ספר היובלים/רובין מנוקד/י

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק י

א

וּבַשָּׁבֻעַ הַשְּׁלִישִׁי לַיּוֹבֵל הַזֶּה, הֵחֵלּוּ הַמַּלְאָכִים הַטְּמֵאִים לְהַחֲטִיא אֶת בְּנֵי־נֹחַ לְפַתּוֹתָם וּלְהֲשִׁיבָם עַד־דַּכָּא:

ב

וַיָּבֹאוּ בְּנֵי־נֹחַ אֶל־אֲבִיהֶם וַיְּסַפְּרוּ לוֹ עַל־אוֹדוֹת הָרוּחוֹת, אֲשֶׁר הֶחֱטִיאוּ אֶת בְּנֵי־בְּנֵיהֶם הִדִּיחוּם בַּחֲשֵׁכָה וֶהֱמִיתוּם:

ג

וַיִּתְפַּלֵּל אֶל־־ה' אֱלֹהָיו וַיֹּאמַר, אֱלֹהֵי הָרוּחוֹת לְכָל־בָּשָׂר אֲשֶׁר עָשִׂיתָ בְּרַחֲמֶיךָ וַתַּצֵּל אוֹתִי וְגַם בָּנַי מִמֵּי־הַמַּבּוּל וְלֹא־נְתַתָּנִּי לִרְאוֹת שָׁחַת כַּאֲשֶׁר עָשִׂיתָ לְבָנִים מַשְׁחִיתִים:

ד

כִּי חַסְדְּךָ גָּדוֹל עָלָי, וְרַבִּים רַחֲמֶיךָ עַל־נַפְשִׁי:

ה

יִגְדַּל־נָא חַסְדְּךָ עַל בָּנֶיךָ, אַל־יִמְשְׁלוּ בָם הַמַּלְאָכִים הָרָעִים לְבַל יַשְׁחִיתוּם אֶת־הָאָרֶץ:

ו

הֵן בֵּרַכְתָּ אוֹתִי וְאֶת־בָּנָי, כִּי נִפְרֶה וְנִרְבֶּה וּנְמַלֵּא אֶת־הָאָרֶץ:

ז

אַתָּה יָדַעְתָּ אֵת אֲשֶׁר עָשׂוּ הַשּׁוֹמְרִים אֲבוֹת הַמַּלְאָכִים הָאֵלֶּה בְּיָמָי:

ח

וְגַם אֶת־הַמַּלְאָכִים הָאֵלֶּה אֲשֶׁר בַּחַיִּים חֲיָתָם אֱסוֹר וּכְלָאֵם בִּשְׁאוֹל תַּחְתִּיָּה, לְבַל יַשְׁחִיתוּ בִּבְנֵי עַבְדֶךָ אֱלֹהָי כִּי אַכְזָרִים הֵמָּה וּלְהַשְׁחִית נִבְרָאוּ:

ט

אַל יִמְשְׁלוּ בְּרוּחוֹת הַחַיִּים כִּי אַתָּה לְבַדְךָ יָדַעְתָּ אֶת־מִשְׁפָּטָם וְאַל־יְהִי לָהֶם שִׁלְטוֹן עַל בְּנֵי־הַצֶּדֶק מֵעַתָּה וְעַד עוֹלָם:

י

וַיֹּאמֶר אֱלֹהֵינוּ אֵלֵינוּ לֶאֱסֹר אֵת כֻּלָּם:

יא

וַיָּבֹא שַׂר הָרוּחוֹת מַשְׂטֵמָה וַיֹּאמֶר, בִּי אֲדוֹנָי הֲלֹא יִוָּתְרוּ מֵהֶם שְׂרִידִים לִפָנַי לִשְׁמוֹעַ בְּקוֹלִי וְלַעֲשׂוֹת אֶת־כֹּל אֲשֶׁר אוֹמַר לָהֶם:

יב

כִּי אִם־לֹא יִשָּׁאֵר לִי אִישׁ מֵהֶם, לֹא־אוּכַל לְהַשְׁלִים כֹּחַ חֶפְצִי בִּבְנֵי־אָדָם:

יג

כִּי הִנֵּה הִנָּם לְהַשְׁחִית וּלְהַחֲטִיא עַל־פִּי דְבָרַי בְּמֶמְשַׁלְתִּי, כִּי רַבָּה רָעַת בְּנֵי־אָדָם:

יד

וַיֹּאמֶר הַחֵלֶק הָעֲשִׂירִי יִוָּתֵר מֵהֶם לִפָנָי, וְתֵשַׁע יָדוֹת יֵרְדוּ אֶל מְקוֹם הַמִּשְׁפָּט:

טו

וַיֹּאמֶר אֶחָד מִמֶּנּוּ נוֹרֶה לְנֹחַ אֶת־כֹּל הָרְפוּאוֹת, כִּי יָדַע כִּי לֹא־יִתְהַלְּכוּ בִּצְדָקָה וְלֹא יִלָּחֲמוּ בְּמֵישָׁרִים:

טז

וַנַּעַשׂ כַּאֲשֶׁר צִוָּה וַנָּאֱסוֹר בִּמְקוֹם הָעוֹנֶשׁ אֵת כָּל־[הָרוּחוֹת] הָרָעוֹת הַמְּחַבְּלִים, וְאֵת הַחֵלֶק הָעֲשִׂירִי הוֹתַרְנוּ מֵהֶם לְמַעַן יַעֲשׂוּ אֶת־מִשְׁפַּט הַשָּׂטָן עַל־הָאָרֶץ:

יז

וְאֵת רְפֻאוֹת תְּעָלָה לְכָל־מַדְוֵי הָרוּחוֹת הִגַּדְנוּ לְנֹחַ, וְאֵת מְזִמּוֹת נִכְלֵיהֶם לְהַחֲטִיא אֵיךְ יֵרָפָאוּ בְּצִמְחֵי הָאֲדָמָה:

יח

וַיִּכְתֹּב נֹחַ בְּסֵפֶר אֶת־כָּל אֲשֶׁר הוֹרֵינוּ אוֹתוֹ עַל כָּל־מִינֵי מַרְפֵּא:

יט

כָּכָה נִכְלְאוּ הָרוּחוֹת הָרָעוֹת מֵעַל בְּנֵי־נֹחַ:

כ

וַיִּתֵּן אֵת כָּל־הַמִּכְתָּבִים אֲשֶׁר כָּתַב אֶל־שָׁם בְּנוֹ הַבְּכוֹר, כִּי אוֹתוֹ אָהַב מִכָּל־בָּנָיו:

כא

וַיִּשְׁכַּב נֹחַ עִם אֲבוֹתָיו, וַיִּקָּבֵר עַל־־הָהָר לוּבָר בְּאֶרֶץ אֲרָרָט:

כב

תְּשַׁע מֵאוֹת שָׁנָה וַחֲמִשִּׁים שָׁנָה מָלְאוּ לִימֵי חַיָּיו, תִּשְׁעָה־־עָשָׂר יוֹבְלִים וּשְׁנֵי שָׁבֻעִיִם וְחָמֵשׁ שָׁנִים:

כג

וַיְהִי בְּחַיָּיו עַל־הָאָרֶץ צַדִּיק תָּמִים מְאֹד נַעֲלֶה עַל־־כָּל־בְּנֵי אָדָם, מִלְּבַד חֲנוֹךְ:

כד

כִּי תּוֹלְדַת חֲנוֹךְ הָיְתָה לָעֵדוּת לְדוֹרוֹת עוֹלָם, לְהַגִּיד אֶת־כָּל אֲשֶׁר יִקְרָא לְדוֹר וָדוֹר בַּיּוֹם הַמִּשְׁפָּט:

כה

וּבְיוֹבֵל הָאַרְבָּעָה וּשְׁלֹשִׁים בַּשָּׁנָה הָרִאשׁוֹנָה לְשָׁבֻעַ הַשֵּׁנִי, לָקַח־לוֹ פֶּלֶג אִשָּׁה וּשְׁמָהּ לוֹמְנָה בַּת שִׁנְעָר:

כו

וַתֵּלֶד־לוֹ בֵּן בַּשָּׁנָה הָרְבִיעִית לַשָּׁבוּעַ הַזֶּה, וַיִּקְרָא אֶת־שְׁמוֹ רְעוּ:

כז

כִּי־אָמַר הִנֵּה הֵרֵעוּ בְנֵי אָדָם בִּמְזִמַּת תּוֹעֵבָה, כִּי יָזְמוּ לִבְנוֹת לָהֶם עִיר וּמִגְדָל בְּאֶרֶץ שִׁנְעָר כִּי נָסְעוּ מֵאֲרָרָט מִקֶּדֶם אֶל־שִׁנְעָר:

כח

כִּי בְּיָמָיו בָּנוּ עִיר וּמִגְדָל, בְּאָמְרָם נַעֲלֶה־בּוֹ הַשָּׁמַיְמָה:

כט

וַיָּחֵלוּ לִבְנוֹת בַּשָּׁבוּעַ הָרְבִיעִי וַיִּשְׂרְפוּ בָאֵשׁ, וַתְּהִי לָהֶם הַלְּבֵנָה לְאָבֶן וְהַחֹמֶר אֲשֶׁר דָּבְקוּ בוֹ אֵת טוּרֵי הָאֲבָנִים הָיָה חֵמָר מִן־הַיָּם וּמִן מַעְיְנֵי־מַיִם אֲשֶׁר בְּאֶרֶץ שִׁנְעָר:

ל

וַיִּבְנוּ אוֹתָהּ שָׁלֹשׁ וְאַרְבָּעִים שָׁנָה...

לא

וַיֹּאמֶר ה' אֱלֹהֵינוּ אֵלֵינוּ, הֵן עַם אֶחָד וְזֶה הַחִלָּם לַעֲשׂוֹת וְעַתָּה לֹא־אֶרֶף מֵהֶם:

לב

הָבָה נֵרְדָה וְנָבְלָה שְׂפָתָם, אֲשֶׁר לֹא יִשְׁמְעוּ אִישׁ אֶת־רֵעֵהוּ:

לג

וְיָפֻצוּ בָּאֲרָצוֹת וּבַגּוֹיִם, וְלֹא יוֹסִיפוּ עוֹד לָשִׁית עֵצָה בִּלְבָבָם עַד־יוֹם הַמִּשְׁפָּט:

לד

וַיֵּרֶד ה' וַנֵּרֶד עִמּוֹ לִרְאוֹת אֶת־הָעִיר וְאֶת־הַמִּגְדָל, אֲשֶׁר בָּנוּ בְנֵי־הָאָדָם:

לה

וַיְעַלֵּג כָּל־מִלָּה בִּלְשׁוֹנָם וְלֹא שָׁמַע אִישׁ שְׂפַת רֵעֵהוּ, וַיַּחְדְלוּ לִבְנוֹת הָעִיר וְהַמִּגְדָל:

לו

עַל־כֵּן קָרָא שֵׁם כָּל־אֶרֶץ שִׁנְעָר בָּבֶל כִּי־שָׁם בָּלַל ה' שְׂפַת כָּל־בְּנֵי הָאָדָם, וּמִשָּׁם נָפֹצוּ בְּעָרֵיהֶם לִלְשׁוֹנוֹתָם וּלְגוֹיֵיהֶם:

לז

וַיִּשְׁלַח ה' רוּחַ חָזָק עַל־־מִגְדָלָם, וַיְהָרְסֵהוּ עַל־הָאָרֶץ:

לח

וְהִנֵּה הוּא בֵין אֶרֶץ אַשּׁוּר וּבֵין בָּבֶל בְּאֶרֶץ שִׁנְעָר, וַיִּקְרְאוּ אֶת־שְׁמוֹ חֳרָבוֹת:

לט

בְּשָׁנָה הָרִאשׁוֹנָה לַשָּׁבֻעַ הָרְבִיעִי לַיּוֹבֵל הַחֲמִשָׁה וּשְׁלֹשִׁים נָפֹצוּ בְּאָרֶץ שִׁנְעָר:

מ

וַיֵּלֶךְ חָם וּבָנָיו אֶל־הָאָרֶץ אֲשֶׁר נָפְלָה־לוֹ בְּגוֹרַל נַחֲלָתוֹ, אֶל־־אֶרֶץ הַנֶּגֶב:

מא

וּכְנַעַן רָאָה אֶת־־אֶרֶץ הַלְּבָנוֹן עַד־־נַחַל מִצְרַיִם כִּי טוֹבָה הִיא מְאֹד, וְלֹא־־הָלַךְ אֶל־־אֶרֶץ נַחֲלָתוֹ מַעֲרָבָה לַיָּם:

מב

וַיֵּשֶׁב בְּאֶרֶץ לְבָנוֹן מִמִּזְרָח וּמִמַּעֲרָב לִבְנֵי מְתֵי הַלְּבָנוֹן וּלְכֶתֶף הַיָּם לְאָרְכּוֹ:

מג

וַיֹּאמְרוּ אֵלָיו חָם אָבִיו וְכוּשׁ וּמִצְרַיִם אֶחָיו לֵאמֹר, הֵן נֶאֱחַזְתָּ בְּאֶרֶץ לֹא לָךְ אֲשֶׁר לֹא נָפְלָה לָנוּ בְּגּוֹרָל:

מד

לֹא תַּעֲשֶׂה כֵן, כִּי אִם תַּעֲשֶׂה כֹה אָז נָפוֹל תִּפֹּל בְּחֶרֶב גַּם־אַתָּה גַּם־בָּנֶיךָ בָּאָרֶץ וִהְיִיתֶם לְאָלָה:

מה

כִּי בְּחֹזֶק הַחֶרֶב נֶאֱחַזְתֶּם, וּבְחֶזְקַת הַחֶרֶב יִפְּלוּ בָנֶיךָ וְנִכְרַתָּ לְעוֹלָם:

מו

אַל תֵּשֵׁב בְּאֶרֶץ מְגוּרֵי שֵׁם, כִּי לְשֵׁם וּלְבָנָיו נָפְלָה בַּגּוֹרָל לְנַחֲלָה:

מז

אָרוּר אַתָּה וְאָרוּר תִּהְיֶה מִכָּל־בְּנֵי נֹחַ, בָּאָלָה אֲשֶׁר נִשְׁבַּעְנוּ לִפְנֵי הַשּׁוֹפֵט הַקָּדוֹשׁ וְלִפְנֵי אָבִינוּ נֹחַ:

מח

וְלֹא שָׁמַע בְּקוֹלָם, וַיֵּשֶׁב בְּאֶרֶץ לְבָנוֹן מִן־חֲמָת עַד־לְבֹא מִצְרָיְמָה הוּא וּבָנָיו עַד־הַיּוֹם הַזֶּה, עַל־כֵּן קָרָא לָאָרֶץ הַהִיא כְּנַעַן:

מט

וְיֶפֶת וּבָנָיו נָסְעוּ לִפְּאַת מַעֲרָבָה, וַיֵּשְׁבוּ בְאֶרֶץ נַחֲלָתָם:

נ

וַיַּרְא מָדַי אֶת־אֶרֶץ הַיָּם וַתִּיטַב בְּעֵינָיו, וַיִּדְרֹשׁ אוֹתָהּ מֵאֵת עֵילָם וְאַשּׁוּר וְאַרְפַּכְשָׁד אֲחִי אִשְׁתּוֹ:

נא

וַיֵּשֶׁב בְּאָרֶץ מָדַי עַל־פְּנֵי אֲחִי אִשְׁתּוֹ עַד־הַיּוֹם הַזֶּה, וַיִּקְרָא אֶת־שֵׁם מוֹשָׁבוֹ וְשָׁם מוֹשַׁב בָּנָיו מָדַי עַל־שֵׁם אֲבִיהֶם מָדַי: