חסדי
לקט פסוקים שנקרא בקהילות תימן לפני קריאת המגילה מתוך קלף מיוחד
ז חַסְדֵי יְהוָה אַזְכִּיר תְּהִלֹּת יְהוָה כְּעַל כֹּל אֲשֶׁר גְּמָלָנוּ יְהוָה וְרַב טוּב לְבֵית יִשְׂרָאֵל אֲשֶׁר גְּמָלָם כְּרַחֲמָיו וּכְרֹב חֲסָדָיו.
ח וַיֹּאמֶר אַךְ עַמִּי הֵמָּה בָּנִים לֹא יְשַׁקֵּרוּ וַיְהִי לָהֶם לְמוֹשִׁיעַ.
ט בְּכָל צָרָתָם לא [לוֹ] צָר וּמַלְאַךְ פָּנָיו הוֹשִׁיעָם בְּאַהֲבָתוֹ וּבְחֶמְלָתוֹ הוּא גְאָלָם וַיְנַטְּלֵם וַיְנַשְּׂאֵם כָּל יְמֵי עוֹלָם.
(ישעיהו סג, ז-ט)
חַסְדֵי יְהוָה כִּי לֹא תָמְנוּ כִּי לֹא כָלוּ רַחֲמָיו.
(איכה ג, כב)
וּבְמַלְכוּת אֲחַשְׁוֵרוֹשׁ בִּתְחִלַּת מַלְכוּתוֹ כָּתְבוּ שִׂטְנָה עַל יֹשְׁבֵי יְהוּדָה וִירוּשָׁלָ͏ִם.
(עזרא ד, ו)
זֶרַע עֲמָלֵק הָרָשָע חָשַב עַל הַיְּהוּדִים לְאַבְּדָם וְהִפִּיל פּוּר הוּא הַגּוֹרָל לְהֻמָּם וּלְאַבְּדָם:
רָאָה אֱלֹהִים אֵת אֲשֶׁר זָמַם וַיֵּרַע בְּעֵינָיו:
הָפַך עָלָיו אֶת גּוֹרָלוֹ הֵפֵר עֲצָתוֹ וַיָּשֶב לוֹ גְּמוּלוֹ בְּרֹאשׁוֹ:
הִצִּיל עַמּוֹ מִיַּד אוֹיְבֵיהֶם מִּכַּף רְשָׁעִים פָּדָה אוֹתָם:
לֹא הִנִּיחַ אָדָם לְעָשְׁקָם וַיּוֹכַח עֲלֵיהֶם מְלָכִים.
(תהלים קה, יד)
כִּי לֹא יִטֹּשׁ יְהוָה אֶת עַמּוֹ בַּעֲבוּר שְׁמוֹ הַגָּדוֹל כִּי הוֹאִיל יְהוָה לַעֲשׂוֹת אֶתְכֶם לוֹ לְעָם.
(שמואל א יב, כב)
ח אֵיךְ אֶתֶּנְךָ אֶפְרַיִם אֲמַגֶּנְךָ יִשְׂרָאֵל אֵיךְ אֶתֶּנְךָ כְאַדְמָה אֲשִׂימְךָ כִּצְבֹאיִם נֶהְפַּךְ עָלַי לִבִּי יַחַד נִכְמְרוּ נִחוּמָי.
ט לֹא אֶעֱשֶׂה חֲרוֹן אַפִּי לֹא אָשׁוּב לְשַׁחֵת אֶפְרָיִם כִּי אֵל אָנֹכִי וְלֹא אִישׁ בְּקִרְבְּךָ קָדוֹשׁ וְלֹא אָבוֹא בְּעִיר.
(הושע יא, ח-ט)
הִנֵּה עֵינֵי אֲדֹנָי יְהוִה בַּמַּמְלָכָה הַחַטָּאָה וְהִשְׁמַדְתִּי אֹתָהּ מֵעַל פְּנֵי הָאֲדָמָה אֶפֶס כִּי לֹא הַשְׁמֵיד אַשְׁמִיד אֶת בֵּית יַעֲקֹב נְאֻם יְהוָה.
(עמוס ט, ח)
כְּרַחֵם אָב עַל בָּנִים רִחַם יְהוָה עַל יְרֵאָיו.
(תהלים קג, יג)
גָּבְרוּ חֲסָדָיו עָלֵינוּ וְלֹא כָלוּ רַחֲמָיו מִמֶּנּוּ:
זָכַר בְּרִיתוֹ אִתָּנוּ עַל יַד צִיר נֶאֱמָן הִבְטִיחָנוּ כַּכָּתוּב עַל יְדֵי מֹשֶׁה נְבִיאֵנוּ:
וְאַף גַּם זֹאת בִּהְיוֹתָם בְּאֶרֶץ אֹיְבֵיהֶם לֹא מְאַסְתִּים וְלֹא גְעַלְתִּים לְכַלֹּתָם לְהָפֵר בְּרִיתִי אִתָּם כִּי אֲנִי יְהוָה אֱלֹהֵיהֶם.
(ויקרא כו, מד)
לְעוֹלָם אֶזְכּוֹר לָהֶם חַסְדִּי וּבְרִיתִי נֶאֱמֶנֶת לָהֶם וְלֹא אֲשַׁקֵּר בֶּאֱמוּנָתִי: