ספר הישר - מקרא ואגדה/דברים

~267~

בעת ההיא אמר ה׳ אל משה הן קרבו ימיך למות, קח לך את יהושע בן נון משרתך והתיצבו באוהל מועד ואצונו, ויעש משה כן. וירא ה׳ באוהל בעמוד ענן, ויעמוד עמוד הענן על פתח האוהל. ויצו ה׳ את יהושע בן נון ויאמר לו, חזק ואמץ כי אתה תביא את בני ישראל אל הארץ אשר נשבעתי להם ואנוכי אהיה עמך. ויאמר משה אל יהושע, חזק ואמץ כי אתה תנחיל את הארץ אל בני ישראל וה׳ יהיה עמך לא ירפך ולא יעזבך אל תירא ואל תחת. ויקרא משה אל כל ישראל ויאמר להם, אתם ראיתם את כל הטובה אשר עשה לכם ה׳ אלוקיכם במדבר. ועתה שמרו לכם את כל דברי התורה הזאת ולכו בדרך ה׳ אלוקיכם, אל תסורו מכל הדרך אשר ציוה ה׳ אתכם ימין ושמאל. וילמד משה את בני ישראל חוקים ומשפטים ותורות לעשות בארץ, כאשר ציוהו ה׳. וילמדם את דרך ה׳ ואת תורותיו, הלא הם כתובים על ספר תורת האלוקים אשר נתן אל בני ישראל ביד משה. ויכל משה לצוות את בני ישראל, ויאמר ה׳ אליו לאמור. עלה אל הר העברים ומות שם והאסף אל עמך, כאשר נאסף אהרון אחיך. ויעל משה כאשר ציוהו ה׳ וימת שם בארץ מואב על פי ה׳, בשנת הארבעים לצאת בני ישראל מארץ מצרים. ויבכו בני ישראל את משה בערבות מואב שלושים יום, ויתמו ימי בכי אבל משה.