תרגום אונקלוס (דפוס)/ספר בראשית/ב
(א) וְאִשְׁתַּכְלַלוּ שְׁמַיָּא וְאַרְעָא וְכָל חֵילֵיהוֹן׃
(ב) וְשֵׁיצִי יְיָ בְּיוֹמָא שְׁבִיעָאָה עִיבִידְתֵּיהּ [נ"א: עֲבִידְתֵּיהּ, וכן בסמוך] דִּי עֲבָד וְנַח בְּיוֹמָא שְׁבִיעָאָה מִכָּל עִיבִידְתֵּיהּ דִּי עֲבָד׃
(ג) וּבָרֵךְ יְיָ יַת יוֹמָא שְׁבִיעָאָה וְקַדֵּישׁ יָתֵיהּ אֲרֵי בֵּיהּ נָח מִכָּל עִיבִידְתֵּיהּ דִּי בְרָא יְיָ לְמֶעְבָּד׃
(ד) אִלֵּין תּוּלְדַת שְׁמַיָּא וְאַרְעָא כַּד אִתְבְּרִיאוּ בְּיוֹמָא דִּי עֲבַד יְיָ אֱלֹהִים אַרְעָא וּשְׁמַיָּא׃
(ה) וְכֹל אִילָנֵי חַקְלָא עַד לָא הֲווֹ בְּאַרְעָא וְכָל עִשְׂבָּא דְּחַקְלָא עַד לָא צְמָח אֲרֵי לָא אָחֵית יְיָ אֱלֹהִים מִטְרָא עַל אַרְעָא וְאֵינַשׁ לַיִת [נ"א: לֵית] לְמִפְלַח יַת אֲדַמְתָּא׃
(ו) וַעֲנָנָא הֲוָה סָלֵיק מִן אַרְעָא וּמַשְׁקֵי יַת כָּל אַפֵּי אֲדַמְתָּא׃
(ז) וּבְרָא יְיָ אֱלֹהִים יַת אָדָם עַפְרָא מִן אַרְעָא [נ"א: אַדְמְתָא] וּנְפַח בְּאַפּוֹהִי נִשְׁמְתָא דְחָיֵי [נ"א דְּחַיֵּי] וַהֲוַת בְּאָדָם לְרוּחַ מְמַלְּלָא׃
(ח) וּנְצַב [נ"א וּנְצִב] יְיָ אֱלֹהִים גִּנְּתָא בְּעֵדֶן מִלְּקַדְמִין וְאַשְׁרֵי תַמָּן יַת אָדָם דִּי בְרָא׃
(ט) וְאַצְמַח יְיָ אֱלֹהִים מִן אַרְעָא כָּל אִילַן דִּמְרַגַּג לְמִחְזֵי וְטַב לְמֵיכָל וְאִילַן חַיָּיָּא [נ"א דְּחַיֵּי] בִּמְצִיעוּת גִּנְּתָא וְאִילַן דְּאָכְלֵי פֵּירוֹהִי חָכְמִין בֵּין טַב לְבִישׁ׃
(י) וְנַהֲרָא הֲוָה נָפֵיק מֵעֵדֶן לְאַשְׁקָאָה יַת גִּנְּתָא וּמִתַּמָּן מִתְפָּרַשׁ וְהָוֵי לְאַרְבְּעָה רֵישֵׁי נַהֲרִין׃
(יא) שׁוּם חָד פִּישׁוֹן הוּא מַקֵּיף יַת כָּל אֲרַע חֲוִילָה דִּי תַמָּן דַּהֲבָא׃
(יב) וְדַהֲבָא דְּאַרְעָא הַהִיא טָב תַּמָּן בְּדוּלְחָא וְאַבְנֵי בוּרְלָא׃
(יג) וְשׁוּם נַהְרָא תּנְיָנָא גִּיחוֹן הוּא מַקֵּיף יַת כָּל אֲרַע כּוּשׁ׃
(יד) וְשׁוּם נַהֲרָא תְלִיתָאָה דִּגְלַת הוּא מְהַלֵּךְ לְמַדִּינְחָא דְאַתּוּר וְנַהְרָא רְבִיעָאָה הוּא פְרָת׃
(טו) וּדְבַר יְיָ אֱלֹהִים יַת אָדָם וְאַשְׁרְיֵיהּ בְּגִנְּתָא דְּעֵדֶן לְמִפְלְחָהּ וּלְמִטְּרָהּ׃
(טז) וּפַקֵּיד יְיָ אֱלֹהִים עַל אָדָם לְמֵימָר מִכָּל אִילַן גִּנְּתָא מֵיכַל תֵּיכוּל׃
(יז) וּמֵאִילַן דְּאָכְלֵי [נ"א דְּאָכְלִין] פֵּירוֹהִי חָכְמִין בֵּין טָב לְבִישׁ לָא תֵיכוּל מִנֵּיהּ אֲרֵי בְּיוֹמָא דְּתֵיכוּל מִנֵּיהּ מֵימַת תְּמוּת׃
(יח) וַאֲמַר יְיָ אֱלֹהִים לָא תָקֵין דִּיְהֱוֵי אָדָם בִּלְחוֹדוֹהִי אַעֲבֵּיד לֵיהּ סְמַךְ כְּקִבְלֵיהּ׃
(יט) וּבְרָא יְיָ אֱלֹהִים מִן אַרְעָא כָּל חַיַּת [נ"א חֵוַת] בָּרָא וְיָת כָּל עוֹפָא דִּשְׁמַיָּא וְאַיְיתֵי לְוַת אָדָם לְמֶחֱזֵי מָא יִקְרֵי לְהוֹן [נ"א לֵיהּ] וְכֹל דִּי הֲוָה קָרֵי לֵיהּ אָדָם נַפְשָׁא חַיְתָא הוּא שְׁמֵיהּ׃
(כ) וּקְרָא אָדָם שְׁמָהָן לְכָל בְּעִירָא וּלְעוֹפָא דִשְׁמַיָּא וּלְכֹל חַיַּת [נ"א חֵוַת] בָּרָא וּלְאָדָם לָא אַשְׁכַּח סְמַךְ כְּקִבְלֵיהּ׃
(כא) וּרְמָא יְיָ אֱלֹהִים שִנְּתָא עַל אָדָם וּדְמוּךְ וּנְסֵיב חֲדָא מֵעִלְעוֹהִי וּמַלִּי בִסְרָא תְּחוֹתָהּ׃
(כב) וּבְנָא יְיָ אֱלֹהִים יַת עִלְעָא דִּי נְסִיב מִן אָדָם לְאִתְּתָא וְאֵיתָהּ לְוַת אָדָם׃
(כג) וַאֲמַר אָדָם הֲדָא זִמְנָא גַּרְמָא מִגַּרְמַי וּבִסְרָא מִבִּסְרִי לְדָא יִתְקְרֵי אִתְּתָא אֲרֵי מִבַּעְלָהּ נְסִיבַת דָא׃
(כד) עַל כֵּן יִשְׁבּוֹק גְּבַר בֵּית מִשְׁכְּבֵי אֲבוּהִי וְאִמֵּיהּ וְיִדְבַּק בְּאִתְּתֵיהּ וִיהוֹן לְבִסְרָא חָד׃
(כה) וַהֲווֹ תַרְוֵיהוֹן עַרְטִילָאִין אָדָם וְאִתְּתֵיהּ וְלָא מִתְכַּלְמִין׃