יוסיפון/קינת יוסף/טעמים

מתוך ויקיטקסט, מאגר הטקסטים החופשי
קפיצה לניווט קפיצה לחיפוש
  • קינת יוסף, מתוך ספר יוסיפון, מהדורת למברג 1862

וַיְקוֹנֵ֨ן יוֹסֵ֜ף הַקִּינָ֥ה הַזֹּ֛את עַֽל־יְרוּשָׁלַ‍ִ֖ם וַיֹּאמַֽר: אֵיכָה֙ הָעִ֣יר הַגְּבוֹהָ֔ה הָיְתָ֥ה הַיּ֛וֹם בַּעֲוֹנ֥וֹת יוֹשְׁבֶ֖יהָ שְׁפָלָ֑ה, וְתַ֡חַת אֲשֶׁר֩ הָיְתָ֨ה מָנ֜וֹחַ לְאַנְשֵׁ֣י אֱמוּנָ֗ה יִמְשְׁל֨וּ בָ֤הּ הַיּוֹם֙ מַרְגִּ֣יזֵי אֵ֔ל, וַיַּזְנ֤וּהָ זוֹנִים֙ מֵאַחֲרֵ֣י יְ״יָ֔, וַֽיַּשְׁמִיד֖וּהָ רֽוֹצְחִֽים: וּ֠בִמְק֠וֹם א֞וֹר הַשְּׁכִינָ֣ה הָעֶלְיוֹנָ֗ה יֵ֤שׁ הַיּוֹם֙ שְׁנִינָ֔ה, וְגַ֕ם דַּ֥ם חֲלָלִ֖ים פִּגְרֵ֣י מֵתִ֑ים, וּבִמְקוֹם֙ הַשִּׂמְחָ֔ה יֵ֥שׁ הַיּ֛וֹם תּוּגָ֖ה וַֽאֲנָחָֽה: וּבִמְק֥וֹם הַשָּׂשׂ֖וֹן יָג֑וֹן, וּבִמְק֤וֹם הָרִנּוּן֙ בְּכִנּ֣וֹר וָנֵ֔בֶל שֶׁ֥בֶר לֵ֖ב וָאֵֽבֶל: וּבִמְק֗וֹם אֲשֶׁר֩ הָי֨וּ הַכֹּֽהֲנִ֤ים עוֹבְדִים֙ עֲבוֹדַ֣ת יְ״יָ֔ וְזֽוֹבְחִ֥ים אֵלָ֖יו זֶ֑בַח, הַפָּרִיצִ֣ים׀ הַיּ֔וֹם מֵאַנְשֵׁ֥י חֶ֛סֶד וְאַנְשֵׁ֥י אֱמוּנָ֖ה זוֹבְחִ֥ים זָֽבַח: וְתַ֗חַת אֲשֶׁ֤ר הָֽיְתָה֙ עִ֣יר מָע֔וֹן לַֽחֲכָמִ֖ים וְלַפִּקְחִ֑ים, הִ֚יא הַיּ֔וֹם מָע֥וֹן לִרְשָׁעִ֖ים וְרֽוֹצְחִֽים: יְֽ״יָ֖ אֱלֹהֵ֣י יִשְׂרָאֵ֑ל; וַהֲלֹ֣א מִלְּפָנִ֡ים מַלְאֲכֵ֣י מָר֡וֹם הָיוּ֩ יוֹרְדִ֨ים בָּאָ֜רֶץ לְהִלָּחֵ֣ם׀ אֵ֣ת מִֽלְחֲמוֹתֶ֗יךָ, וְגַ֣ם גַּלֵּ֣י הַ֠יָּ֠ם הָי֨וּ רוֹדְפִ֜ים וְנִלְחֲמ֤וּ מֵאָז֙ בְּר֣וֹדְפֶ֔יךָ, וְהָאָ֕רֶץ בָּלְעָ֖ה אֶת־מְֽנַאֲצֶֽיךָ: וְהָר֗וּחַ הִכְחִיד֙ אֶת־הַקָּמִ֣ים עָלֶ֔יךָ, וְגַ֛ם רַעֲמֵ֥י הַשָּׁמַ֖יִם הִשְׁחִ֣יתוּ צָרֶ֑יךָ, וְכֽוֹכְבֵיהֶם֙ מִמְּסִ֣לּוֹתָ֔ם נִלְחֲמ֖וּ בְּאֽוֹיְבֶֽיךָ: וְעַתָּה֙ מָ֣ה רָאִ֔יתָ בְּהַסְתִּ֥יר פָּנֶ֖יךָ מִמֶּ֑נּוּ, וּבְיַד־מִ֥י פָּקַ֖דְתָּ צֹ֥אן מַרְעִיתֶֽךָ:

הַֽבֶּט־נָא֮ יְ״יָ֣ אֱלֹהֵ֒ינוּ֒, וּרְאֵ֨ה אֶת־עַמְּךָ֜ וְאֵ֣ת נַֽחֲלָתֶ֗ךָ אֲשֶׁ֨ר הוֹצֵ֤אתָֽ מִמִּצְרַ֙יִם֙ בְּכֹ֤חַֽ גָּדוֹל֙ וּבְיָ֣ד חֲזָקָ֔ה וּבְאוֹת֖וֹת וּמֽוֹפְתִ֑ים, וַתְּנַהֲלֵ֗ם עַ֚ד הַיּ֣וֹם הַזֶּ֔ה בְּיֹ֖שֶׁר אֱמוּנָתֶֽךָ: וְרַחֵ֥ם עֲלֵיהֶ֖ם בְּחַסְדֶּ֑ךָ, וְאַל־תַּ֥ט בְּאַ֖ף אֶת־עֲבָדֶֽיךָ:    עֽוּרָה־נָא֮ מֹשֶׁ֣ה בֶן־עַמְרָם֒, וּֽרְאֵה֙ אֶת־עַמֶּ֔ךָ וְאֶת־עֵ֣דֶר הַצֹּ֔אן אֲשֶׁר־רָעִ֥יתָ כָּל־יָמֶ֖יךָ בְּחָכְמָתֶ֑ךָ, אֵיכָ֨ה טוֹרְפִ֥ים בּ֛וֹ זְאֵבִ֖ים וַאֲרָיֽוֹת: וְאֵ֞יךְ נֶהֶפְכ֧וּ יִשְׂרָאֵ֛ל לְאֽוֹיְבִ֖ים לְנַפְשׁ֣וֹתֵיהֶ֑ם, וּמְהָ֥רְסֵיהֶ֛ם וּמַחֲרִ֥יבֵיהֶ֖ם מֵהֶ֥ם יָצָֽאוּ: הַבֶּט־נָא֮ בְּעַ֣ם יְ״יָ֒, שֶׁבִּגְלָלָ֗ם הֲרִימ֨וֹתָה אֶת־מַטְּךָ֤ עַל־הַיָּם֙ וַתַּ֤ךְ אוֹתוֹ֙ וַתְּבַקְּעֵ֔הוּ, וַֽתְּשִׂימֵ֖הוּ לֶחָרָבָ֑ה, וַיַּֽעַבְרוּ־ב֤וֹ יִשְׂרָאֵל֙ בַּיַּבָּשָׁ֔ה לָנ֖וּס מִפְּנֵ֥י צָרֵיהֶֽם: וּזְכ֗וֹר אֵ֣ת אֲשֶׁר־שָׁאַ֤לְתָּ בִּתְחִנָּֽתְךָ֙ בְּעֵ֣ת רַעֲבוֹנָ֔ם, לְהַטְרִיפָ֖ם לֶ֣חֶם מִן־הַשָּׁמָ֑יִם; וּבְעֵ֨ת צִמְאוֹנָ֜ם בְּהִתְעַטֵּ֣ף נַפְשָׁ֗ם הוֹצֵ֥אתָ לָהֶם֙ מַ֔יִם, מִצּ֖וּר הַֽחַלָּמִֽישׁ: ע֣וּרָה נָ֗א אַהֲרֹן֮ קְד֣וֹשׁ יְ״יָ֒, אֲשֶׁ֣ר עָמַ֗דְתָּ בֵּ֤ין הַמֵּתִים֙ וּבֵ֣ין הַחַיִּ֔ים, וְעָצַ֥רְתָּֽ הַֽמַּגֵּפָ֖ה מֵעַ֣ל יִשְׂרָאֵ֑ל, וְעָבַ֜רְתָּ לִפְנֵ֣י׀ הָעָ֣ם הַזֶּ֗ה וּפָגַ֙עְתָּ֙ בַּמַּשְׁחִ֔ית, לְבִלְתִּ֨י תֵּ֥ת לִקְר֛וֹב אֶל־הַחַיִּ֖ים הַבִּלְתִּ֥י חַטָּאִֽים:    ק֣וּם נָא֮ מֵעֲפָֽרְךָ֒, פִּ֣ינְחָ֔ס הַמְּקַנֵּ֕א לִכְב֖וֹד יְ״יָ֣ אֱלֹהֵֽי־יִשְׂרָאֵ֑ל, וּבֹ֞א וּדְק֤וֹר בַּחֲרֽוֹנְךָ֙ בַּפָּֽרִיצִ֣ים הָאֵ֔לֶּה הַֽמַּשְׁחִיתִ֛ים אֶת־עַ֥ם יְ״יָ֖ וְאֶת־כֹּֽהֲנָֽיו:    הָקִ֣יצָה נָא֮ יְהוֹשֻׁעַ֒, אֲשֶׁ֨ר הָמַ֜מְתָּ אֶת־חוֹמַ֣ת יְרִיח֗וֹ בְּקוֹלוֹת֙ תְּרוּעַ֣ת שֽׁוֹפְרוֹתֶ֔יךָ עַל־יְדֵ֛י כֹּהֲנֵ֥י יְ״יָ֖ הַמְקֻדָּשִׁ֑ים; בֹּא־נָ֞א וּרְאֵ֣ה אֶת־הָעָ֗ם שֶֽׁהוֹרַ֤שְׁתָּ מִלְּפָנָיו֙ גּוֹיִ֤ם רַבִּים֙ וּמְלָכִ֣ים עֲצוּמִ֔ים, וְעַתָּ֗ה אֵ֤לֶּה אֶת־אֵ֙לֶּה֙ הֵ֣ם מַשְׁחִיתִ֔ים, וַיִּתְּנוּ־יָ֣ד לְג֔וֹי לִמְשׁוֹל֙ בָּאָ֣רֶץ הַקְּדוֹשָׁ֔ה שֶׁהִנְחַ֖לְתָּ לְיִשְׂרָאֵֽל:    וְאַתָּ֣ה׀ דָּוִ֣ד הַמֶּ֗לֶךְ, וּמַה־לְּךָ֮ נִרְדָּם֒, ע֚וּרָה וְהָקִ֔יצָה וּבֹ֗א בְּר֨וֹב הֶמְיַ֤ת נְבָלֶ֙יךָ֙ וְכִנּוֹרֶ֔יךָ לְשׁוֹרֵ֖ר בִּזְמִיר֣וֹת הַקֹּ֑דֶשׁ, וּדְר֣וֹשׁ נָ֗א אֶת־דִּבְרֵי֙ נְעִ֣ימוֹתֶ֔יךָ אֲשֶׁ֣ר שִׁחֲת֗וּ מִפִּ֛י הָעָ֥ם הַזֶּ֖ה מֵרֹ֥ב רָעָתָֽם: וּרְאֵה֙ אֶת־שָׂ֣רֵיהֶ֔ם אֲשֶׁ֨ר נֶהְפְּכ֥וּ לָהֶ֛ם לְֽמַשְׁחִיתִ֖ים וְֽאוֹיְבִ֑ים, וְלֹֽא־עָשׂ֨וּ׀ כָּמ֜וֹךָ דָּוִ֗ד, אֲשֶׁ֨ר נָתַ֤תָּ אֶֽת־נַפְשְׁךָ֙ תַּ֣חַת נַפְשָׁ֔ם, וְאָמַ֗רְתָּ תְּֽהִי־נָ֨א יָדְךָ֥׀ בִּי֙ וּבְבֵ֣ית אָבִ֔י, וְעַ֨ל־עַמְּךָ֔ לֹ֥א תִפְנֶ֖ה לְהַשְׁחִֽית:    אֱלִישָׁ֓ע׀ לָ֚מָּה תִּישַׁ֔ן, ע֣וּרָה נָּ֔א וּרְאֵ֖ה מַֽה־תַּעֲשֶׂ֑ה, אִם־תּוּכַ֗ל לְהַצִּ֤יל שְׁאֵרִית֙ מִיִּשְׂרָאֵ֔ל וּלְהַחֲי֥וֹת לָהֶ֖ם לִפְלֵיטָֽה: וַהֲלֹ֧א אַתָּ֣ה ה֗וּא אֲשֶׁ֨ר מָשַׁ֥כְתָּ בִּתְפִלָּתְךָ֮ אֶת־חֵיל֮ מַחֲנֵ֣ה אֲרָם֒, וַתְּבִיאֵ֜הוּ אֶל־עִ֤יר מִבְצָר֙ כִּרְצ֣וֹנְךָ֔ וַתִּ֥מְשָׁל בּ֛וֹ בְּלֹא־חֶ֥רֶב וּמִלְחָמָ֖ה וַתַּכְנִיעֵ֑הוּ, וַתַּכֵּ֣ם בַּסַּנְוֵרִ֗ים וַתַּחְשִׁיךְ֙ אֶת־א֣וֹר עֵינֵיהֶ֔ם וַֽתַּהֲפֹ֧ךְ אֶת־אֵיבָתָ֛ם עַל־יִשְׂרָאֵ֖ל לְֽאַהֲבָֽה: וְאַֽתָּה־ה֗וּא אֲשֶׁ֨ר נִלְחַ֤מְתָּ בִּתְפִלָּֽתְךָ֙ עַ֚ל מַחֲנֵ֣ה אֲרָ֔ם בְּק֣וֹל רֶ֔כֶב וְק֥וֹל ס֖וּס וּפָֽרָשִׁ֑ים, וַיָּ֗נָס מַחֲנֵ֥ה אֲרָם֙ וּגְדוּדָ֔יו מִפְּנֵי֙ שִׂ֣יחַ תְּפִֽלָּתְךָ֔ אֲשֶׁ֥ר שָׁפַ֖כְתָּ בְּעַ֥ד עַמֶּֽךָ:

וְעַתָּה֙ רוֹעֵ֣י יִשְׂרָאֵ֔ל הַאֲזִ֣ינוּ אֵלַ֔י וְהִֽתְקַדְּשׁ֖וּ כֻּלְּכֶ֑ם, וְשִׁמְעוּ֙ אֶת־דְּבָרַ֔י אֲשֶׁ֧ר אֲדַבֵּ֦ר בְּאָזְנֵיכֶ֖ם הַיּ֥וֹם הַזֶּֽה: אִמְרוּ־לִ֓י, אַיֵּ֞ה תְּפִלַּתְכֶ֧ם וּתְחִנַּתְכֶ֛ם וְשִׂיחֲכֶ֖ם הַטּ֑וֹב, אֲשֶׁ֨ר שְׁפַכְתֶּ֜ם בְּעַ֣ד׀ עַ֣ם יִשְׂרָאֵ֗ל לְהָשִׁ֨יב מֵעֲלֵיהֶ֜ם עֶבְרָ֤ה וָזַ֙עַם֙ וְצָרָ֔ה וַחֲרוֹן־אַ֕ף וּמִשְׁלַ֖חַת מַלְאֲכֵ֥י רָעִֽים: אֵ֣יךְ׀ לֹ֣א תַבִּ֗יטוּ אֲשֶׁ֨ר נֶהְפַּ֜ךְ מְע֤וֹן הַקֹּ֙דֶשׁ֙ לְמִשְׁטַ֣ח דָּמִ֔ים, וְחַלְלֵ֥י כֹּֽהֲנֵי־הַקֹּ֖דֶשׁ נוֹפְלִ֣ים בְּתוֹכ֑וֹ, וִירוּשָׁלַ֨יִם הַקְּדוֹשָׁ֜ה נֶהֶפְכָ֣ה לְנָכְרִיָּ֗ה כְּ֠אִלּ֠וּ לֹ֨א הָיָ֤ה שֵׁם־יְ״יָ֙ בָּ֔הּ וּבְהֵיכַ֤ל הַקֹּ֙דֶשׁ֙ אֲשֶׁר־בָּ֔הּ לֹ֥א שָׁכְנָ֖ה הַשְּׁכִינָֽה: וְנֶהְפַּ֣ךְ׀ הֵ֣יכַל קֹ֗דֶשׁ לִֽהְיוֹת֙ מְע֣וֹן רֽוֹצְחִ֔ים וּנְוֵה֙ פָּרִיצִ֔ים וּמִשְׁכַּ֖ן אַכְזָרִ֑ים, וְכֹ֨ל הַנִּמְלָטִ֥ים אֵלָ֛יו לִֽחְיוֹת־בּ֖וֹ נֶהֱרָגִ֥ים בְּתוֹכֽוֹ: אֲשֶׁ֣ר הָרְגוּ֩ הַפָּרִיצִ֨ים בְּתוֹכ֜וֹ אֵ֧ת עֲנָנִ֣י הַכֹּהֵ֗ן וְֽאֶת־יְהוֹשֻׁ֙עַ֙ הַכֹּהֵ֔ן, שְׁנֵ֗י שָׂרֵי֙ הַכֹּ֣הֲנִ֔ים אֲשֶׁר־הֵ֨ם הָי֜וּ שָׂרֵ֥י הַקֹּ֛דֶשׁ וְנִכְבָּדִ֖ים בְּעַ֣ם יְ״יָ֑, וּ֠מֵאָ֠ז מְלָכִ֤ים וּלְאֻמִּים֙ פְּנֵיהֶ֣ם חִלּ֔וּ לִמְצ֥וֹא חֵ֖ן בְּעֵינֵיהֶֽם: וְעַתָּ֛ה הִפִּ֥ילוּ פִגְרֵיהֶ֖ם בְּת֣וֹךְ הַהֵיכָ֑ל; וְשָׂרֵ֣י יְרוּשָׁלַ֩יִם֩ וְזִקְנֵ֨י יְהוּדָ֜ה וְחַכְמֵ֣י יִשְׂרָאֵ֗ל, אֲ֠שֶׁ֠ר מְלָכִ֤ים וּלְאֻמִּים֙ הָיוּ֙ דּוֹרְשִׁ֣ים שְׁלוֹמָ֔ם, נָפְל֤וּ פִגְרֵיהֶם֙ מֵתִ֔ים בְּת֖וֹךְ יְרוּשָׁלַ֥יִם עִֽיר־הַקֹּֽדֶשׁ: וַיִּהְי֣וּ לְֽמַאֲכָ֡ל לְע֨וֹף הַשָּׁמַ֜יִם לְבֶהֱמַ֧ת וּלְחַיַּ֣ת הָאָ֗רֶץ וּמָז֛וֹן לִכְלָבִ֥ים וּלְעֽוֹרְבִ֖ים וְאֵ֥ין קוֹבֵֽר: וְלֹ֤א נֶֽהֶרְגוּ֙ וְלֹ֣א נָפְל֔וּ עַ֖ל רֹ֣עַ מַֽעֲשֵׂיהֶ֑ם, כִּֽי־אִם֙ עַ֣ל הֽוֹכִיחָ֔ם אֶת־בְּנֵ֥י יִשְׂרָאֵ֖ל הַֽחַטָּאִֽים:

אֵיךְ֩ נָפְל֨וּ בְקִרְבֵּ֜ךְ יְרוּשָׁלַ֗יִם, עִ֤יר הַקֹּ֙דֶשׁ֙ הַֽמְהֻלָּלָ֗ה בְּכֹל֙ פִּנּ֣וֹת הָאָ֔רֶץ, הַצַּדִּיקִ֖ים וְהַֽחֲסִידִ֑ים; וַֽיִּגְבְּר֡וּ הָֽרְשָׁעִ֣ים וְ֠הַפָּרִיצִ֠ים אַנְשֵׁ֨י הַבְּלִיַּ֜עַל וְאַנְשֵׁ֤י הַדָּמִים֙ עֲלֵיהֶ֔ם, וַיָּבִ֣יאוּ עָלַ֔יִךְ אֵ֖ת כָּל־הָֽרָע֥וֹת הָאֵֽלֶּה: וְאֵ֣יךְ בְּתוֹכָ֗ם נָפְלוּ֮ כֹּהֲנֵ֣י יְ״יָ֮ וּנְבִיאָיו֒, וְלִפְנֵי֙ הֵיכַ֣ל הַקֹּ֔דֶשׁ, אֲשֶׁר֩ בְּתוֹכָ֨הּ נִשְׁחַ֧ט זְכַרְיָ֛ה הַנָּבִ֥יא הַצַּדִּ֖יק וְהֶֽחָסִ֑יד, וַיִּשְׁכַּ֣ב בְּֽלֹא־קֶ֗בֶר וְלֹ֨א כִסְּתָ֤ה הָאָ֙רֶץ֙ אֶֽת־דָּמ֔וֹ, אֲבָ֨ל עֲדַ֜יִן ה֥וּא עוֹלֶ֛ה וּֽמְצַפְצֵ֖ף בְּתוֹכֵֽךְ: וְאֵיךְ֙ כִּסְּתָ֣ה אַרְצֵ֔ךְ דַּ֥ם עֲנָנִ֖י הַכֹּהֵ֣ן הַגָּד֑וֹל, וְדַ֣ם יְהוֹשֻׁ֔עַ הַשַּׂ֖ר בִּכְהֻנַּ֥ת הַקֹּֽדֶשׁ: כִּֽי־נֶהֶרְג֥וּ שְׁנֵיהֶ֖ם בְּת֣וֹךְ הֵיכָלֵ֑ךְ, כַּֽהֲרֹג֩ רֽוֹצְחִ֨ים וְאַכְזָרִ֜ים עַל־נִקְמַ֧ת דָּ֣ם הַשָּׁפ֗וּךְ אֲשֶׁ֨ר נִשְׁפְּכ֤וּ (בנקמתם)֯‏[1] דָּמָם֙ כְּשֶׁ֣טֶף מַ֔יִם, מִדְּמֵ֥י בַּֽחוּרַ֖יִךְ וְגִבּוֹרַֽיִךְ:

אֵ֗יךְ נֶהֶפְכ֛וּ לִבּ֥וֹת אֲנָשַׁ֖יִךְ וַיָּשׁ֣וּבוּ אָח֑וֹר, וְלֹ֥א יִשְׁמְע֖וּ לְתוֹכְח֥וֹת חָסִֽיד: אֲבָ֕ל הִנָּ֖ם כְּפִסְלֵ֣י מַסֵּכָ֑ה, אֲשֶׁ֛ר לֹא־יִרְא֥וּ וְלֹֽא־יִשְׁמְע֖וּ וְלֹא־יָבִֽינוּ: כִּ֣י כָל־הַחַיּ֡וֹת וְכֹל֩ צֶֽאֱצָאֵ֨י הָאָ֜רֶץ נִלְחָמִ֣ים בְּמִלְחֲמֽוֹתֵיהֶ֗ם נֶ֚גֶד הַקָּמִ֣ים עֲלֵיהֶ֔ם, לְמַ֗עַן אֲשֶׁ֤ר יִמָּנְעוּ֙ מֵחֶ֙רֶב֙ א֣וֹיְבֵיהֶ֔ם וּמִמַּכּ֖וֹת שׂ֣וֹנְאֵיהֶ֑ם, וּבָנַ֗יִךְ נֶהְפְּכ֤וּ בְּתוֹכָן֙ לְֽאוֹיְבִ֔ים, לִנְפֹּ֕ל אִ֖ישׁ בְּחֶ֥רֶב אָחִֽיו:

וְאַיֵּה֙ גְּא֣וֹן עֻזֵּ֔ךְ, אֲשֶׁ֨ר לֹ֤א הִטֵּית֙ אֶת־שִׁכְמֵ֔ךְ לִסְבֹּ֖ל אֶת־עֹ֣ל הַגּוֹיִ֑ם, וַ֠תִּגְדְּעִ֠י עַֽל־מִצְרַ֤יִם וּפְלִשְׁתִּים֙ וַאֲרָ֔ם, אַשּׁ֣וּר וְכַשְׂדִּ֔ים, וּפָרָ֖ס וּמָדָֽי: אַיֵּ֣ה׀ גְּבוּרַ֣ת הָאֵ֗ל, אֲשֶׁ֣ר נָתַן֮ לִבְנֵ֣י חַשְׁמֽוֹנָאִים֒, אֲשֶׁ֣ר גָּבְר֣וּ בְּתוֹכֵ֡ךְ בְּעַם֩׀ מְתֵ֨י מִסְפָּ֜ר עִם־חַ֤יִל עָצוּם֙, חֵ֣יל יָוָ֔ן, וַיַּשְׁמִ֜ידוּ אֶת־גִּבּוֹרֵ֣י בָּבֶ֗ל וַֽיְבַעֲרוּ֙ אֶת־חֵ֣יל פָּרָ֔ס, וַיַּשְׁמִ֕ידוּ אֵ֥ת קַמִּיסָ֖ארוֹס וְאֶת־אַֽנְטִיּ֑וֹכוּס, וַיִּרְדְּפ֗וּ אַחֲרֵי֙ גְּד֣וּדֵיהֶ֔ם וַ֨יַּכּוּ־בָ֔ם מַכָּ֥ה גְּדוֹלָ֖ה מְאֹֽד: וַֽיְמַלּאוּ֙ אֶת־הָאָ֔רֶץ מִפִּגְרֵ֖י חַֽלְלֵ֣י הַגּוֹיִ֑ם, כִּי־בָחֲר֨וּ מָ֜וֶת מֵחַיִּ֗ים, וְלֹ֤א שָׁמְעוּ֙ לַֽחַטָּאִ֔ים, וַיִּמְסְר֥וּ אֶת־נַפְשָׁ֖ם לָמֽוּת: וְלֹ֤א עַל־בְּנֵיהֶם֙ וְעַֽל־בְּנ֣וֹתֵיהֶ֔ם, כִּי־אִ֛ם עַֽל־מִקְדַּ֥שׁ יְ״יָ֖ וְעַ֣ל הֵיכָל֑וֹ, לְבִלְתִּ֣י הִטָּמֵ֗א בְּשִׁקּוּצֵי֙ הַגּוֹיִ֔ם וּֽבְגִלּוּלֵ֖י תּוֹעֲבֽוֹתֵיהֶֽם:

אַיֵּ֞ה מַטֵּ֤ה הָֽאֱלֹהִים֙ מַטֵּ֣ה הַקֹּ֔דֶשׁ, אֲשֶׁ֥ר פָּרַ֖ח בִּימֵ֣י שִׂמְחָתֵ֑ךְ, וְעַתָּ֗ה חָֽרְב֛וּ פִּרְחֵ֥י הַמַּטֶּ֖ה וַיִּיבַ֥שׁ הַמַּטֶּֽה: כִּ֣י חָֽרְב֞וּ מַטֵּ֤ה הָאֱמוּנָה֙ מִלִּבּ֣וֹת אֲנָשַׁ֔יִךְ, וְאָ֥פְסָ֛ה הַתּוֹרָ֥ה הַקְּדוֹשָׁ֖ה מֵהֶ֑ם, וּמִקְוֵ֗ה מֵ֚֚י רַחֲמֵ֣י הַשָּׁמַ֔יִם, לֹ֣א נוֹדַ֔ע לִשְׁאֹ֖ב אִ֥ישׁ מֵהֶֽם: הָאֲנָשִׁים֩ הַחֽוֹמְלִ֨ים בְּחֶמְלָ֤ה וּֽבְרַחֲמִים֙ עַל־רֵֽעֵיהֶ֣ם וַאֲחֵיהֶ֔ם, הֵ֥ן בַּחַיִּ֖ים הֵ֣ן בַּמָּ֑וֶת, אֵ֣יךְ נֶהֶפְכ֥וּ עַתָּ֛ה לְאַכְזָרִ֖ים לֹ֥א יְרַחֵֽמוּ: אַיֵּה֙ גֹּ֣דֶל חַסְדָּ֔ם אֲשֶׁ֨ר הָי֧וּ קוֹבְרִ֛ים מֵתֵיהֶ֖ם בְּכָב֑וֹד, וְעַתָּ֗ה חַֽלְלֵיהֶ֤ם וּמֵתֵיהֶם֙ כִּסּוּ֙ אֶת־פְּנֵ֣י הָאָ֔רֶץ, וְאֵ֥ין לָהֶ֖ם קוֹבְרִֽים: וְאֵ֥ין שָׁל֖וֹם לְק֣וֹבְרֵיהֶ֑ם, כִּי֩ יָב֨וֹאוּ אַחֲרֵיהֶ֜ם וְיַֽהַרְג֗וּם טֶ֚רֶם יִקְבְּר֣וּ אֶת־הַ֣הֲרוּגִ֔ים, וְיָמ֤וּתוּ גַּֽם־הֵם֙ בְּלֹ֣א קְבוּרָ֔ה, וְיִֽהְיוּ֙ מֻשְׁלָכִ֔ים לְדֹ֖מֶן עַל־פְּנֵ֥י הַשָּׂדֶֽה: וַֽיְהִי־חֹ֥ק כָּ֖ךְ כְּהַיּ֣וֹם הַזֶּ֑ה, כִּ֣י הָאָ֗ב לֹ֥א יִקְבֹּר֙ אֶת־בְּנ֔וֹ, וְהַבֵּ֖ן לֹֽא־יִקְבֹּ֥ר אֶת־אָבִֽיו: אָמְנָ֣ם הַפָּרִיצִ֗ים עָשׂ֨וּ מִשְׁמָר֤וֹת עַל־הַמֵּתִים֙ לְבִלְתִּ֣י הִקָּבֵ֔ר, וַאֲשֶׁ֥ר יֵלֵךְ֙ לִקְבֹּ֔ר יִפֹּ֣ל גַּם־ה֗וּא וְיָמ֛וּת עַל־פְּנֵ֥י הַשָּׂדֶ֖ה וְאֵ֣ין קוֹבֵ֑ר, כִּ֤י יַהַרְג֙וּהוּ֙ הַפָּרִיצִ֔ים הַחַטָּאִ֖ים בְּנַפְשׁוֹתָֽם:

וְהֵיכַ֨ל מִקְדַּ֤שׁ יְ״יָ֙ אֲשֶׁר־בָּ֔ךְ, עֵ֗קֶב אֲשֶׁ֨ר הָי֤וּ בְשָׂמָיו֙ מַרְעִיפִ֣ים מִמַּ֔עַל, וְרֵ֙יחַ֙ הַקְטָרָת֔וֹ הוֹלֵ֖ךְ לְמֵרָח֑וֹק, וּבֹ֗שֶׂם שֶׁ֚מֶן מֶרְקָח֔וֹ מֵפִ֖יחַ בְּכָל־הָאָֽרֶץ: אֵ֥יךְ עַתָּ֛ה נֶהְפְּכ֖וּ וַיִּבְאָ֑שׁ, וַתַּ֤עַל צַחֲנָתוֹ֙ וְעָלָ֣ה בָאְשׁ֔וֹ, מִנִּבְלוֹת֙ הַפְּגָרִ֔ים וּֽמִדְּמֵ֖י הַחֲלָלִֽים: וְאֵ֣יךְ רְחוֹבוֹתַ֩יִךְ֩ מָלְא֨וּ מְדֻקָּרִ֜ים וְחַ֣לְלֵי חֶ֗רֶב, וְחֻצּוֹתַ֙יִךְ֙ מָלְא֤וּ מֵתִים֙ וְחַלְלֵ֣י רָעָ֔ב, וְהַחַיִּים֙ הַנִּשְׁאָרִ֣ים בָּעִ֔יר נֶחְשָׁבִ֖ים כְּמֵתִ֑ים, כִּי־נָקְטָ֣ה נַפְשָׁ֔ם מֵרֵ֖יחַ נִבְל֥וֹת הַמֵּתִֽים: וְרַבִּ֣ים יָמ֔וּתוּ מֵהָרֵ֖יחַ הָעוֹלֶ֣ה מֵהֶ֑ם, וְרַבִּ֥ים יֶחֱל֖וּ עַד־לְאֵ֥ין מַרְפֵּֽא: ה֤וּא הַֽמַּאֲמָר֙ אֲשֶׁ֣ר אָמַ֣ר דָּוִ֔ד, מְשִׁ֙יחַ֙ אֱלֹהֵ֣י יַעֲקֹ֔ב וּנְעִ֖ים זְמִר֣וֹת יִשְׂרָאֵ֑ל, אֱלֹהִ֗ים בָּ֤אוּ גוֹיִם֙ בְּנַֽחֲלָתֶ֔ךָ, טִמְּא֖וּ אֶת־הֵיכַ֥ל קָדְשֶֽׁךָ: וְכִ֣י גוֹיִ֗ם טִפַּ֤חְתְּ וְרִבִּית֙ וְגִדַּ֣לְתְּ וְרוֹמַ֔מְתְּ, לִפְשֹׁ֥עַ בָּ֖ךְ וְלַחֲטֹ֑א, לְטַמֵּ֛א אֶת־הֵיכַ֥ל הַקֹּ֖דֶשׁ אֲשֶׁ֥ר בְּתוֹכֵֽךְ:

וּמִ֣י יִתֵּ֗ן וְהָיְתָ֛ה הָרָעָ֥ה הַזֹּ֖את מִיַּ֣ד הַגּוֹיִ֑ם, אֲשֶׁר֙ בְּרָעַ֣ת הַשּׂוֹנֵ֔א יִמְצָ֥א אִ֖ישׁ חֲצִ֥י נֶחָמָֽה: אֲבָ֖ל לְרָעַ֣ת הָאוֹהֵ֑ב לֹֽא־יִמְצָ֥א אִ֖ישׁ נֶחָמָֽה: כִּ֣י׀ בָּנַ֗יִךְ אֲשֶׁר֩ טִפַּ֨חְתְּ וְרִבִּ֣ית וְגִדַּלְתְּ֮ וְרוֹמַמְתְּ֒, הֵ֣ם בִּידֵיהֶ֗ם, בַּהֲרֹ֨ג אִ֤ישׁ אָחִיו֙ וְאִ֣ישׁ אֶת־רֵעֵ֔הוּ, מִלְא֗וּ אֶת־הֵיכַ֤ל יְ״יָ֙ אֲשֶׁר־בָּ֔ךְ מִטֻּמְאַ֖ת פִּגְרֵ֣י חַלְלֵיהֶ֑ם, עַ֗ד אֲשֶׁ֤ר חָדְלוּ֙ מִלִּקְבֹּ֔ר, כִּי־מָנְע֥וּ הַפָּרִיצִ֖ים לִקְבֹּֽר: וְהָיָ֣ה הָאִ֔ישׁ אֲשֶׁ֣ר יְבַקֵּ֔שׁ לִקְבֹּ֥ר חָלָ֖ל מֵהַ֣חֲלָלִ֑ים, יָבֹ֣א הַפָּרִ֗יץ וְיַכֵּ֙הוּ֙ וִימִיתֵ֔הוּ, וְֽיַפִּילֵ֖הוּ עַל־חֲלַ֥ל רֵעֵֽהוּ: עַ֣ד אֲשֶׁ֧ר יִשָּׁאֲר֛וּ שְׁנֵיהֶ֖ם עַל־פְּנֵ֣י הַשָּׂדֶ֑ה, מְשֻׁלָּכִ֗ים כְּנִבְלוֹת֙ פִּגְרֵ֣י הַבְּהֵמ֔וֹת אֲשֶׁ֣ר יִמָּצְא֔וּן בַּמְּקוֹמ֥וֹת הַחֲרֵבִ֖ים וְהַֽשּׁוֹמְמִֽים: גַּם֩ כִּֽי־יִפְגְּע֨וּ אִ֧ישׁ בְּרֵעֵ֛הוּ מֵ֖ת א֣וֹ חֲלַל־חֶ֑רֶב, יְנַתַּח֙ אֶת־גְּוִיַּ֣ת בְּשָׂר֔וֹ, לְמַ֧עַן יִנָּקֵ֛ם נִקְמַ֥ת שִׂנְאָת֖וֹ בּֽוֹ: וְאָ֥ז יִגְבַּ֛ר רֵ֥יחַ הַמֵּ֖ת עַל־הֶחָ֑י, וְתִֽדְּבַק־בּ֥וֹ מַחֲלָ֖ה לְאֵ֥ין מַרְפֵּֽא:

וְכָל־זֹ֣את הָרָעָה֮ בָּ֣אָה לְבָנַ֒יִךְ֒, עַל־עָזְבָ֞ם אֶת־תּוֹרַ֣ת יְ״יָ֗ וְעַ֨ל הֲפֵרָ֤ם אֶת־בְּרִיתוֹ֙ אֲשֶׁ֥ר כָּרַת֙ עִם־אֲבוֹתָ֔ם, וְעַֽל־הַמַּ֙עַל֙ אֲשֶׁ֣ר מָעֲל֔וּ בַּֽי״יָ֖ אֱלֹהֵ֣י אֲבוֹתָ֑ם; וַיִּשְׁפְּכ֗וּ דַּ֤ם צַדִּיקִים֙ וּנְקִיִּ֔ים בְּהֵיכַ֥ל יְ״יָ֖ אֲשֶׁר־בָּֽךְ: עַ֥ל כָּל־אֵ֖לֶּה רַבָּ֣ה אַנְחָתֵ֑נוּ, וַיִּגְדַּ֣ל׀ עֲוֹ֣ן בִּכְיֵ֗ינוּ לְהָבִ֤יא עָלֵ֙ינוּ֙ אֵ֚ת כָּל־הָרָעָ֣ה הַזֹּ֔את, אֲשֶׁ֥ר אֵין־קֵ֖ץ לָֽהּ: יְ״יָ֖ אֱלֹהֵ֑ינוּ, עֲוֹנֹתֵ֙ינוּ֙ עָבְר֣וּ רֹאשֵׁ֔נוּ וְאֵ֣ין מִסְפָּ֗ר לַמַּעֲשִׂ֨ים הָרָעִ֜ים אֲשֶׁ֥ר עָשִׂ֛ינוּ לְפָנֶ֖יךָ יְ״יָ֥ אֱלֹהֵֽינוּ: צַדִּ֖יק ה֑וּא, וַאֲנַ֙חְנוּ֙ פִּ֣יהוּ מָרִ֔ינוּ וְתוֹרָת֣וֹ חִלַּ֔לְנוּ וּבְרִית֖וֹ הֵפַֽרְנוּ: וְכָל־ע֛וֹד הֶאֱרִ֥יךְ אַפּ֖וֹ בָּ֑נוּ, אֲנַ֣חְנוּ יָסַ֔פְנוּ לִֽמְעָל־מַ֖עַל בּֽוֹ: וְעַל־כֵּ֗ן ל֤וֹ הַצְּדָקָה֙ וְהַמִּשְׁפָּ֔ט, כִּֽי־שָׁפַ֥ךְ עָלֵ֖ינוּ חֲר֣וֹן אַפּ֑וֹ; וְלָכֵ֗ן לָ֛נוּ בֹּ֥שֶׁת הַפָּנִ֖ים כְּהַיּ֥וֹם הַזֶּֽה: וְיָשֹׁ֤ב וִירַחֲמֵ֙נוּ֙ וְיִכְבֹּ֣שׁ עֲוֹנֹתֵ֔ינוּ וְיַשְׁלִ֛יךְ בִּמְצֻל֥וֹת יָ֖ם כֹּ֣ל חַטֹּאתֵ֑ינוּ, אָמֵֽן.

  1. ^ כ ולא ק