר וְהַשַּׁחַר וְהָעֶרֶב אֲשֶׁר הֵכִין בְּחָכְמַת תְּבוּנָתוֹ:

ז

וְאָז רָאִינוּ מַעֲשָׂיו וְנִבְרָכֵהוּ וּנְהַלְּלֵהוּ עַל־כָּל־מַעֲשָׂיו כִּי שֶׁבַע מְלָאכוֹת גְּדוֹלוֹת עָשָׂה בַּיּוֹם הָרִאשׁוֹן:

ח

וּבַיּוֹם הַשֵּׁנִי עָשָׂה אֶת־הָרָקִיעַ בֵּין הַמַּיִם וַיִּבָּדְּלוּ הַמַּיִם בַּיּוֹם הַהוּא חֶצְיָם עָלָה מֵעַל לָרָקִיעַ וְחֶצְיָם יָרַד מִתַּחַת לָרָקִיעַ אֲשֶׁר בַּתָּוֶךְ עַל פְּנֵי כָּל־הָאָרֶץ:

ט

וְזֹאת הַמְּלָאכָה הָאַחַת אֲשֶׁר עָשָׂה בַּיּוֹם הַשֵּׁנִי:

י

וּבַיּוֹם הַשְּׁלִישִׁי עָשָׂה בְּאָמְרוֹ, יִקָּווּ הַמַּיִם מֵעַל פְּנֵי כָּל־הָאָרֶץ אֶל־מָקוֹם אֶחָד וְתֵרָאֶה הַיַּבָּשָׁה:

יא

וַיַּעַשׂ לַמַּיִם כַּאֲשֶׁר אָמַר לָהֶם וִיקַוּוּ מֵעַל פְּנֵי הָאָרֶץ אֶל מָקוֹם אֶחָד מִחוּץ לָרָקִיעַ וְתִרְאֶה הַיַּבָּשָׁה:

יב

וּבַיּוֹם הַהוּא בָּרָא לַמַּיִם אֶת תְּהוֹמוֹת הַיַּמִּים לְמִקְּוֵה מֵימֵיהֶם, וְכָל־הַנְּהָרוֹת וּמְקוֹמוֹת מִקְוֵה הַמַּיִם בֶּהָרִים וּבְכָל־הָאֲדָמָה:

יג

וְכָל־הָאֲגַמִּים וְכָל טַל־הָאָרֶץ וְהַזֶּרַע אֲשֶׁר יִזָּרַע לְמִינֵהוּ וְכָל־מַאֲכָל אֲשֶׁר יֵאָכֵל וְהָעֵצִים עוֹשֵׂי־פְרִי וַעֲצֵי הַיַּעַר וְגַן־הָעֵדֶן לַתַּאֲוָה:

יָד

כָּל אַרְבַּע הַבְּרִיאוֹת הַגְּדוֹלוֹת הָאֵלֶּה בָּרָא בַּיּוֹם הַשְּׁלִישִׁי:

טו

וּבַיּוֹם הָרְבִיעִי בָּרָא אֶת־הַשֶּׁמֶשׁ וְאֶת־הַיָּרֵחַ וְאֶת־הַכּוֹכָבִים וַיִּתֵּן אוֹתָם בִּרְקִיעַ הַשָּׁמַיִם לְהָאִיר עַל־כָּל־הָאָרֶץ:

טז

וַיָּשֶׂם אוֹתָם לְמוֹשְׁלֵי הַיּוֹם וְהַלַּיְלָה וּלְהַבְדִּיל בֵּין אוֹר וּבֵין חֹשֶׁךְ:

יז

וַיַּעַשׂ אֱלֹהִים אֶת־הַשֶּׁמֶשׁ לְאוֹת גְּדוֹלָה עַל הָאָרֶץ לְיָמִים וּלְשַׁבָּתוֹת לְשָּׁנִים וְלְיוֹבְלִים וּלְכָל־תְּקוּפוֹת הַשָּׁנָה:

יח

וּלְהַבְדִּיל בֵּין אוֹר וּבֵין חֹשֶׁךְ וּלְמֶגֶד כָּל־דָּבָר אֲשֶׁר יִצְמַח וְיִפְרֶה עַל־הָאָרֶץ:

יט

אֶת שְׁלֹשֶׁת הַמִּינִים הָאֵלֶּה עָשָׂה בַּיּוֹם הָרְבִיעִי:

כ

וּבַיּוֹם הַחֲמִישִׁי בָּרָא אֶת־הַתַּנִּינִים הַגְּדוֹלִים בְּתוֹךְ תְּהוֹמוֹת הַמַּיִם כִּי הֵמָּה רֵאשִׁית יְצוּרֵי יָדָיו אֶת־כָּל־הַבָּשָׂר וְאֶת כָּל־הַשּׁוֹרֵץ בַּמַּיִם אֶת־הַדָּגִים וְאֶת כָּל אֲשֶׁר יְעוֹפֵף אֶת־כָּל־עוֹף כָּנָף לְמִינֵהוּ:

כא

וַיִּזְרַח לָהֶם הַשֶּׁמֶשׁ לְמַּרְפֵּא וּלְכָל אֲשֶׁר עַל־הָאָרֶץ לְכָל־הַצּוֹמֵחַ עַל הָאָרֶץ וּלְכָל עֵצִים עוֹשֵׂי־פְּרִי וּלְכָל הַבָּשָׂר:

כב

אֶת־כָּל־שְׁלֹשֶׁת הַמִּינִים הָאֵלֶּה עָשָׂה בַּיּוֹם הַחֲמִישִׁי:

כג

וּבַיּוֹם הַשִּׁשִּׁי עָשָׂה אֶת־כָּל־חַיּוֹת הָאָרֶץ, וְאֶת כָּל־הַבְּהֵמָה וְאֵת כָּל־רֶמֶשׂ הָאֲדָמָה:

כד

וְאַחַר כָּל־זֹאת עָשָׂה אֶת־הָאָדָם, זָכָר וּנְקֵבָה עָשָׂה אוֹתָם:

כה

וַיְּשִׂימֵהוּ לְרוֹדֶה בְּכָל אֲשֶׁר עַל־הָאָרֶץ וַאֲשֶׁר בַּיַּמִּים וּבְעוֹף הַשָּׁמַיִם וּבְחַיּוֹת הָאָרֶץ וּבַבְּהֵמָה וּבְכָל־הָרֶמֶשׂ הָרוֹמֵשׂ עַל־הָאָרֶץ וּבְכָל הָאֲדָמָה לְכָל־זֹאת עָשָׂה אוֹתוֹ לְאָדוֹן:

כו

וְאֶת אַרְבַּעַת הַמִּינִים הָאֵלֶּה עָשָׂה בַּיּוֹם הַשִּׁשִּׁי וְיִהְיוּ כֻּלָּם שָׁנִים וְעֶשְׂרִים מִינִים:

כז

וַיְּכַל אֶת כָּל־מְלַאכְתּוֹ בַּיּוֹם הַשִּׁשִּׁי אֶת־כָּל־אֲשֶׁר בַּשָּׁמַיִם וְעַל־הָאָרֶץ וּבַיַּמִּים וּבָעֲמָקִים אֶת אֲשֶׁר בָּאוֹר וּבַחֹשֶׁךְ וּבַכֹּל:

כח

וַיַּעַשׂ לָנוּ אוֹת גְּדוֹלָה אֶת־יוֹם הַשַּׁבָּת, כִּי שֵׁשֶׁת יָמִים נַעֲשֶׂה כָּל־מְלָאכָה וּבַיּוֹם הַשְּׁבִיעִי נִשְׁבֹּת מִכָּל־מְלָאכָה כָּל־מַלְאֲכֵי הַפָּנִים וְכָל־מַלְאָכִי הַקְּדוּשָׁה:

כט

אֵלֵינוּ אֶל־שְׁנֵי הַמִּינִים הַגְּדוֹלִים הָאֵלֶּה אָמַר אֶת־הַדָּבָר הַזֶּה כִּי נִשְׁמוֹר אֶת־יוֹם הַשַּׁבָּת אִתּוֹ בַּשָּׁמַיִם וּבָאָרֶץ:

ל

וַיֹּאמֶר אֵלֵינוּ הִנֵּה אָנֹּכִי מַפְלֶה לִי עַם מִקֶּרֶב הָעַמִּים, אֲשֶׁר יָחֹגּוּ אֶת־יוֹם הַשַּׁבָּת גַּם־הֵם:

לא

וְהִקְדַּשְׁתִּי אוֹתוֹ לִי לְעָם וּבֵרַכְתִּי אוֹתוֹ כַּאֲשֶׁר הִקְדַּשְׁתִּי אֶת־יְמֵי הַשַּׁבָּת וּבֵרַכְתִּי אוֹתָם כֵּן אֲבָרֵךְ אוֹתוֹ וְהָיוּ לִי לְעָם וְאָנֹכִי אֶהְיֶה לָהֶם לֵאלֹהִים:

לב

וָאֶבְחַר בְּזֶרַע יַעֲקֹב מִכָּל אֲשֶׁר רָאִיתִי וָאֶכְתֹּב אוֹתוֹ לִי לִבְנֵי בְכוֹרִי וָאַקְדִּישׁ אוֹתוֹ לִי לְעוֹלָם וָעֶד:

לג

וַאֲלַמְּדֵם אֶת־יוֹם הַשַּׁבָּת לְמַעַן יִשְׁבְּתוּ בוֹ מִכָּל־עֲבוֹדָתָם:

לד

וַיָּשֶׂם בּוֹ אוֹת כִּי יָחֹגּוּ גַּם הֵמָה עִמָּנוּ אֶת־הַשַּׁבָּת בַּיּוֹם הַשְּׁבִיעִי לֶאֱכוֹל וְלִשְׁתּוֹת וּלְבָרֵךְ אֶת אֲשֶׁר בָּרָא אֶת־הַכֹּל:

לה

כַּאֲשֶׁר בֵּרַךְ גַּם־הוּא אוֹתוֹ וַיְּקַדְּשֵׁהוּ לוֹ לְעָם, לַעֲמֹד בְּרֹאשׁ כָּל־הָעַמִּים וְלָחוֹג אִתָּנוּ יַחְדָיו אֶת־יוֹם הַשַּׁבָּת:

לו

וַיַּעַשׂ כִּי יַעֲלוּ פִּקוּדָיו לְפָנָיו לְרֵיחַ נִיחוֹחַ, לְרָצוֹן לְפָנָיו כָּל־יְמֵי שְׁנַיִם וְעֶשְׂרִים רָאשֵׁי בְּנֵי הָאָדָם עַד יַעֲקֹב:

לז

וּשְׁנַיִם וְעֶשְׂרִים מִינֵי מְלָאכוֹת נַעֲשׂוּ עַד הַיּוֹם הַשְּׁבִיעִי הַזֶּה:

לח

הַיּוֹם הַזֶּה מְבֹרָךְ וּמְקֻדָּשׁ, וְגַם הָאִישׁ הַהוּא מְבֹרָךְ וּמְקֻדָּשׁ:

לט

וּשְׁנֵיהֶם גַּם יָחַד, לִקְדוּשָׁה וְלִבְרָכָה.

מ

וְיַעֲקֹב וְזַרְעוֹ הָיֹה יִהְיוּ תָּמִיד בְּרוּכֵי קְדוֹשֵׁי הָעֵדוּת וְהַתּוֹרָה, כַּאֲשֶׁר קִדֵּשׁ וּבֵרֵךְ לְפָנִים אֶת־יוֹם הַשַּׁבָּת בְּיוֹם הַשְּׁבִיעִי:

מא

וַיִּבְרָא אֶת־הַשָּׁמַיִם וְאֶת־הָאָרֶץ וְאֶת כָּל הַנִּבְרָא בְּשֵׁשֶׁת יָמִים וַיּוֹעֶד ה' חַג קָדוֹשׁ לְכָל־בְּרוּאָיו:

מב

עַל־כֵּן צִוָּה עָלָיו אֶת־כָּל־בְּרוּאָיו, כִּי יָמוּתוּ כָּל־מְחַלְּלוֹ מוֹת יָמוֹת

מג

וְאַתָּה צַו אֶת־בְּנֵי יִשְׂרָאֵל כִּי יִשְׁמְרוּ אֶת הַיּוֹם הַזֶּה לְקַדְּשׁוֹ לְבִלְתִּי עֲשׂוֹת בּוֹ כָּל־מְלָאכָה וְלֹא יְחַלְּלוּהוּ:

מד

כִּי קָדוֹשׁ הוּא מִכָּל־הַיָּמִים וְכָל־מְטַמְּאוֹ מוֹת יוּמָת, וְכָל־הָעוֹשֶׂה בוֹ מְלָאכָה מוֹת יוּמָת לְעוֹלָם וָעֶד:

מה

לְמַעַן יִשְׁמְרוּ בְּנֵי יִשְׂרָאֵל אֶת הַיּוֹם הַזֶּה לְדוֹרוֹתֵיהֶם, וְלֹא־יִכָּרְתוּ מִן הָאָרֶץ:

מו

כִּי הוּא יוֹם קָדוֹשׁ וְיוֹם בָּרוּךְ, וְכָל־אִישׁ אֲשֶׁר יִשְׁמְרֵהוּ וְיִשְׁבֹּת בּוֹ מִכָּל־עֲבוֹדָתוֹ יִהְיֶה קָדוֹשׁ וּבָרוּךְ לְעוֹלָם כָּמוֹנוּ:

מז

וְאַתָּה הוֹדַע וּבָאֵר לִבְנֵי־יִשְׂרָאֵל אֶת מִשְׁפַּט הַיּוֹם הַזֶּה, כִּי יִשְׁבְּתוּ בּוֹ וְלֹא יִזְנְחוּ אוֹתוֹ בִּשְׁרִירוּת לִבָּם:

מח

לְבַל יַעֲשׂוּ בוֹ דָבָר מִכָּל־צָרְכֵיהֶם, וְלֹא יַעֲשׂוּ בוֹ כָּל־מַאֲכָל אֲשֶׁר יֵאָכֵל וְכָל־מַשְּׁקֶה אֲשֶׁר יִשָּׁתֶה:

מט

וְלֹא יִשְׁאֲבוּ מַיִם וְלֹא־יִשְּׂאוּ בוֹ מַשָּׂא לְהוֹצִיא וּלְהָבִיא בְּשַׁעֲרֵיהֶם, אִם־לֹא הֵכִינוּ לָהֶם דָּבָר בְּשֵׁשֶׁת הַיָּמִים בְּמוֹשְׁבוֹתֵיהֶם:

נ

וְדָבָר לֹא־יוֹצִיאוּ וְיָבִיאוּ בַּיּוֹם הַזֶּה מִבַּיִת לְבָיִת, כִּי הוּא קָדוֹשׁ וּמְבֹרָךְ מִכָּל יְמֵי הַיּוֹבֵל בִּשְׁנוֹת הַיּוֹבֵל:

נָא

בּוֹ שָׁבַתְנוּ בְּטֶרֶם יִגָּלֶּה אֹזֶן אֱנוֹשׁ לִשְׁבּוֹת בּוֹ עַל־הָאָרֶץ:

נב

וּבוֹרֵא כָּל־הַיְּקוּם בֵּרַךְ אוֹתוֹ, אָכֵן לֹא קִדֵּשׁ כָּל־מְתֵי־חֶלֶד וְכָל־הָעַמִּים לִשְׁבּוֹת בּוֹ כִּי־אִם אֶת־יִשְׂרָאֵל לְבַדּוֹ:

נג

לוֹ לְבַדּוֹ נָתַן אֶת יוֹם־הַשַּׁבָּת לֶאֱכֹל וְלִשְׁתּוֹת וְלִשְׁבּוֹת בּוֹ עַל־הָאָרֶץ:

נד

וַיְּבָרֶךְ אוֹתוֹ בּוֹרֵא כָּל־הַיְּקוּם, אֲשֶׁר בָּרָא אֶת־הַיּוֹם הַזֶּה לִבְרָכָה וְלַקְּדֻשָּׁה וְלִתְהִלָּה עַל־כָּל־הַיָּמִים:

נה

זֹאת הַתּוֹרָה וְהָעֵדוּת מוֹרָשָׁה לִבְנֵי יִשְׂרָאֵל חֻקַּת־עוֹלָם לְדוֹרוֹתֵיהֶם: