ספר היובלים/רובין מנוקד/יב

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק יב

א

וַיְּהִי בַּשָּׁבֻעַ הַשִּׁשִּׁי בַּשָּׁנָה הַשְּׁבִיעִית בּ֑וֹ, וַיֹּאמֶר אַבְרָם אֶל־־תֶּרַח אָבִיו וַיֹּאמֶר אָבִי וַיֹּאמֶר הִנֶּנִּי בְנִֽי:

ב

וַיֹּאמֶר מַה־בֶּצַע וּמַה־נוֹעִיל מִכָּל־הָאֱלִילִים [...] אֲשֶׁר תִּשְׁתַּחֲוֶה לָהֶ֑ם? הַלֹא אֵין רוּחַ בְּקִרְבָּם, כִּי אִם קִלְלַת אֱלֹהִים וְתַעְתֻּעֵי־־לֵב הֵם אֲשֶׁר אַתֶּם עוֹבְדִֽים:

ג

עִבְדוּ אֵת אֱלֹהֵי הַשָּׁמַיִם הַנּוֹתֵן גֶּשֶׁם וְהַמּוֹרִיד טַל עַל־הָאֲדָמָ֑ה, וְהָעוֹשֶׂה כֹּל עַל־־הָאָרֶץ וּבָרָא אֶת־הַכֹּל בִּדְבָרוֹ וְנֶפֶשׁ כָּל־־חַי עַל־פָּנָֽיו:

ד

מַדּוּעַ תַּעַבְדוּ אֵת אֲשֶׁר אֵין־רוּחַ בְּקִרְבָּ֑ם, כִּי מַעֲשֵׂה יְדֵי חָרָשׁ הֵמָּה וְעַל כָּתֵף תִּשְּׂאוּ אוֹתָֽם:

ה

לֹא לְעֵזֶר וְלֹא לְהוֹעִיל כִּי לְבֹשֶׁת וּלְחֶרְפָּה הֵמָּה לְעוֹשֵׂיהֶם וּלְעוֹבְדֵיהֶם מַעֲשֵׂה תַּעְתֻעִ֑ים, אַל תַּעַבְדוּ אוֹתָֽם:

ו

וַיֹּאמֶר אֵלָיו אָבִיו יָדַעְתִּי בְּנִי יָדַעְתִּי גַם אֲנִ֑י, אֲבָל מָה אֶעֱשֶׂה לְמִשְׁפַּחְתִּי כִּי תִתְּנֵנִי לַעֲבֹד אוֹתָֽם:

ז

אִם אֲגַלֶּה לָהֶם הָאֱמֶת וַהֲרָגוּנֵי כִּי נַפְשָׁם דָּבְקָה־בָּם לְעָבְדָם וּלְבָרְכָ֑ם, הַחֲשֵׁה בְּנִי פֶּן יְמִיתֽוּךְ:

ח

וַיַּגֵּד אֶת־־הַדְּבָרִים הָאֵלֶּה אֶל־שְׁנֵי אֶחָיו וַיִּחַר אַפָּם בּ֑וֹ, וַיִּדּֽוֹם:

ט

וּבַיּוֹבֵל הָאַרְבָּעִים בַּשָּׁבֻעַ הַשֵּׁנִי בַּשָּׁנָה הַשְּׁבִיעִית בּ֑וֹ, לָקַח אַבְרָם אִשָּׁה וּשְׁמָהּ שָׂרַי בַּת־אָבִיו וַתְּהִי־לוֹ לְאִשָּֽׁה:

י

הָרָן אָחִיו לָקַח־לוֹ (אִשָּׁה) בַּשָּׁנָה [...] לַשָּׁבוּעַ הַשְּׁלִישִׁי וַתֵּלֶד־לוֹ בֵן בַּשָּׁנָה הַשְּׁבִיעִית לַיּוֹבֵל הַה֑וּא וַיִּקְרָא אֶת־־שְׁמוֹ לֽוֹט:

יא

וְגַם נָחוֹר אָחִיו לָקַח־־לוֹ אִשָּֽׁה:

יב

וַיְּהִי בִשְׁנַת [הַשִּׁשִּׁים] לְחַיֵּי אַבְרָם הִיא הַשָּׁנָה הָרְבִיעִית לַשָּׁבוּעַ הָרְבִיעִ֑י, וַיָּקָם אַבְרָם לַיְלָה וַיִּשְׂרֹף אֶת־־בֵּית הָאֱלִילִים וְכֹל אֲשֶׁר־־בּוֹ וְלֹא נוֹדַע לְאִישׁ דָּבָֽר:

יג

וַיָּקוּמוּ בַּלַּיְלָה לְהַצִּיל אֶת הָאֱלִילִים מִמַּאֲכוֹלֶת הָאֵֽשׁ:

יד

וַיְּמַהֵר הָרָן וַיָּבֹא לְהַצִּילָם וַתְּלַהֵט בּוֹ הַלֶּהָבָה וַיִּשָׂרֵף בָּאֵ֑שׁ, וַיָּמָת בְּאוּר כַּשְׂדִים עַל־פְּנֵי תֶּרַח אָבִיו וַיִּקְבְּרוּ אֹתוֹ בְּאוּר כַּשְׂדִֽים:

טו

וַיֵּצֵא תֶּרַח מֵאוּר כַּשְׂדִים הוּא וּבָנָיו לָלֶכֶת אַרְצָה הַלְּבָנוֹן וְאַרְצָה כְּנָ֑עַן, וַיֵּשֶׁב בְּאֶרֶץ חָרָֽן:

טז

וַיֵּשֶׁב אַבְרָם עִם תֶּרַח אָבִיו בְּאֶרֶץ חָרָן שְׁבֻעָיִֽם:

יז

וַיְהִי בַּשָּׁבוּעַ הַשִּׁשִּׁי בַּשָּׁנָה הַחֲמִישִׁית בּוֹ וַיָּקָם אַבְרָם וַיֵּשֶׁב בַּלַּיְלָה בְּרֹאשׁ הַחֹדֶשׁ הַשְּׁבִיעִ֑י לְהַבִּיט בְּכוֹכָבִים מִן־הָעֶרֶב עַד־הַבֹּקֶר לָדַעַת מַה־דֶּרֶךְ הָרוּחַ עַל־הָאָרֶץ בַּשָּׁנָה הַהִֽיא:

יח

וַיְהִי לְבַדּוֹ בְּשִׁבְתּוֹ לְהַבִּ֔יט, וַיָּבֹא דָבָר בְּלִבּוֹ וַיֹּאמַ֑ר: כָּל־־אוֹתוֹת הַכּוֹכָבִים וְאוֹתוֹת הַשֶּׁמֶשּׁ וְהַיָּרֵחַ בְּיַד־ה' הֵמָּֽה:

יט

לָמָּה זֶה אֶדְרָשֵׁ֑ם, בִּרְצוֹנוֹ יַמְטִיר יוֹרֶה וּמַלְקוֹשׁ וּבִרְצוֹנוֹ יוֹרִיד הַגֶּשֶׁם וְהַכֹּל בְּיָדֽוֹ:

כ

וְיִתְפַּלֵּל בַּלַּיְלָה הַהוּא וַיֹּאמַ֑ר: אֵלִי אֵלִי אֶל־עֶלְיוֹן אַתָּה לְבַדְךָ אֱלֹהַי וְאַתָּה בָּרָאתָ אֶת־כֹּל וְהַכֹּל מַעֲשָׂה יָדֶיךָ וּבְךָ בָּחַרְתִּי לֵאלֹהִֽים:

כא

הַצִּילֵנִי נָא מִיַּד הַמַּלְאָכִים הָרָעִים הָרוֹדִים בְּמַחְשְׁבוֹת לֵב־הָאָדָ֑ם, לְבַל יָסִירוּ אֶת־לְבָבִי מִמְּךָ אֱלֹהָֽי:

כב

וְאַל תִּתְּנֵנִ֔י אוֹתִי וְאֵת זַרְעִי לְעוֹלָם לָסוּר מֵאַחֲרֶיךָ מֵעַתָּה וְעַד עוֹלָֽם:

כג

וַיֹּאמַר: הֶאָשׁוּב לִי אֶל־־אוּר כַּשְׂדִים הַמְּבַקְּשִׁים אֶת־פָּנַי לָשׁוּב אֲלֵיהֶ֑ם, וְאִם אֵשֵׁב פֹּה בַּמָּקוֹם הַזֶּֽה?

כד

הַנְחֵה אֶת־עַבְדְךָ בְּדֶרֶךְ אֱמֶת לְפָנֶיךָ לָלֶכֶת בָּ֑הּ, וּלְבַל אֶתְהַלֵּךְ בִּשְׁרִירוּת לִבִּי אֱלֹהָֽי:

כה

וַיְהִי כַּאֲשֶׁר כִּלָּה לְדַבֵּר וּלְהִתְפַּלֵּ֑ל, וְהִנֵּה דְבַר ה' בְּפִי אֵלָיו לֵאמֹֽר:

כו

לֶךְ לְךָ מֵאַרְצְךָ וּמִמּוֹלַדְתְּךָ וּמִבֵּית אָבִי֑ךָ, אֶל־־הָאָרֶץ אֲשֶׁר אַרְאֶֽךָּ:

כז

וְאֶעֶשְׂךָ לְגוֹי גָּדוֹל וְעָצוּם וַאֲבָרֶכְךָ וַאֲגַדְּלָהּ שְׁמֶךָ֑, וֶהְיֵה בְרָכָה בְּקֶרֶב הָאָֽרֶץ:

כּח

וְנִבְרְכוּ בְךָ כֹּל מִשְׁפְּחוֹת הָאֲדָמָ֑ה, מְבָּרְכֶּיךָ אֲבָרְכָה וּמְקַלְּלֶיךָ אָאֹֽר

כט

וְהָיִיתִי לְךָ לֵאלֹהִים וּלְבָנֶיךָ וְלִבְנֵי בָנֶיךָ וּלְכָל־זַרְעֶ֑ךָ, וּשְׁמַרְתִּיךָ בְּכֹל אֲשֶׁר־תֵּלֵךְ אָנֹֽכִי אֱלֹהֶֽיךָ:

ל

אַל תִּירָא מֵעַתָּה וְעַד כָּל־דּוֹרוֹת הָאָ֑רֶץ, אֱלֹהֶיךָ אֲנִֽי:

לא

וַיֹּאמֶר ה' אֱלֹהִים אֵלַי פְּתַח פִּיו וּשְׂפָתָיו וּפְקַח אָזְנָ֑יו, וָאָחֵל לְדַבֵּר עִבְרִית כִּלְשׁוֹן עַמּֽוֹ:

לב

וַיִּקַּח אֵת סִפְרֵי אֲבוֹתָיו הַכְּתוּבִים עִבְרִית וַיַּעְתִּיקֵ֑ם; אָז הֵחֵל לִלְמֹד בָּהֶם וַאֲבָאֵר־לוֹ אֵת כָּל־דָּבָר הַקָּשֶׁה וַיִּלמַד בָּהֶם בִּימֵי שֵׁשֶׁת חָדְשֵׁי הַמָּטָֽר:

לג

וַיְהִי בַּשָּׁנָה הַשְּׁבִיעִית לַשָּׁבוּעַ הַשִּׁשִּׁי וַיְדַבֵּר אֶל־אָבִ֑יו, וַיּוֹדִיעֵהוּ כִּי יֵצֵא מֵחָרָן לָלֶכֶת אַרְצֶה כְּנַעַן לִרְאוֹת אוֹתָהּ וְאַחַר יָשׁוּב אֵלָֽיו:

לד

וַיֹּאמֶר אֵלָיו תֶּרַח אָבִיו לֵךְ בְּשָׁל֑וֹם, אֱלֹהֵי הָעוֹלָם יַיְשִׁיר מַעֲגַל רַגְלְךָ וֵאלֹהִים יִהְיֶה עִמְּךָ וְיָגֵן בַּעַדְךָ מִכָּל־רַֽע:

לה

וְיִתֵּן לְךָ חֵן וְרַחֲמִים וָחֶסֶד לִפְנֵי כָּל־רוֹאֶ֑יךָ, וְאַל־יִמְשָׁל־בְּךָ אָדָם לַעֲשׂוֹת לְךָ רָעָה, לֵךְ בְּשָׁלֽוֹם:

לו

וְאִם תִּמְצָא הָאָרֶץ חֵן בְּעֵינֶיךָ לָשֶׁבֶת בָּ֔הּ הָבָה וְקָחֵנִי אֵלֶ֑יךָ, וְקַח עִמְּךָ אֶת־לוֹט בֶּן־הָרָן אָחִיךָ לְךָ לְבֵן וֵאלֹהִים יְהִי עִמָּֽךְ: