ספר היובלים/רובין מנוקד/ט

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ט

א

וַיְּחַלֵּק חָם לְבָנָיו, וַיֵּצֵא הַגּוֹרָל הָרִאשׁוֹן לְכֻלָּם לִפְּאַת קֵדְמָה וְיָמָה לְפוּט וְיֶרֶךְ מַעֲרָבוֹ לִכְנָעַן וְלִפְאַת מַעֲרַב הַיָּם...:

ב

וַיְּחַלֵּק שֵׁם גַּם־הוּא לְבָנָיו, וַיֵּצֵא הַגּוֹרָל הָרִאשׁוֹן לְעֵילָם וּלְבָנָיו מִקֶּדֶם לִנְהַר חִידֶקֶל עַד־לְבֹא אֶרֶץ הַקֶּדֶם:

ג

כָּל־אֶרֶץ הוֹדוּ וְעַד־אֵרְתְּרָה וּמֵימֵי דּוּדִין וְכֹל הֶהָרִים וְאֵילָה וְכָל־־הָאָרֶץ שׁוּשָׁן, וְכֹל אֲשֶׁר לְעֵבֶר פַּרְנָךְ עַד־הַיָּם אֵרְתְּרָה וְעַד הַנַּחַל תִּינָה:

ד

וּלְאַשּׁוּר יָצָא הַגּוֹרָל הַשֵּׁנִי אֶרֶץ אַשּׁוּר וְנִינְוֵה וְשִׂנְעָר וְעַד־גְּבוּל הוֹדוּ וְעָלָה לְכֶתֶף הַנָּחַל:

ה

וּלְאַרְפַּכְשַׁד יָצָא הַגּוֹרָל הַשְּׁלִישִׁי כָּל־אֶרֶץ חֶבֶל הַכַּשְׂדִים, לִפְּאַת מִזְרָחָה לִנְהַר פְּרָת קָרוֹב לְיָם אַרְתְּרָה:

ו

וְכָל־מֵימֵי הַמִּדְבָּר עַד־לְבֹא אֶל־חֵיק הַיָּם הַנִּשְׁקָף עַל־אֶרֶץ מִצְרַיִם, כֹּל אֶרֶץ הַלְּבָנוֹן וּשְׂנִיר וַאֲמָנָה וּמָחָה עַל־כֶּתֶף פְּרָת:

ז

וְלַאֲרָם יָצָא הַגּוֹרָל הָרְבִיעִי כָּל־אֶרֶץ אֲרַם נַהֲרָיִם, בֵּין חִדֶּקֶל וּבֵין פְּרָת מִצְּפוֹן הַכַּשְׂדִים עַד־לְבֹא הַרְרֵי אַשּׁוּר:

ח

וְכָל־יֶתֶר הָאֲרָצוֹת עַד־הַיָּם הַגָּדוֹל וְהָלַךְ וְקָרַב קֵדְמָה אֶל־אָחִיו אַשּׁוּר:

ט

וְגַם יֶפֶת חִלֵּק אֶת־אֶרֶץ הַנַּחֲלָה לְבָנָיו:

י

וַיֵּצֵא הַגּוֹרָל הָרִאשׁוֹן לְגוֹמֶר לִפְּאַת קֵדְמָה, מִן־הַצָּפוֹן וְעַד־הַנַּחַל תִּינָה:

יא

וּבַצָּפוֹן יָצָא לְמָגוֹג כָּל־תּוֹךְ הַצָּפוֹן עַד־לְבֹא אֶל־הַיָּם מִעוֹט:

יב

וּלְמָדַי יָצָא לְנַחֲלָה לָרֶשֶׁת אוֹתָהּ לִפְּאַת מַעֲרָבָה עַל־פְּנֵי שְׁנֵי אֶחָיו עַד־־הָאִיִּים וְעַד־־גְּבוּלֵי הָאִיִּים:

יג

וּלְיָוָן יָצְאָה הַנַּחֲלָה הָרְבִיעִית, כָּל־־הָאִי וְהָאִיִּים לְכֶתֶף אַלְדוֹד:

יָד

וּלְתֻבַּל יָצְאָה הַנַּחֲלָה הַחֲמִישִׁית בֵּין הַלָּשׁוֹן הַפּוֹנֶה לִפְּאַת אוּדָה נַחֲלַת לוּד, עַד־הַלָּשׁוֹן הַשְּׁנִיָּה הַנּוֹטָה אֶל־תּוֹךְ הַלָּשׁוֹן הַשְּׁלִישִׁית:

טו

וּלְמֶשֶׁךְ יָצְאָה הַנַּחֲלָה הַשִּׁשִּׁית, וְכָל־הֶעָבָר הַשֵּׁנִי מִן־־הַלָּשׁוֹן הַשְּׁלִישִׁית עַד־לְבֹא קִדְמַת גָּדִיר:

טז

וּלְתִירָס יָצְאָה הַנַּחֲלָה הַשְּׁבִיעִית, וַיְהִי־לוֹ הָאִיִּים הַגְּדוֹלִים בְּתוֹךְ הַיָּם אֲשֶׁר בְּנַחֲלַת חָם וְאִיֵּי קַמָטוּרִי:

יז

וְלִבְנֵי אַרְפַּכְשַׁד יָצְאָה הַנַּחֲלָה הַמְּאֻשָּׁרָה:

יח

כָּכָה הִתְנַחֲלוּ בְּנֵי־נֹחַ לִבְנֵיהֶם לִפְנֵי נֹחַ אֲבִיהֶם, וַיַּשְׁבַּע אוֹתָם בִּשְׁבוּעַת אָלָה אִם יִתְחָרֶה אִישׁ מֵהֶם לִכְבֹּשׁ נַחֲלָה אֲשֶׁר לֹא נָפְלָה לוֹ בַּגּוֹרָל:

יט

וְכֻלָּם עָנוּ וְאָמְרוּ אָמֵן, וְאָמֵן לָהֶם וְלִבְנֵיהֶם עַד־עוֹלָם בְּדוֹרוֹתֵיהֶם:

כ

עַד־־יוֹם הַמִּשְׁפָּט אֲשֶׁר בּוֹ יִשְׁפֹּט ה' אֱלֹהִים אוֹתָם בְּחֶרֶב וּבָאֵשׁ עַל־כָּל־רָעַת טוּמְאַת עֲוֹנוֹתֵיהֶם, כִּי מָלְאוּ אֶת־הָאָרֶץ רֶשַׁע וְטוּמְאָה זְנּוּנִים וַחֲטָאָה: