ספר היובלים/רובין מנוקד/ו

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ו

א

וּבְרֹאשׁ הַחֹדֶשׁ הַשְּׁלִישִׁי יָצָא מִן־הַתֵּבָה וַיִּבֶן מִזְבַּח עַל־הָהָר הַזֶּה וַיֵּרָא עַל הָאָרֶץ:

ב

וַיִּקַּח שְׂעִיר־עִזִּים רַךְ וַיְּכַפֵּר בְּדָמוֹ עַל־כָּל־אַשְׁמַת הָאָרֶץ כִּי נִמַח כָּל־הַיְּקוּם אֲשֶׁר הָיָה עָלֶיהָ לְבַד מֵאֲשֶׁר הָיוּ אֵת נֹחַ בַּתֵּבָה:

ג

וַיָּשֶׂם אֶת־חֶלְבּוֹ עַל־הַמִּזְבֵּחַ וַיִּקַּח פָּר וְאַיִל וְכֶבֶשׂ וּשְׂעִירֵי עִזִּים וּמֶלַח וְתוֹר וּבְנֵי־יוֹנָה:

ד

וַיַּעַל אִשֶּׁה עַל־הַמִּזְבֵּחַ וַיָּבֹא גַּם מְנָחוֹת אֲפוּיוֹת בְּשָׁמֶן, וַיִּזְרֹק אֶת־הַדָּם וָיָיִן וַיָּשֶׂם עַל־הַכֹּל לְבוֹנָה וַיַּעַל רֵיחַ נִיחוֹחַ לְרָצוֹן לִפְנֵי ה':

ה

וַיָּרַח ה' אֶת־רֵיחַ הַנִיחוֹחַ וַיִּכְרֹת אִתּוֹ בְּרִית לְבַל יִהְיֶה עוֹד מַבּוּל לְשַׁחֵת הָאָרֶץ:

ו

עוֹד כָּל־יְמֵי הָאָרֶץ, זֶרַע וְקָצִיר לֹא יִשְׁבֹּתוּ קֹר וָחֹם קַיִץ וָחֹרֶף יוֹם וָלַיְלָה לֹא יְשַׁנּוּ אֶת־סִדְרָם וְלֹא יִשְּׁבְּתוּ לְעוֹלָמִים:

ז

וְאַתֶּם פְּרוּ וּרְבוּ עַל־הָאָרֶץ, וּמִלְאוּ אוֹתָהּ וֶהֱיוּ לִבְרָכָה עָלֶיהָ:

ח

מוֹרַאֲכֶם וְחִתְּכֶם אֶתֵּן עַל־כֹּל אֲשֶׁר עַל־הָאָרֶץ וַאֲשֶׁר בַּיָּם:

ט

וְהִנֵּה נָתַתִּי לָכֶם כָּל־חַיַּת הָאָרֶץ וְכָל־בְּהֵמָה וְכֹל אֲשֶׁר יְעוֹפֵף וְכָל־הָרֶמֶשׂ הָרֹמֵשׂ עַל־הָאָרֶץ וּדְגֵי הַמַּיִם וְאָת כֹּל לְאָכְלָה, כְּיֶרֶק עֵשֶׂב נָתַתִּי לָכֶם אֶת־כֹל לְאָכְלָה:

י

אַךְ בָּשָׂר בְּנַפְשׁוֹ דָמוֹ לֹא תֹאכֵלוּ כִּי נֶפֶשׁ כָּל־בָּשָׂר הַדָּם וְלֹא יִדָּרֵשׁ דִּמְכֶם לְנַפְשְׁכֶם:

יא

מִיַּד כָּל־אָדָם מִיַּד אִישׁ אֶדְרֹשׁ דָּם אָדָם:

יב

שׁוֹפֵךְ דָּם אָדָם בָּאָדָם דָּמוֹ יִשָּׁפֵךְ כִּי בְּצֶלֶם אֱלֹהִים עָשָׂה אֶת־הָאָדָם:

יג

וְאַתֶּם פְּרוּ וּרְבוּ, וּמִלְאוּ אֶת־הָאָרֶץ:

יד

וּבָנָיו נִשְׁבְּעוּ לְבִלְתִּי אֲכֹל דָּם כָּל־בָּשָׂר:

טו

וַיָּקֶם בְּרִית לִפְנֵי ה' אֱלֹהִים לְעוֹלָם לְכָל־דּוֹרוֹת הָאָרֶץ בַּחֹדֶשׁ הַזֶּה:

טז

לָכֵן דִּבֶּר אוֹתְךָ כִּי תָּקִים גַּם־אַתָּה בְּרִית אֵת בְּנֵי־יִשְׂרָאֵל בַּחֹדֶשׁ הַזֶּה עַל־הָהָר, וַהֲבֵאתָ אוֹתָם בְּאָלָה וְתִזְרֹק דָּם עֲלֵיהֶם עַל־כָּל־דִּבְרֵי הַבְּרִית אֲשֶׁר כָּרַת ה' עִמָהֶם לְדוֹרוֹת עוֹלָם:

יז

וְזֹאת הָעֵדוּת הַכְּתוּבָה לִפְנֵיהֶם לְמַעַן תִּשְׁמְרוּ אוֹתָהּ כָּל־הַיָּמִים לְבַל תֹּאכְלוּ לְעוֹלָם אֶת־דָּם נֶפֶשׁ כָּל־חַי:

יח

וְהָאִישׁ אֲשֶׁר יֹאכַל דָּם חַיָּה וּבְהֵמָה וָעוֹף כָּל־יְמֵי הָאָרֶץ, וְנִכְרַת הוּא וְזַרְעוֹ מִן הָאָרֶץ:

יט

וַיְּצַו אֶת־בְּנֵי יִשְׂרָאֵל לְבִלְתִּי אֲכוֹל כָּל־דָּם, לְמַעַן יַעַמְדוּ הֵם וְזַרְעָם לִפְנֵי ה' אֱלֹהֵינוּ לָנֶצַח:

כ

וְהַחֹק הַזֶּה לֹא יָמוּשׁ לְעוֹלָמִים וְשָׁמְרוּ אוֹתוֹ לְדוֹרוֹת עוֹלָם, לַכְפֵּר תָּמִיד עַל נַפְשׁוֹתֵיכֶם בַּדָּם עַל־הַמִּזְבֵּחַ:

כא

מִדֵּי יוֹם בְּיוֹמוֹ בַּבֹּקֶר וּבָעֶרֶב יְכַפְּרוּ עֲלֵיהֶם לִפְנֵי ה' וְשָׁמְרוּ אוֹתוֹ וְלֹא יִכָּרֵתוּ:

כב

וַיִּתֵּן לְנֹחַ לְבָנָיו אוֹת לְבַל יָבֹא עוֹד שֵׁנִית מַבּוּל עַל־הָאָרֶץ:

כג

אֶת־קַשְׁתּוֹ נָתַן בֶּעָנָן וְהָיְתָה לְאוֹת בְּרִית עוֹלָם וְלֹא־יִהְיֶה עוֹד הַמַּיִם לְמַבּוּל לְשַׁחֵת הָאָרֶץ עוֹד כָּל־־יְמֵי הָאָרֶץ:

כד

לָכֵן חָרוּת הַחֹק עַל־לֻחוֹת הַשָּׁמַיִם כִּי יִשְׁמְרוּ אֵת חַג־הַשָּׁבֻעוֹת בַּחֹדֶשׁ הַזֶּה פַּעַם אֶחַת בְּשָׁנָה לְחַדֵּשׁ אֶת־הַבְּרִית בְּכָל־שָׁנָה וְשָׁנָה:

כה

וְכָל־הַיָּמִים אֲשֶׁר חָגוּ בַּשָּׁמַיִם אֶת־הַחַג הַזֶּה מִיּוֹם הַבְּרִיאָה עַד־יְמֵי נֹחַ הָיוּ שִׁבְעָה וְעֶשְׂרִים יוֹבְלִים וַחֲמִשָׁה שָׁבֻעִים:

כו

וַיָּחָג נֹחַ אוֹתוֹ שִׁבְעָה יוֹבְלִים וְשָׁבוּעַ אֶחָד עַד־יוֹם מוֹתוֹ, אֲבָל בְּנֵי נֹחַ חִלְלוּ אוֹתוֹ עַד־יְמֵי אַבְרָהָם וַיֹּאכְלוּ דָּם:

כז

אַךְ אַבְרָהָם לְבַדּוֹ שָׁמַר אוֹתוֹ וּבָנָיו יִצְחָק וְיַעֲקֹב שָׁמְרוּ אוֹתוֹ עַד־יָמֶיךָ:

כח

וּבְיָמֶיךָ שָׁכְחוּ אוֹתוֹ בְּנֵי יִשְׂרָאֵל, עַד־אֲשֶׁר חִדַּשְׁתִּים בָּהָר הַזֶּה:

כט

וְגַם אַתָּה צַו אֶת בְּנֵי־יִשְׂרָאֵל וְשָׁמְרוּ אֶת־הַחַג הַזֶּה בְּכָל־דּוֹרוֹתֵיהֶם לְחֹק לָהֶם:

ל

יוֹם אֶחָד בַּשָּׁנָה בַּחֹדֶשׁ הַזֶּה יָחֹגּוּ אֶת־הַחַג הַזֶּה:

לא

כִּי הוּא חַג הַשָּׁבֻעוֹת וְהוּא חַג רֵאשִׁית הַבְּרִיאָה, מִשְׁנֵה־תּוּשִׁיָה לוֹ:

לב

וְהַחַג הַזֶּה לִשְׁתֵּי מִשְׁפָּחוֹת כְּפִי הַכָּתוּב וְהֶחָרוּת עָלָיו:

לג

כִּי אָנֹכִי כָּתַבְתִּי אוֹתוֹ בְּסֵפֶר הַתּוֹרָה הָרִאשׁוֹן בַּסֵפֶר אֲשֶׁר כָּתַּבְתִּי לָךְ, כִּי תָּחֹג אוֹתוֹ יוֹם אֶחָד יוֹם אֶחָד בַּשָׁנָה:

לד

וְגַם הוֹרֵיתִי לְךָ אֶת־קָרְבְּנוֹתָיו לִזְכֹּר אֶתְהֶן, וּבְנֵי־יִשְׂרָאֵל יָחֹגּוּ אוֹתוֹ לְדוֹרוֹתֵיהֶם בַּחֹדֶשׁ הַזֶּה יוֹם אֶחָד יוֹם אֶחָד בְּשָׁנָה:

לה

וְרָאשֵׁי חָדְשֵׁי הָרִאשׁוֹן הָרְבִיעִי הַשְּׁבִיעִי וְהָעֲשִׂירִי, הֵמָה יְמֵי הַזִּכָּרוֹן וִימֵי חַג בְּאַרְבַּע תְּקוּפוֹת הַשָּׁנָה:

לו

כְּתוּבִים וַחֲקוּקִים הֵמָה לָעֵדוּת מִיָּמִים יָמִימָה:

לז

וַיָּשֶׂם אוֹתָם נֹחַ לוֹ לְמוֹעֲדִים לְדוֹרוֹת עוֹלָם, לִהְיוֹת לוֹ בָּהֶם חַג זִכָּרוֹן:

לַח

בְּרֹאשׁ הַחֹדֶשׁ הָרִאשׁוֹן נֶאֱמַר אֵלָיו לַעֲשׂוֹת אֶת־הַתֵּבָה, וּבוֹ יָבְשָׁה הָאָרֶץ וַיִּפְתַּח וַיַּרְא אֶת־הָאָרֶץ:

לט

בְּרֹאשׁ הַחֹדֶשׁ הָרְבִיעִי נִכְלָא פִי־מַעְיְנוֹת הַתְּהוֹם בָּאָרֶץ:

מ

וּבְרֹאשׁ הַחֹדֶשׁ הַשְּׁבִיעִי נִבְקְעוּ כָּל־מַעְיְנוֹת תְּהוֹם רַבָּה, וְהַמַיִם הֵחֵלּוּ לָרֶדֶת אֶל־קִרְבֶּנָה:

מא

וּבְרֹאשׁ הַחֹדֶשׁ הָעֲשִׂירִי נִרְאוּ רָאשֵׁי הֶהָרִים, וְנֹחַ הָיָה שָׂמֵחַ:

מב

לָכֵן עָשָׂה אוֹתָם לוֹ לְמוֹעֲדֵי זִכְרוֹן עוֹלָם, וְכָכָה יֻסְּדוּ:

מג

וְנֶחְרְתוּ עַל־לֻחוֹת הַשָּׁמַיִם שְׁתֵּים־עֶשְׂרֵה שַׁבָּתוֹת לְכָל־אֶחָד וְאֶחָד, מִן־הָאֶחָד וְעַד־הַשֵּׁנִי בֹּא יָבֹא זִכְרוֹנָם:

מד

מִן־הָרִאשׁוֹן עַד־הַשֵּׁנִי מִן־הַשֵּׁנִי עַד־הַשְּׁלִישִׁי מִן־הַשְּׁלִישִׁי עַד־הָרְבִיעִי:

מה

וְכָל־הַיָּמִים אֲשֶׁר נוֹעֲדוּ הֵם שְׁתַּיִם וַחֲמִישִׁים שַׁבָּתוֹת יָמִים, עַד־מְלֹאת שָׁנָה תְמִימָה:

מו

כָּכָה חָרוּת וְחָקוּק עַל־לֹחוֹת הַשָּׁמַיִם חָק־שָׁנָה בְּשָׁנָה וְלֹא יַעֲבֹר:

מז

וְאַתָּה צַו אֶת־בְּנֵי יִשְׂרָאֵל וְשָׁמְרוּ אֶת־הַשָּׁנִים עַל־פִּי הַמִּסְפָּר הַזֶּה, אַרְבָּעָה וְשִׁשִׁים יוֹם וּשְׁלוֹשׁ מֵאוֹת יוֹם:

מח

וְהָיָה שָׁנָה תְמִימָה, וּמִסְפַּר מִפְקַד יְמֵי הַשָּׁנָה וּמוֹעֲדֶיהָ לֹא־יִשָׁחֵת:

מט

כִּי הַכֹּל בֹּא יָבֹא בָּהּ כְּפִי־אֲשֶׁר הוּעַד עָלָיו, וְלֹא יַעַבְרוּ כָּל־יוֹם וְלֹא יְחַלְלוּ כָּל־מוֹעֵד:

נ

וְהָיָה כִּי יַעַבְרוּ וְלֹא יִשְׁמְרוּ אוֹתָם כְּמִצְוֹתָיו, יַשְׁחִיתוּ בְּפַעַם אֶחָת כָּל־עֵת וּזְמָן וְהַשָּׁנִים תֶּעֱתַּקְנָה מִמְּקוֹמָן:

נא

וִיעַבְּטוּן אָרְחוֹת סִדְרָם, וְכָל־בְּנֵי יִשְׂרָאֵל יִשְׁכְּחוּ אֶת־דֶּרֶךְ הַשָּׁנִים וְלֹא־יִמְצְאוּ עוֹד:

נב

וְיִזְנְחוּ אֶת־רֹאשׁ הַחֹדֶשׁ וּזְמַנוֹ וְאֵת הַשַּׁבָּתוֹת, וְהֶעֱווּ אֶת כָּל־דַּרְכֵי הַשָּׁנִים:

נג

כִּי יָדַעְתִּי אֶת־הַדָּבָר וּכְהַיּוֹם הַזֶּה אַגִּידֵהוּ לָךְ, וְלֹא אֶל־בִּינָתִי אֶשָּׁעֵן כִּי־כֵן כָּתוּב לְפָנַי עַל־הַסֵּפֶר וְעַל־לֻחוֹת הַשָּׁמַיִם מְיֻסֶּדֶת חֲלֻקַּת הַיָּמִים:

נד

וְלֹא יִשְׁכְּחוּ אֶת־מוֹעֲדֵי הַבְּרִית, וְלֹא יֵלְכוּ בְּמוֹעֲדֵי הַגּוֹיִם לְפִי־תַּעְתֻּעֵיהֶם וּלְפִי־דַעְתָּם:

נה

וְהָיוּ אֲנָשִׁים אֲשֶׁר יַבִּיטוּ יִרְאוּ בְיָרֵחַ, הוּא הַמַשְׁחִית אֶת־הַזְּמַנִים וְיַקְדִים עֲשֶׂרֶת יָמִים בְּכָל־שָׁנָה וְשָׁנָה:

נו

וְלָכֵן יַשְׁחִיתוּ אֶת־הַשָּׁנִים בַּיָּמִים הַבָּאִים, וְעָשׂוּ יוֹם־שָׁוְא לְיוֹם הָעֵדוּת וְיוֹם בִּלְתִּי טָהוֹר לְיוֹם הַמּוֹעֵד:

נז

וְכָל־אִישׁ לֹא יַבְדִּיל בֵּין יְמֵי־קֹדֶשׁ וּבֵין יְמֵי חוֹל, כִּי יִתְעוּ בֶּחֳדָשִׁים וּבַשַׁבָּתוֹת וּבְמוֹעֲדִים וּבִשְׁנוֹת הַיּוֹבֵל:

נח

לָכֵן הִנְנִי מְצַוְּךָ וּמֵעִיד בָּךְ, לְמַעַן תָּעִיד־בָּם:

נט

כִּי אַחֲרֵי מוֹתְךָ יַשְׁחִיתוּ בָנֶיךָ אֶת־הַדָּבָר, לְמַעַן יִסְפְּרוּ בַּשָׁנָה רַק שְׁלֹשׁ־מֵאוֹת יוֹם וְשִׁשִׁים יוֹם וְאַרְבָּעָה יָמִים:

ס

וְעַל־כֵּן יִתְעוּ בְּרֹאשׁ הַחֹדֶשׁ וּבַשַּׁבָּת וּבָחָג וּבַמּוֹעֵד, וְאָכְלוּ תָּמִיד אֶת־הַדָּם בַּבָּשָׂר: