בִּזְמִרוֹת נָרִֽיעַ לוֹ. (ש"ץ) כִּי אֵל גָּדוֹל יְיָ, וּמֶֽלֶךְ גָּדוֹל עַל כׇּל אֱלֹהִים.
קדיש יתום.
בימי חמישי:
הַיּוֹם יוֹם חֲמִישִׁי בַּשַּׁבָּת, שֶׁבּוֹ הָיוּ הַלְוִיִּם אוֹמְרִים בְּבֵית הַמִּקְדָּשׁ:
לַמְנַצֵּֽחַ עַל הַגִּתִּית לְאָסָף. הַרְנִֽינוּ לֵאלֹהִים עוּזֵּֽנוּ, הָרִֽיעוּ לֵאלֹהֵי יַעֲקֹב. שְׂאוּ זִמְרָה וּתְנוּ תֹף, כִּנּוֹר נָעִים עִם נָֽבֶל. תִּקְעוּ בַחֹֽדֶשׁ שׁוֹפָר, בַּכֵּֽסֶה לְיוֹם חַגֵּֽנוּ. כִּי חֹק לְיִשְׂרָאֵל הוּא, מִשְׁפָּט לֵאלֹהֵי יַעֲקֹב. עֵדוּת בִּיהוֹסֵף שָׂמוֹ, בְּצֵאתוֹ עַל אֶֽרֶץ מִצְרָֽיִם; שְׂפַת לֹא יָדַֽעְתִּי אֶשְׁמָע. הֲסִירֽוֹתִי מִסֵּֽבֶל שִׁכְמוֹ, כַּפָּיו מִדּוּד תַּעֲבֹֽרְנָה. בַּצָּרָה קָרָֽאתָ וָאֲחַלְּצֶֽךָּ, אֶעֶנְךָ בְּסֵֽתֶר רַֽעַם; אֶבְחׇנְךָ עַל מֵי מְרִיבָה, סֶֽלָה. שְׁמַע עַמִּי, וְאָעִֽידָה בָּךְ, יִשְׂרָאֵל אִם תִּשְׁמַע לִי. לֹא יִהְיֶה בְךָ אֵל זָר, וְלֹא תִשְׁתַּחֲוֶה לְאֵל נֵכָר. אָנֹכִי יְיָ אֱלֹהֶֽיךָ, הַמַּעַלְךָ מֵאֶֽרֶץ מִצְרָֽיִם; הַרְחֶב־פִּֽיךָ וַאֲמַלְאֵֽהוּ. וְלֹא שָׁמַע עַמִּי לְקוֹלִי, וְיִשְׂרָאֵל לֹא אָֽבָה לִי. וָאֲשַׁלְּחֵֽהוּ בִּשְׁרִירוּת לִבָּם, יֵלְכוּ בְּמוֹעֲצוֹתֵיהֶם. לוּ עַמִּי שֹׁמֵֽעַ לִי, יִשְׂרָאֵל בִּדְרָכַי יְהַלֵּֽכוּ. כִּמְעַט אוֹיְבֵיהֶם אַכְנִֽיעַ, וְעַל צָרֵיהֶם אָשִׁיב יָדִי. מְשַׂנְאֵי יְיָ יְכַחֲשׁוּ לוֹ, וִיהִי עִתָּם לְעוֹלָם. (ש"ץ) וַיַּאֲכִילֵֽהוּ מֵחֵֽלֶב חִטָּה, וּמִצּוּר דְּבַשׁ אַשְׂבִּיעֶֽךָ.
קדיש יתום.