חנוך ב/ג
< חנוך ב
פרק ג
א וַיְהִי כְּכַלּוֹתִי לְדַבֵּר אֶל־בָּנָי וַיִּקְרָאוּנִי הָאֲנָשִׁים הָהֵם וַיִּשָּׂאוּנִי עַל־כַּנְפֵיהֶם וַיַּעֲלוּנִי אֶל־הָרָקִיעַ הָרִאשׁוֹן: ב וַיַּעֲמִידוּנִי עַל הָעֲנָנִים וַיֵּלֵכוּ וָאֵרֶא עוֹד לְמַעְלָה אֶת הָרוּחַ וּלְמַעְלָה [מִמֶּנּוּ] רָאִיתִי אֶת־הָאֲוִיר: ג וַיַּעֲמִידוּנִי בָּרָקִיעַ הָרִאשׁוֹן וַיַּרְאוּנִי יָם רַב מְאֹד גָּדוֹל מִיָּם־הָאָרֶץ: ד וַיַּעֲבִירוּ לְפָנַי אֶת־רָאשֵׁי מִשְׁטְרֵי הַכּוֹכָבִים וְשָׂרֵיהֶם וַיַּרְאוּנִי מָאתַיִם מַלְאָךְ הַמֹּשְׁלִים עַל־הַכּוֹכָבִים וּבִנְיַן הַשָּׁמָיִם וְהֵם מְעוֹפְפִים בְּכַנְפֵיהֶם וְהוֹלְכִים מִסָּבִיב לְכָל־הַשָּׁטִים: ה וְשָׁם רָאִיתִי אוֹצְרוֹת הַשֶּׁלֶג וְהַקֶּרַח וְהַמַּלְאָכִים הַמַּחֲזִיקִים אֶת־אוֹצְרוֹתֵיהֶם הַנּוֹרָאִים וְאוֹצְרוֹת הָעֲנָנִים אֲשֶׁר מִשָּׁם יֵצְאוּ וָבָאוּ: ו וַיַּרְאוּנִי אֶת אוֹצְרוֹת הַטַּל כְּשֶׁמֶן זַיִת וּמַרְאֵה צִבְעוֹ כְּכָל־פִּרְחֵי הָאֲדָמָה וְיוֹתֵר מִזֶּה וְאֶת־הַמַּלְאָכִים הַשּׁוֹמְרִים עַל־אוֹצְרוֹתֵיהֶם וּבְסָגְרָם אוֹתָם וּבְפָתְחָם: