ספר היובלים/רובין מנוקד/ז

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ז

א

וּבַשָּׁבֻעַ הַשְּׁבִיעִי בַשָּׁנָה הָרִאשׁוֹנָה בּוֹ בַּיּוֹבֵל הַזֶּה נָטַע נֹחַ גְּפָנִים עַל־הָהָר אֲשֶׁר נָחָה הַתֵּבָה עָלָיו, וּשְׁמוֹ לוּבָר, אַחַד הָרֵי אֲרָרָט:

ב

וַתַּעֲשֶׂינָה פֶּרִי בַּשָּׁנָה הָרְבִיעִית:

ג

וַיִּצּוֹר אֶת־פִּרְיוֹ וַיִּבְצֹר אוֹתוֹ בַּשָּׁנָה הַהִיא בַּחֹדֶשׁ הַשְּׁבִיעִי, וַיַּעַשׂ מִמָּנוּ יַיִן וַיְּשִׂימֵהוּ בְכֶלִי וַיִּשְׁמְרֵהוּ עַד־הַשָּׁנָה הַחֲמִישִׁית עַד־הַיּוֹם הָרִאשׁוֹן הוּא רֹאשׁ הַחֹדֶשׁ הָרִאשׁוֹן:

ד

וַיַּעַל אִשֶּׁה לַה' פַּר בֶּן־בָּקָר וְאַיִל אֶחָד וְשִׁבְעָה כְבָשִׂים בְּנֵי־שָׁנָה וּשְׂעִיר־עִזִּים אֶחָד, לְכַפֵּר בֵּעֲדוֹ וּבְעַד בָּנָיו:

ה

וַיַּעַשׂ בָּרִאשׁוֹן אֶת־הַשָּׂעִיר וַיָּבֵא אֶת־דָּמוֹ עַל־ [קַרְנוֹת] הַמִּזְבֵּחַ אֲשֶׁר עָשָׂה, וְאֶת כָּל־חֶלְבּוֹ שָׂם עַל־הַמִּזְבֵּחַ אֲשֶׁר עָשָׂה שָׁם אֶת־הָאִשֶּׁה:

ו

וּמִן־הַפָּר וּמִן־הָאַיִל וּמִן־הַכְּבָשִׂים שָׂם אֶת־כָּל־בְּשָׂרָם עַל־הַמִּזְבֵּחַ, וַיָּשֶׂם עָלָיו אֵת כָּל־מִנְחוֹתֵיהֶם בְּלוּלוֹת בְּשָׁמֶן:

ז

אַחֲרֵי־כֵן זָרַק בָּרִאשׁוֹנָה יַיִן בָּאֵשׁ עַל־הַמִּזְבֵּחַ, וַיָּשֶׂם לְבוֹנָה עַל־הַמִּזְבֵּחַ וַיַּעַל רֵיחַ נִיחוֹחַ לְרָצוֹן לַעֲלוֹת לִפְנֵי ה' אֱלֹהָיו:

ח

וַיִּשְׂמָח, וַיֵּשְׁתְּ מִן־הַיַּיִן הַזֶּה הוּא וּבָנָיו בְּשִׂמְחָה רַבָּה:

ט

וַיְהִי עָרֶב וַיָּבֹא אֶל־אָהֳלֹה וַיִּשְׁכַּב שִׁכּוֹר וַיִּישָׁן וַיִּתְגַּל בִּשְׁנָתוֹ בְּתוֹךְ אָהֳלֹה:

י

וַיַּרְא חָם אֶת אָבִיו נֹחַ עָרוּם, וַיֵּצֵא וַיַּגֵּד לִשְׁנֵי־אֶחָיו בַּחוּץ:

יא

וַיִּקַּח שֵׁם אֶת־שִׂמְלָתוֹ וַיָּקָם הוּא וְיֶפֶת וַיָּסִירוּ אֵת־שִׂמְלָתוֹ מֵעַל־שִׁכְמָם הַפָּנִים אֲחוֹרַנִּית, וַיְּכַסּוּ אֵת עֶרְוַת אֲבִיהֶם וְהֵם פּוֹנִים אֲחוֹרַנִּית:

יב

וַיִּיקַץ נֹחַ מִשְׁנָתוֹ וַיֵּדַע אֵת כָּל־אֲשֶׁר עָשָׂה לוֹ בְּנוֹ הַקָּטָן:

יג

וַיְּקַלֵּל אֶת־בְּנוֹ וַיֹּאמֶר אָרוּר כְּנָעַן, עֶבֶד עוֹבֵד יִהְיֶה לְאֶחָיו:

יָד

וַיְּבָרֵךְ אֵת שֵׁם, בָּרוּךְ ה' אֱלֹהֵי שֵׁם וִיהִי כְנַעַן עֶבֶד לוֹ:

טו

וְיַפְתְּ אֱלֹהִים לְיֶפֶת וְיִשְׁכֹּן אֱלֹהִים בְּאָהֳלֵי־שֵׁם, וִיהִי כְּנַעַן עֶבֶד לוֹ:

טז

וַיֵּדַע חָם כִּי קִלֵּל אָבִיו אֶת־בְּנוֹ, וַיִּפָּרֶד מֵאֵת אָבִיו הוּא וּבָנָיו עִמוֹ בְּכוּשׁ וּמִצְרַיִם וּפוּט וּכְנָעַן:

יז

וַיִּבֶן לוֹ עִיר, וַיִּקְרָא שְׁמָהּ כְּשֵׁם אִשְׁתּוֹ נַחֲלַת־עֵמֶק:

יח

וַיַּרְא יֶפֶת וַיְּקַנֵּא בְּאָחִיו, וַיִּבֶן עִיר גַּם־הוּא וַיִּקְרָא לָהּ כְּשֵׁם אִשְׁתּוֹ אַדּוֹתָן־יֶלֶק:

יט

וְשֵׁם שָׁכַן עַל־פְּנֵי אָבִיו נֹחַ, וַיִּבֶן עִיר אֵצֶל אָבִיו עַל־יַד הָהָר וַיִּקְרָא שְׁמָהּ גַּם־הוּא כְּשֵׁם אִשְׁתּוֹ צִדְקַת־לֵבָב:

כ

שְׁלָשׁ הֶעָרִים הָאֵלֶּה קְרוֹבִים אֶל־הָהָר לְוּבָר, צִדְקַת־לֵבָב לִפְנֵי הָהָר קֵדְמָה וְנַחֲלַת־עֵמֶק נֶגְבָּה, אַדּוֹתָן־יֶלֶק יָמָה:

כא

וְאֵלֶּה בְּנֵי שֵׁם עֵילָם אַשּׁוּר אַרְפַּכְשַׁד....

כב

בְּיוֹבֵל הַשְּׁמוֹנֶה וְעֶשְׂרִים הוֹאִיל נֹחַ [לְלַמֵּד] אֵת בְּנֵי־בָּנָיו, אֵת כָּל־הַחֻקּוֹת וְהַמִּצְוֹת אֲשֶׁר יָדַע וְאֵת הַמִּשְׁפָּט:

כג

וַיָּעַד בְּבָנָיו לַעֲשׂוֹת צֶדֶק וּלְכַסּוֹת בְּשַׂר עֶרְוָתָם, וּלְבָרֵךְ אֶת־בּוֹרְאָם וּלְכַבֵּד אֶת־הָאָב וְאֶת־הָאֵם, לֶאֱהֹב אִישׁ אֶת־רֵעֵהוּ וְלִשְׁמֹר אֶת־נַפְשׁוֹתֵיהֶם מִכָּל־זְנוּנִים וְטוּמְאָה וּמִכָּל־עַוְלָה:

כד

כִּי בִּגְלַל שְׁלֹשֶׁת הַדְּבָרִים הָאֵלֶּה בָּא הַמַּבּוּל עַל־הָאָרֶץ:

כה

בִּגְלַל הַזְּנוּנִים אֲשֶׁר זָּנוּ הַשּׁוֹמְרִים לְמוֹרַת חֻקֵּי מִשְׁפָּטָם אַחֲרֵי בְנוֹת־הָאָדָם, וְלָקְחוּ לָהֶם נָשִׁים מִכֹּל אֲשֶׁר בָּחָרוּ, הֵמָה עָשׂוּ רֵאשִׁית הַטֻּמְאָה:

כו

וּבְנֵיהֶם הַנְּפִילִים וְכָל־אֲחֵיהֶם חָלַק לִבָּם, וַיֹּאכַל אִישׁ אֶת־רֵעֵהוּ, הֶעָנָק הֵמִית אֶת־הַנָּפִיל וְהַנָּפִיל הֵמִית אֶת־הָעֶלְיוֹן וְהָעֶלְיוֹן הֵמִית אֶת־בְּנֵי הָאָדָם וְאָדָם אֶת־רֵעֵהוּ:

כז

וְכָל־אִישׁ הָיָה [נָכוֹן] לַעֲשׂוֹת אָוֶן וְלִשְׁפֹּךְ דָּם נָקִי, וַתִּמָלֵּא הָאָרֶץ חָמָס:

כח

וּבְדַרְכֵיהֶם הָלְכוּ כָּל־חַיַּת הָאָרֶץ וְעוֹף הַשָּׁמַיִם, וְכֹל הַשּׁוֹרֵץ וְהָרוֹמֵשׂ עַל־הָאָרֶץ, וְדָם רַב נִשְׁפַּךְ עַל־הָאָרֶץ:

כט

וְכָל־יֵצֶר מַחְשְׁבוֹת הָאֲנָשִׁים הָיָה אֶפֶס וְרַע כָּל־הַיּוֹם:

ל

וַיִּמַח ה' אֵת כָּל־הַיְּקוּם מֵעַל־פְּנֵי הָאֲדָמָה, מִפְּנֵי רוֹעַ מַעַלְלֵיהֶם וּמִפְּנֵי הַדָּם אֲשֶׁר שָׁפְכוּ עַל־הָאָרֶץ, הִשְׁמִיד אֶת כָּל־הַיְּקוּם:

לא

וַאֲנִי וְאַתֶּם בָּנַי וְכָל־אֲשֶׁר בָּא אִתָּנוּ אֶל־הַתֵּבָה נִשְׁאַרְנוּ:

לב

וְהִנֵּה אָנֹכִי רֹאֶה כַּיּוֹם אֶת־מַעֲשֵׂיכֶם כִּי־לֹא תִּתְהַלְּכוּ בִצְדָקָה, כִּי־אִם הַחִלּוֹתֶם לָלֶכֶת בְּדֶרֶךְ שָׁחַת:

לג

וּלְהִפָּרֵד אִישׁ מֵרֵעֵהוּ וּלְקַנֵּא אִישׁ בַּעֲמִיתוֹ, וְכִי לֹא תֵּשְׁבוּ בְּשָׁלוֹם בָּנַי אִישׁ אֵת אָחִיו:

לד

כִּי אֶרְאֶה אֵיךְ הָרוּחוֹת הָרָעוֹת הֵחֵלּוּ לְהוֹלִיכְכֶם תּוֹעָה, אֶתְכֶם וְאֵת בְּנֵיכֶם:

לה

וְעַתָּה אֶדְאַג לָכֶם פֶּן אַחֲרֵי מוֹתִי תִּשְׁפְּכוּ דַּם־אָדָם עַל־הָאָרֶץ, וְתִתַּמּוּ גַּם־אַתֶּם מֵעַל פְּנֵי־הָאֲדָמָה:

לוֹ

כִּי כָּל־שׁוֹפֵךְ דַּם אָדָם וְכָל־אוֹכֵל דַּם כָּל־בָּשָׂר יִשָּׁמֵד מִקֶּרֶב כֹּל מִן־הָאָרֶץ:

לז

וְלֹא־יִשָּׁאֵר אִישׁ הָאוֹכֵל דָּם וְהַשּׁוֹפֵךְ דָּם עַל־הָאָרֶץ, לֹא נִין וְלֹא נֶכֶד לוֹ תַּחַת הַשָּׁמַיִם:

לח

כִּי־אִם בְּגֵיא צַלְמָוֶת יֵלְכוּ לָמוֹ, וְאֶל־בּוֹר שַׁחַת יֵרֵדוּ:

לט

בְּחֶשְׁכַּת הַתְּהוֹם יִטְבְּעוּ כֻּלָּם בְּמַגֵּפָה רָעָה, אִישׁ אִישׁ [מִכֶּם] אֲשֶׁר לֹא־יַקְרִיב מִכָּל־דָּם לְכַפֵּר בַּעַדְכֶם:

מ

וְזֶה הַדָּבָר מִדֵּי תִּשְׁחֲטוּ חַיָּה אוֹ בְהֵמָה אוֹ כֹּל אֲשֶׁר יְעוֹפֵף עַל־הָאָרֶץ, עָשׂוּ לָכֶם פְּעֻלַּת צְדָקָה בַּדָם בְּכָל־מָקוֹם אֲשֶׁר יִשָּׁפֵךְ עַל־הָאָרֶץ:

מא

וְאִישׁ מִכֶּם לֹא יֹאכַל [בָּשָׂר] בְּדָם, אַל תִּתְּנוּ לֶאֱכֹל דָּם לִפְנֵיכֶם:

מב

כַּסּוּ אֶת־הַדָּם בֶּעָפָר כִּי כֵן צֻוֵּיתִי, אֲעִידֵהוּ לָכֶם וְלִבְנֵיכֶם וּלְכָל־בָּשָׂר:

מג

וְאַל תֹּאכְלוּ הַנֶּפֶשׁ עִם הַבָּשָׂר פֶּן לֹא־יִדָּרֵשׁ דִּמְכֶם לְנַפְשְׁכֶם מִכָּל־בָּשָׂר הַשּׁוֹפֵךְ אוֹתוֹ עַל־הָאָרֶץ:

מד

כִּי לֹא יְכֻפַּר לָאָרֶץ אֶת־הַדָּם אֲשֶׁר נִשְׁפַּךְ עָלֶיהָ, כִּי־אִם בְּדַם שֹׁפְכוֹ תִּטְהַר הָאָרֶץ לְכָל־דּוֹרוֹתֶיהָ:

מה

וְעַתָּה בָּנַי שִׁמְעוּ בְּקוֹלֵי עָשׂוּ מִשְׁפָּט וּצְדָקָה, לְמַעַן תִּנָּטְעוּ בִּצְדָקָה עַל־כָּל־פְּנֵי הָאֲדָמָה וּתְהִלַּתְכֶם תִּנַּשֵׂא לִפְנֵי אֱלֹהַי אֲשֶׁר הִצִּיל אוֹתִי מִמֵּי־הַמַּבּוּל:

מו

וְהִנֵּה תֵּלְכוּ וּבְנִיתֶם לָכֶם עָרִים וּנְטַעְתֶּם בָּהֶן כָּל־עֵץ צוֹמֵחַ עַל־הָאָרֶץ:

מז

וְלֹא יֶאֱסוֹף אִישׁ שָׁלֹשׁ שָׁנִים מִפְּרִי כָּל־עֵץ מַאֲכָל לְאָכְלוֹ, ... וּבַשָּׁנָה הָרְבִיעִית יִהְיֶה פִּרְיוֹ קֹדֶשׁ הִלּוּלִים:

מח

וְרֵאשִׁית כָּל־פְּרִי הָאֲדָמָה [...] יוּבָא לִפְנֵי אֵל עֶלְיוֹן קֹנֵה שָׁמַיִם וְאֶרֶץ וְכָל־הַיְּקוּם:

מט

לְמַעַן יוּבָא עִם־הַחֵלֶב רֵאשִׁית פְּרִי יַיִן וָשֶׁמֶן עַל־מִזְבַּח ה' לִרְצוֹנוֹ:

נ

וְהַנּוֹתָר יֹאכְלוּ מְשָׁרְתֵי בֵית ה' לִפְנֵי הַמִּזְבֵּחַ לִרְצוֹנוֹ:

נא

וּבַשָּׁנָה הַשְּׁבִיעִית תַּעֲשׂוּ שְׁמִטָּה, כִּי תִּשְׁמְטוּהָ בְּצֶדֶק וּבְמֵישָׁרִים וְתִהְיוּ צַדִּיקִים וְכָל־מַטָּעֵיכֶם יְבֹרָכוּ:

נב

כִּי־כֵן צִוָּה חֲנוֹךְ אָבִי אֲבִיכֶם מְתוּשֶׁלַח אֶת־בְּנוֹ וּמְתוּשֶׁלַח צִוָּהוּ לִבְנוֹ לָמֶךְ, וְלֶמֶךְ צִוָּה לִי אֵת כָּל אֲשֶׁר צִוּוּ לוֹ אֲבוֹתָיו:

נג

וְגַם אָנֹכִי מְצַוֵּהוּ לָכֶם בָּנַי, כַּאֲשֶׁר צִוָּה חֲנוֹךְ אֶת־בְּנוֹ בְּיוֹבְלוֹ הָרִאשׁוֹן:

נד

בִּהְיוֹתוֹ עוֹד בְּאֶרֶץ הַחַיִּים הַשְּׁבִיעִי בְּדוֹרוֹתָיו, צִוָּה וְהֵעִיד אֶת־הַדָּבָר לִבְנוֹ וְלִבְנֵי־בָּנָיו עַד־יוֹם מוֹתוֹ: