תרגום (דוד פרישמן)/כה אמר סרתוסטרא/חלק א

חֵלֵק רִאשׁוֹן

פֵּתַח-דִּבְרֵי סָרַתּוּסְטְרָא

א

וַיְהִי בִהְיוֹת סָרַתּוּסְטְרָא בֶּן־שְׁלֹשִׁים שָׁנָה. וַיַּעֲזֹב אֶת־מוֹלַדְתּוֹ וְאֶת־נַחַל מוֹלַדְתּוֹ וַיֵּלֶךְ אֶל הֶהָרִים. שָׁם חָיָה עַל־רוּחוֹ וְעַל־בְּדִידָתוֹ וְלֹא שָׂבַע אוֹתָן עֶשֶׂר שָׁנִים. וּמִקֵּץ הַיָּמִים הָאֵלֶּה נֶהְפַּךְ עָלָיו לִבּוֹ, – וַיְהִי בֹקֶר־יוֹם וַיַּשְׁכֵּם עִם־הַשַּׁחַר וַיֵּצֵא אֶל־הַשֶּׁמֶש וַיְדַבֵּר אֵלֶיהָ לֵאמֹר:

"אַתָּה הַכֹּכָב הַגָּדוֹל! גַּם אָשְׁרְךָ כְּלֹא־הָיָה, לוּלֵא הָיוּ אֵלֶּה אֲשֶׁר לָהֶם אַתָּה מֵאִיר! הִנֵּה עָלִיתָ עֶשֶׂר שָׁנִים פֹּה עַל פְּנֵי מְעָרָתִי: לוּלֵא אֲנִי וְנִשְׁרִי וְהַנָּחָש אֲשֶׁר עִמִּי, כִּי־עַתָּה קַצְתָּ בְּאֹרְךָ וּבַדֶּרֶךְ הַזֹּאת.

אוּלָם חִכִּינוּ לְךָ יוֹם יוֹם בַּבֹּקֶר וַנִּפְרֹק מֵעָלֶיךָ אֶת־עֲתֶרֶת שִׁפְעָתְךָ וְגַם בֵּרַכְנוּךָ תַּחְתֶּיהָ.

רְאֵה! הִנֵּה שָׂבַעְתִּי אֶת־חָכְמָתִי, כַּדְּבוֹרָה אֲשֶׁר לִקְּטָה הַדְּבָש רַב מֵהָכִיל, וְעַתָּה יָדַיִם אֲבַקֵּשׁ אֲשֶׁר תִּהְיֶינָה שְׁלוּחוֹת.

נָתֹן חָפַצְתִּי וּפַזֵּר, עַד־אִם יָשׁוּבוּ הַחֲכָמִים בֵּין הָאָדָם לִשְׂמוֹחַ עַל־אִוַּלְתָּם וַעֲנִיִּים יָשׁוּבוּ לִשְׂמוֹחַ עַל־עָשְׁרָם.

וְלָכֵן הָבוּ אֵרְדָה לְמַעֲמָקִים: כַּמַּעֲשֶׂה אֲשֶׁר אַתָּה עֹשֶׂה בָּעֶרֶב בְּבֹאֲךָ אֶל־מֵאַחֲרֵי הַיָּם וְאֶת־אוֹרְךָ אַתָּה מֵבִיא גַם לְיוֹשְׁבֵי תַחְתִּית – אַתָּה הַכֹּכָב גְּדָל הָעשֶׁר!

כָּמוֹךָ אֶשְׁקַע גַם אֲנִי – כַּאֲשֶׁר יֹאמְרוּ בְנֵי הָאָדָם בִּשְׂפָתָם, אֲשֶׁר אֲלֵיהֶם אֲנִי יוֹרֵד.

הָבָה אֵפֹא בָרְכֵנִי נָא, כְּלִיל הָעַיִן הַשּׁוֹקֶטֶת, אֲשֶׁר תַּבִּיט אֹשֶׁר גַּם בְּגָדְלוֹ וְקַנֵּא לֹא תְקַנֵּא בוֹ!

בָּרֵךְ אֶת־הַכּוֹס, אֲשֶׁר מְעַט עוֹד וְעָבְרָה שְׂפָתָהּ, אָז יִזְלוּ מֵימֶיהָ כְּעֵין הַזָּהָב וְנָשְׂאוּ אֶל כָּל עֵבֶר אֶת זִיו נְעִימוֹתֶיךָ!

רְאֵה הַכּוֹס הַזֹּאת תָּשׁוּב וְהָיְתָה רֵיקָה וסָרַתּוּסְטְרָא יָשׁוּב וְהָיָה אָדָם".

– כָּכָה הֵחֵל סָרַתּוּסְטְרָא לִשְׁקוֹעַ.

ב

וְסָרַתּוּסְטְרָא יָרַד מִן הֶהָרִים לְבַדּוֹ וְלֹא מָצָא אוֹתוֹ אִישׁ. אָכֵן בְּבֹאוֹ עַד הַיְּעָרוֹת וַיַּרְא פִּתְאֹם וְהִנֵּה אִישׁ זָקֵן עוֹמֵד עָלָיו, אֲשֶׁר עָזַב סֻכָּתוֹ הַקְּדוֹשָׁה לְבַעֲבוּר בַּקֵּש שָׁרָשִׁים בַּיָּעַר. וַיֹּאמֶר הַזָּקֵן אֶל סָרַתּוּסְטְרָא וַיְדַבֵּר לֵאמֹר:

"לֹא זָר לִי הָיִיתָ, הַהֵלֶךְ: כִּי עַל־כֵּן עָבַרְתָּ פֹּה עַל־פָּנַי זֶה שָׁנִים אֲחָדוֹת. אָז הָיָה שִׁמְךָ סָרַתּוּסְטְרָא, וְאוּלָם עַתָּה נֶהְפַּכְתָּ.

בַּיָּמִים הָהֵם נָשָׂאתָ אֶת־אֶפְרְךָ אֶל הֶהָרִים: הֲתֹאמַר לָשֵׂאת עַתָּה אֶת־אֶשְׁךָ אֶל הָעֲמָקִים? אִם לֹא יָרֵאתָ כִּי יְיַסְּרוּךָ כְּמִשְׁפַּט מַבְעִיר אֶת הַבְּעֵרָה?

אָכֵן הִכַּרְתִּי אֶת סָרַתּוּסְטְרָא, הִנֵּה עֵינוֹ טְהוֹרָה וְאֶל־פִּיו לֹא דָבַק סֶחִי. הַאֵין זֶה כִּי הוּא הוֹלֵךְ כַּהוֹלֵךְ בַּמָּחוֹל?

נֶהְפַּךְ סָרַתּוּסְטְרָא, לְיֶלֶד הָיָה סָרַתּוּסְטְרָא, שָׁב וְנֵעוֹר סָרַתּוּסְטְרָא: מַה־לְּךָ אֶל הַיְּשֵׁנִים?

כְּחַי בְּתוֹךְ הַיָּם הָיְיתָ בִּבְדִידָתְךָ, וְהַיָּם נָשָׂא אוֹתְךָ. אוֹי לִי כִּי אָמַרְתָּ לָצֵאת אֶל הַיַּבָּשָׁה! אוֹי לִי כִּי אָמַרְתָּ לָשׁוּב וְלָשֵׂאת בְּשָׂרְךָ בְּעַצְמֶךָ!"

וַיַּעַן סָרַתּוּסְטְרָא וַיֹּאמַר: "אָכֵן אָהַבְתִּי אֶת־בְּנֵי הָאָדָם".

אָז עָנָה הַקָּדוֹשׁ: "לָמָּה בָאתִי אֵפֹא אֶל־הַיַּעַר וְאֶל־הַמִּדְבָּר? הַאִם לֹא מֵאַהֲבָתִי הָרַבָּה אֲשֶׁר אָהַבְתִּי אֶת־הָאָדָם?

עַתָּה הִנֵּה אָהַבְתִּי אֶת־הָאֱלֹהִים: וְאֶת־בְּנֵי הָאָדָם לֹא יָסַפְתִּי לְאַהֲבָה. רָאִיתִי וְהִנֵּה הָאָדָם כְּלִי אֲשֶׁר אֵינֶנּוּ שָׁלֵם. אָכֵן אַהֲבָתִי לָאָדָם רַק הָמִית תָּמִית אוֹתִי".

וְסָרַתּוּסְטְרָא עָנָה: "לָמָּה אָמַרְתִּי כִּי אָהַבְתִּי! רַק שַׁי אֲנִי מֵבִיא לִבְנֵי־הָאָדָם".

וַיַּעַן הַקָּדוֹשׁ וַיֹּאמַר: "אַל תִּתֵּן לָהֵם דָּבָר. טוֹב כִּי תְחַסֵּר מֵהֶם מְעַט וְגַם אֶת הַמְּעַט הַנִּשְׁאָר לָהֶם תִּשָּׂא עִמָּהֶם – כִּי כָכָה תֵיטִיב עִמָּם מְאֹד: וְלוּ רַק יִיטַב גַּם לְךָ!

וְאִם יֶשׁ עִם נַפְשְׁךָ לָתֶת־לָהֶם, אַל תִּתֵּן בִּלְתִּי אִם נְדָבָה, וְגַם בָּזֹאת תְּחַכֶּה עַד יוֹשִׁיטוּ יָד לְבַקְּשָׁהּ!"

וְסָרַתּוּסְטְרָא אָמַר: "אֵינֶנִי נוֹתֵן נְדָבוֹת. אָמְנָם לַדָּבָר הַזֶּה אֵינֶנִּי עָנִי לְמַדָּי".

וַיִּשְׁחַק הַקָּדוֹשׁ עַל סָרַתּוּסְטְרָא וַיֹּאמַר: "כִּי עַתָּה הִשָּׁמֵר פֶּן יְמָאֲנוּ לָקַחַת אֶת אוֹצָרְךָ! אֵין הֵם בּוֹטְחִים בְּמִתְבּוֹדְדִים וְאֵין הֵם מַאֲמִינִים כִּי בָּאנוּ לְבַעֲבוּר תֵּת.

כְּשָׁמְעָם אֶת צְעָדֵינוּ, וְהָיוּ לָהֶם הַקּוֹלוֹת בּוֹדְדִים עַד לִמְאֹד בִּרְחוֹבוֹת. וְהָיָה כְמִשְׁפַּט שָׁכְבָם עַל מִשְׁכָּבָם בַּלֵּילוֹת וּכְשָׁמְעָם קוֹל צַעֲדֵי אִישׁ לִפְנֵי עֲלוֹת הַשַּׁחַר, אָז יִשְׁאֲלוּ אֶת לִבָּם: לְאָן הוֹלֵךְ הַגַּנָּב?

אַל תֵּלֵך אֶל־בְּנֵי הָאָדָם, כִּי אִם שֵׁב תַּחְתֶּיךָ בְּתוֹךְ הַיַּעַר! טוֹב לָלֶכֶת אֶל־הַחַיָּה מִלֶּכֶת אֶל־בְּנֵי הָאָדָם! לָמָּה לֹא חָפַצְתָּ לִהְיוֹת כָּמוֹנִי, – דֹּב בְּקֶרֶב דֻּבִּים, צִפּוֹר בְּקֶרֶב צִפֳּרִים!"

אָז שָׁאַל סָרַתּוּסְטְרָא: "מָה אַתָּה עֹשֶׂה בְתוֹךְ הַיָּעַר?"

וְהַקָּדוֹשׁ עָנָה וְאָמָר: "עוֹשֶׂה אֲנִי זְמִירוֹת וּמְזַמֵּר אוֹתָן, וּבַעֲשׂוֹתִי אֶת־הַזְּמִירוֹת, אָז אֶשְׂחַק וְאֶבְכֶּה וְאֶהֱמֶה: וּבָזּאת אֶעֱבוֹד אֶת־אֱלֹהִים.

בְּזַמְּרִי וּבִבְכוֹתִי וּבְשַׂחֲקִי וּבַהֲמוֹתִי אָנֹכִי עוֹבֵד אֶת־אֱלֹהִים אֲשֶׁר הוּא אֱלֹהָי וְאוּלָם אַתָּה הֲלֹא תַגֵּד אֵי־זֶה שַׁי אַתָּה נוֹתֵן לָנוּ?"

וְכִשְׁמוֹעַ סָרַתּוּסְטְרָא אֶת־הַדְּבָרִים, וַיְמַהֵר וַיְבָרֶך אֶת־הַקָּדוֹשׁ וַיֹּאמַר: "מַה־לִּי כִּי אֶתֶּן־לָכֶם!" – אָז נִפְרְדוּ שְׁנֵיהֶם, הַזָּקֵן וְהָאִישׁ, אִישׁ מֵעַל אָחִיו, וְהֵם מְשַׂחֲקִים כַּאֲשֶׁר יִשְׂחֲקוּ שְׁנֵי נְעָרִים.

אוּלָם בִּהְיוֹת סָרַתּוּסְטְרָא לְבַדּוֹ, אָז יְדַבֵּר אֶל־לִבּוֹ לֵאמֹר: "מִי פִלֵּל לַדָּבָר אֲשֶׁר כָּזֶה! הִנֵּה הַקָּדוֹשׁ הַזֶּה יוֹשֵׁב בְּתוֹךְ יַעֲרוֹ, וְלֹא שָׁמַע עַד הַיּוֹם הַזֶּה דָבָר מִן הַדְּבָרִים כִּי מֵת הָאֱלֹהִים!" –

ג

וּבְבֹא סָרַתּוּסְטְרָא אֶל־הָעִיר הַקְּרוֹבָה הַיּוֹשֶׁבֶת עַל־יַד הַיְּעָרוֹת, וַיַרְא וְהִנֵּה עַם רָב נֶאֱסַף לְתוֹךְ רְחוֹב הָעִיר, כִּי נִשְׁמְעָה הַשְּׁמוּעָה בְּקֶרֶב הָעָם, אֲשֶׁר יָבוֹא אִישׁ מְרַקֵּד עַל־הַחֶבֶל לְהֵרָאוֹת. וַיְדַבֵּר סָרַתּוּסְטְרָה אֶל־הָעָם לֵאמֹר:

"הִנֵּה אָנֹכִי מוֹרֶה אֶתְכֶם אֶת־תּוֹרַת הָאָדָם הָעֶלְיוֹן. הָיָה הָאָדָם דָּבָר, אֲשֶׁר עָלֵינוּ לָעֹז עָלָיו עַד הִכָּחֲדוֹ. מַה עֲשִׂיתֶם לְבַעֲבוּר לָעֹז עָלָיו?

כָּל־יֶש בָּרָא אֶת־אֲשֶׁר יָצָא מִמֶּנוּ וָמָעְלָה: וְאַתֶּם חֲפַצְתֶּם לִהְיוֹת הַמּוֹרָד הָאֶחָד בַּמַּעֲלֶה הַגָּדוֹל הַזֶּה. וְעוֹד לָכֶם מְעַט וְשַׁבְתֶּם וְיָרַדְתֶּם עַד הַחַיָּה מֵאֲשֶׁר תָּעֹזוּ עַל־הָאָדָם!

מַה־הַקֹּף בְּעֵינֵי הָאָדָם? הֲלֹא רַק צְחוֹק אוֹ כְּלִמָּה מַכְאָבֶת. וְכָכָה יִהְיֶה הָאָדָם בְּעֵינֵי הָאָדָם הָעֶלְיוֹן: צְחוֹק אוֹ כְּלִמָּה מַכְאָבֶת.

אֶת־הַדֶּרֶךְ הָעוֹלָה מִן־הַתּוֹלַעַת וְעַד הָאָדָם עֲבַרְתֶּם, וְאוּלָם עוֹד נוֹתָר בָּכֶם רַב מִן־הַתּוֹלָעַת. קֹפִים הֳיִיתֶם לְפָנִים, וְגַם עַתָּה עוֹד קֹף הָאָדָם שִׁבְעָתַיִם מִכָּל־קֹף.

וּמִי אֲשֶׁר יִהְיֶה בָכֶם הֶחָכָם מִכֻּלְכֶם, וְהָיָה גַם הוּא רַק קֶרַע אָדָם וְדֶבֶק־צֶמַח וְרוּחַ יַחְדָּו. וְאוּלָם הֶאָמַרְתִּי לָכֶם כִּי תָקוּמוּ וְתִהְיוּ לְרוּחוֹת אוֹ לְצֶמַח?

רְאוּ הִנֵּה אָנֹכִי מוֹרֶה אֶתְכֶם אֶת־תּוֹרַת הָאָדָם הָעֶלְיוֹן!

אָדָם הָעֶלְיוֹן תַּכְלִית הָאֲדָמָה. וּבְכֵן אֵפוֹא יֹאמַר־נָא חֶפְצְכֶם: יְהִי אָדָם הָעֶלְיוֹן תַּכְלִית הָאֲדָמָה!

הִשְׁבַּעְתִּיכֶם, אַחַי, הֱיוּ נֶאֱמָנִים לָאֲדָמָה וְאַל תַּאֲמִינוּ לָאוֹמְרִים לָכֶם: יֵשׁ תִּקְוָה מִחוּץ לָאֲדָמָה, רַק מַטִּיפֵי רוֹשׁ הֵמָּה בְדַעַת וְאִם לֹא־בְדָעַת.

רַק בּוֹזֵי חַיִּים הֵם וְנוֹטֵי לָמוּת וּשְׁכוּרֵי רוֹשׁ גַם הֵם, אֲשֶׁר נִלְאֲתָה מֵהֶם הָאֲדָמָה: כִּי עַתָּה יַחְלְפוּ נָא כָל־אֵלֶּה וְיִגְוְעוּ וְיִתָּמוּ!

מִן הַפְּשָׁעִים הָיָה לְפָנִים הַגָּדוֹל אֲשֶׁר פָּשַׁע בַּאֱלֹהִים וְאוּלָם הִנֵּה מֵת אֱלֹהִים וְעִמוֹ מֵתוּ גַּם הַפּוֹשְׁעִים. עַתָּה רַק הַפּוֹשֵׁעַ בָּאֲדָמָה וְהָיָה זֶה הַנּוֹרָא מִכָּל־פֶּשַׁע, וְאֲשֶׁר יוֹקִיר אֶת סִתְרֵי אֵין־חֵקֶר מְהוֹקִירוֹ אֶת־תַּכְלִית הָאֲדָמָה!

לְפָנִים הִבִּיטָה הַנְּשָׁמָה בְבוּז אֶל־הַבָּשָׂר: אָז הָיָה הַבּוּז הַזֶּה עֶלְיוֹן מִכֹּל – כִּי חָפְצָה הַנְּשָׁמָה אֲשֶׁר יִהְיֶה הַבָּשָׂר רָזֶה וְדַל וּמְזֵה־רָעָב, וְכָכָה אָמְרָה לְהִשָּׁמֵט מִמֶּנוּ וּמִן הָאֲדָמָה.

אִי לַנְּשָׁמָה אֲשֶׁר הָיְתָה רָזָה וְדַלָּה וּמְזַת־רָעָב גַם הִיא – הָאַכְזְרִיּוּת הָיְתָה הַתְּשׁוּקָה אֲשֶׁר לַנְּשָׁמָה הַלֵּזוּ!

אָכֵן גַּם אַתֶּם אַחַי עֱנוּ־לִי: מַה יְּדַבֵּר בְּשַׂרְכֶם בְּנִשְׁמַתְכֶם? הַאֵין־יֵשׁ נִשְׁמַתְכֶם עֳנִי וּמָאוֹס וְרֹךְ עַד לְחֻמְלָה?

אָמְנָם נַחַל נִמְאָס הָאָדָם. רַק אֲשֶׁר יִהְיֶה יָם וּמָצָא־לוֹ לֶאֱסֹף נַחַל נִמְאָס וְלֹא יִמָּאֵס גַּם הוּא.

רְאוּ הִנֵּה אָנֹכִי מוֹרֶה אֶתְכֶם אֶת־תּוֹרַת הָאָדָם הָעֶלְיוֹן: הֲלֹא זֶה הַיָּם אֲשֶׁר בּוֹ יִשָּׁטֵף בּוּזְכֶם הַגָּדוֹל.

מַה־גָּדוֹל מִגֹּדֶל אֲשֶׁר יָכֹל לִמְצֹא אֶתְכֶם? הֲלֹא הָרֶגַע אֲשֶׁר יֵעוֹר בָּכֶם בּוּזְכֶם הַגָּדוֹל. הָרֶגַע אֲשֶׁר יֵהָפֵך בָּכֶם כָּל־אָשְׁרְכֶם לְבוּז וְכֵן תֵּהָפֶךְ גַּם תְּבוּנַתְכֶם וְגַם צִדְקַתְכֶם. הָרֶגַע אֲשֶׁר תֹּאמְרוּ: "מַה־בֶּצַע בְּאָשְׁרִי! רַק עֳנִי וּמָאוֹס וְרֹךְ עַד לְחֻמְלָה. וְאוּלָם רַק עֶצֶם חַיַּי לְבַדָּם, וְהָיָה לִי זֶה הָאֹשֶׁר!"

הָרֶגַע אֲשֶׁר תֹּאמְרוּ: "מַה־בֶּצַע בִּתְבוּנָתִי! הַעוֹרֶגֶת הִיא לַדַּעַת כְּאַרְיֵה לַטָּרֶף? רַק עֳנִי וּמָאוֹס וְרֹךְ עַד לְחֻמְלָה!"

הָרֶגַע אֲשֶׁר תֹּאמְרוּ: "מַה־בֶּצַע בְּצִדְקָתִי! וְהִיא לֹא אָחֲזָה בִי עַד לְהִתְהוֹלֵל. אָכֵן שָׂבַעְתִּי גַם אֶת־טוֹבָתִי וְגַם אֶת־רָעָתִי! כָּל זֹאת אֵינֶנָה בִּלְתִּי־אִם עֳנִי וּמָאוֹס וְרֹךְ עַד לְחֻמְלָה!"

הָרֶגַע אֲשֶׁר תֹּאמְרוּ: "מַה־בֶּצַע בְּיָשְׁרִי! לֹא מָצָאתִי כִּי־אֶהְיֶה שַׁלְהֶבֶת וְגַחֶלֶת – וְהַיָּשָׁר הֲלֹא זֶה שַׁלְהֶבֶת וְגַחֶלֶת!?

הָרֶגַע אֲשֶׁר תֹּאמְרוּ: "מַה־בֶּצַע בְּחֶמְלָתִי! הַאֵין חֶמְלָה עֵץ אֲשֶׁר יִתָּלֶה עָלָיו הָאוֹהַב אֵת בְּנֵי־הָאָדָם? וְאוּלָם חַי אֲנִי כִּי הַחֶמְלָה אֵינֶנָּה תְלִיָה".

הַדִּבַּרְתֶּם כְּכָל הַדְּבָרִים הָאֵלֶה? הַכְּבָר צְעַקְתֶם כְּכָל הַדְּבָרִים הָאֵלֶּה? אוֹי, לוּ שְׁמַעְתִּיכֶם בְּצַעַקְכֶם כָּכָה!

לֹא חַטַּאתְכֶם – כִּי־אִם הִשְׁתַּפְקוּתְכֶם צוֹעֶקֶת אֶל־הַשָּׁמַיִם אֲשֶׁר צָרָה עֵינְכֶם בְּחַטַּאתְכֶם וְצָעֲקָה הִיא אֶל־הַשָּׁמַיִם!

אַיֶּה אֵיפֹה הַבָּרָק אֲשֶׁר יְלַקֶּקְכֶם בִּלְשׁוֹנוֹ? אַיֶּה הַשִּׁגָּעוֹן אֲשֶׁר חָתֹם יֵחָתֵם בִּבְשַׂרְכֶם?

רְאוּ הִנֵּה אָנֹכִי מוֹרֶה אֶתְכֶם אֶת־תּוֹרַת הָאָדָם הָעֶלְיוֹן: הֲלֹא זֶה הַבָּרָק. הֲלֹא זֶה הַשִּׁגָּעוֹן!" –

וְכִכְלוֹת סָרַתּוּסְטְרָא לְדַבֵּר, וַיְהִי שָׁם אֶחָד מִן־הָעָם אֲשֶׁר צָעַק: "רַב־לָנוּ לִשְׁמוֹעַ את־הַמְּרַקֵּד עַל הַחֶבֶל; עַתָּה הָבוּ נָא וְגַם נַבִּיט אוֹתוֹ!" וַיִּשְׂחַק הָעָם מְאֹד עַל סָרַתּוּסְטְרָא. וְאוּלָם הַמְּרַקֵּד עַל הַחֶבֶל חָשַׁב כִּי בוֹ דִבֵּר הָאִישׁ וַיִּפֶן וַיִּכּוֹן אֶל מַעֲשֵׂהוּ.

ד

וְסָרַתּוּסְטְרָה הִבִּיט אֶל־הָעָם וַיְהִי מִשְׁתָּאֶה מְאֹד. אָז יְדַבֵּר לֵאמֹר:

חֶבֶל הָאָדָם, אֲשֶׁר קָשׁוּר הוּא מִן־הַחַיָּה וְעַד־הָאָדָם הָעֶלְיוֹן – וּמָתוּחַ עַל־פְּנֵי תְהוֹם.

וּבְעָבְרוֹ יָשִׂים נַפְשׁוֹ בְּכַפּוֹ וּבִהְיוֹתוֹ בַדֶּרֶךְ וּבְהַבִּיטוֹ מֵאַחֲרָיו וּבְסַמֵּר בְּשָׂרוֹ וְהוּא עוֹמֵד בַּאֲשֶׁר הוּא.

וּבָזֹאת יִגְדַּל הָאָדָם: אֲשֶׁר עָשׂוּי גֶּשֶׁר וְאֵינֶנוּ עָשׂוּי תַּכְלִית. וּבָזֹאת אָהַבְתִּי אֶת־הָאָדָם: אֲשֶׁר עָשׂוּי מַעֲבָר וְעָשׂוּי לִשְׁקֹעַ.

אָהַבְתִּי אֶת בְּנֵי־הָאָדָם אֲשֶׁר לִחְיוֹת אֵינָם יוֹדְעִים, אִם לֹא בִהְיוֹתָם שׁוֹקְעִים – כִּי אֵלֶּה הֵמָּה הָעוֹבְרִים.

אָהַבְתִּי אֶת־הַבָּזִים הַגְּדוֹלִים, כִּי אֵלֶּה הֵמָּה הַמְּכַבְּדִים הַגְּדוֹלִים, וְחִצִּים הֵם לְכִלְיוֹן־הַנֶּפֶש אֲשֶׁר יְכַל הָאָדָם לַחֹף הַשֵּׁנִי.

אָהַבְתִּי אֶת בְּנֵי־הָאָדָם אֲשֶׁר לֹא מֵאַחֲרֵי כוֹכָבִים יְבַקְּשׁוּ לָהֶם מָקוֹם, לְבַעֲבוּר שָׁקֹעַ וּלְבַעֲבוּר הֱיוֹת קָרְבָּן, כִּי־אִם לָאֲדָמָה מַקְרִיבִים אֶת־נַפְשָׁם לְקָרְבָּן, לְמַעַן תִּהְיֶה הָאֲדָמָה אַחֲרֵי־כֵן לָאָדָם הָעֶלְיוֹן.

אָהַבְתִּי אֶת־הָאִישׁ אֲשֶׁר יִחְיֶה לְמַעַן יֶאֱסֹף דַּעַת וְאֲשֶׁר יֶאֱסֹף דַּעַת לְמַעַן יִחְיֶה אַחֲרֵי־כֵן הָאָדָם הָעֶלְיוֹן. וְכָכָה הוּא שׁוֹקֵד עַל־שְׁקִיעָתוֹ.

אָהַבְתִּי אֶת־הָאִישׁ אֲשֶׁר יַעֲבוֹד וְיִבְרָא חֲדָשׁוֹת, לְמַעַן אֲשֶׁר יִבָּנֶה הַבַּיִת לָאָדָם הָעֶלְיוֹן וּלְמַעַן אֲשֶׁר יוּכַן־לוֹ הָאֲדָמָה וְהַחַיָּה וְהַצֶּמַח: כִּי כָכָה הוּא שׁוֹקֵד עַל־שְׁקִיעָתוֹ.

אָהַבְתִּי אֶת־הָאִישׁ אֲשֶׁר לֹא יוֹתִיר מֵרוּחוֹ אַף נֵטֶף לְנַפְשׁוֹ, כִּי־אִם כֻּלּוֹ יִהְיֶה רוּחַ לְצִדְקָתוֹ: כָּכָה בִהְיוֹתוֹ רוּחַ הוּא עוֹבֵר אֶת־הַגָּשֶׁר.

אָהַבְתִּי אֶת־הָאִישׁ אֲשֶׁר תִּהְיֶה לוֹ צִדְקָתוֹ לְמַשְׂאַת־נַפְשׁוֹ וּלְגוֹרַל חַיָּיו: כָּכָה בִגְלַל צִדְקָתוֹ הוּא חָפֵץ לִחְיוֹת וְלֹא יִחְיֶה עוֹד.

אָהַבְתִּי אֶת־הָאִישׁ אֲשֶׁר לֹא יַחְפֹּץ בְּרֹב צְדָקוֹת. רַבָּה הַצְּדָקָה הָאַחַת מִן הַשְּׁתַּיִם, כִּי רַבּוּ קְשָׁרֶיהָ, לְבַעֲבוּר תָּלֹה בָם אֶת גּוֹרַל־הַחַיִּים.

אָהַבְתִּי אֶת־הָאִישׁ אֲשֶׁר נִשְׁמָתוֹ מְפַזֶּרֶת הוֹן וְאֲשֶׁר תּוֹדָה לֹא יְבַקֵּשׁ וְאֲשֶׁר לֹא יָשִׁיב אַחֲרֵי קַחְתּוֹ: כִּי תָמִיד הוּא נוֹתֵן וּלְנַפְשׁוֹ לֹא יִשָּׁמֶר.

אָהַבְתִּי אֶת־הָאִישׁ אֲשֶׁר יִכָּלֵם בִּנְפוֹל לוֹ חֶבֶל טוֹב בְּמִשְׁחָקוֹ וַאֲשֶׁר אֶת־נַפְשׁוֹ יִשְׁאַל אָז: הֲכִרְמִיָה עָשִׁיתִי בְמִשְׂחָקִי? כִּי חָפֵץ הוּא בְאָבְדוֹ.

אָהַבְתִּי אֶת־הָאִישׁ אֲשֶׁר יַשְׁלִיךְ דִּבְרֵי־זָהָב לִפְנֵי הֵעָשׂוֹת מַעֲשָׂיו וַאֲשֶׁר בְּכָל־אֵלֶּה עוֹד עֹשֶׂה הוּא רַב מֵאֲשֶׁר אָמַר: כִּי חָפֵץ הוּא בְכִלְיוֹנוֹ.

אָהַבְתִּי אֶת־הָאִישׁ אֲשֶׁר יְצַדֵּק אֶת־הַבָּאִים אַחֲרָיו וַאֲשֶׁר יִגְאַל אֶת־הַהוֹלְכִים לְפָנָיו: כִּי בִגְלַל הַהוֹלְכִים עִמּוֹ הוּא חָפֵץ בְּאָבְדוֹ.

אָהַבְתִּי אֶת־הָאִישׁ אֲשֶׁר אֶת־אֱלֹהָיו יְיַסֵּר, יַעַן אֲשֶׁר אֶת־אֱלֹהָיו הוּא אֹהֵב: כִּי בְקֶצֶף אֱלֹהָיו יֹאבַד.

אָהַבְתִּי אֶת־הָאִישׁ אֲשֶׁר עַמֻקָּה נִשְׁמָתוֹ גַם בְּפִצְעָהּ וַאֲשֶׁר יֹאבַד בְּבֹא עָלָיו כָּל מִקְרֶה: כָּכָה בְחֵפֶץ־לֵב הוּא עוֹבֵר אֶת־הַגֶּשֶׁר.

אָהַבְתִּי אֶת־הָאִישׁ אֲשֶׁר מְלֵאָה נִשְׁמָתוֹ מֵהָכִיל, עַד לִשְׁכּוֹחַ אֶת־נַפְשׁוֹ, וַאֲשֶׁר כָּל־הָעִנְיָנִים נְתוּנִים בְּקִרְבּוֹ: כָּכָה יִהְיוּ כָּל־הָעִנְיָנִים לְמִפְגָע לוֹ עַד אָבְדוֹ.

אָהַבְתִּי אֶת־הָאִישׁ אֲשֶׁר רוּחוֹ חָפְשִׁי וַאֲשֶׁר לִבּוֹ חָפְשִׁי: כָּכָה יִהְיֶה רֹאשׁוֹ רַק הַקֶּרֶב לְלִבּוֹ – וְלִבּוֹ נֹגֵשׂ בּוֹ עַד אָבְדוֹ.

אָהַבְתִּי אֶת־בְּנֵי הָאָדָם אֲשֶׁר יִהְיוּ כִנְטָפִים כְּבֵדִים, הַנּוֹפְלִים אֶחָד אֶחָד מִן־הָעָב הֶעָכוֹר הַתָּלוּי עַל בְּנֵי־הָאָדָם: מְבַשְׂרִים הֵם אֶת־בֹּא הַבָּרָק וְכִמְבַשְׂרִים יֹאבֵדוּ.

רְאוּ הִנֵּה הָיִיתִי לִמְבַשֵׂר אֶת־הַבָּרָק וְהָיִיתִי לְנֵטֶף כָּבֵד מִן־הָעָב: וְהַבָּרָק הַזֶּה הֲלֹא הָאָדָם הָעֶלְיוֹן.

ה

וַיְהִי אַחֲרֵי דַבֵּר סָרַתּוּסְטְרָא אֶת־הַדֱּבָרִים הָאֵלֶּה וַיָשָׁב וַיַּבֵּט אֶל־הָעָם שֵׁנִית וַיִּדֹּם. וְאֶל־לִבּוֹ אָמַר: "הִנֵּה הֵם נִצָּבִים עָלַי וְהֵם מְשַׂחֲקִים עָלַי: אָמְנָם לֹא הֵבִינוּ לִדְבָרַי כִּי לֹא אָנֹכִי הַפֶּה לָאָזְנַיִם הָאֵלֶּה.

הַלְהַכּוֹת חֵרֶם אֶת־אָזְנֵיהֶם בָּרִאשׁוֹנָה לְבַעֲבוּר יִלְמְדוּ לִשְׁמוֹעַ בְּעֵינֵיהֶם? אִם הִשְׁתַּקְשֵׁק נִשְׁתַּקְשֵׁק כְּמוֹ תֻפִּים וּכְמַטִּיפֵי מוּסָר בְּרֹאשׁ חוּצוֹת? אוֹ הַאִם רַק לְכִבְדֵי־פֶה יַאֲמִינוּ?

הִנֵּה דָבָר לָהֶם אֲשֶׁר עָלָיו גַּאֲוָתָם. אִם לֹא תֵדְעוּ הַדָּבָר הַזֶּה? הֲלֹא הַשְׂכֵּל – זֶה שֵׁם הַדָּבָר אֲשֶׁר יִפָּלְאוּ בוֹ מֵרוֹעֵי הָעִזִּים.

וְלָכֵן תִּהְיֶה לָהֶם לְזָרָא בְדַבֵּר אֲלֵיהֶם אִישׁ עַל הַבּוּז – כִּי־עַתָּה אֲדַבְּרָה נָא אֶל־גַּאֲוָתָם.

כִּי־עַתָּה אֲדַבְּרָה נָא בְאָזְנֵיהֶם עַל־הַבּוּז הַגָּדוֹל מִכָּל בּוּז –: הֲלֹא זֶה הָאָדָם הָאַחֲרוֹן".

וְכֹה אָמַר סָרַתּוּסְטְרָא אֶל־הָעָם:

הִנֵּה בָא הַיּוֹם אֲשֶׁר שׂוּמָה עַל־הָאָדָם לְהַצִּיב לוֹ מַטָּרָה. הִנֵּה בָא הַיּוֹם אֲשֶׁר שׂוּמָה עַל־הָאָדָם לִזְרוֹעַ אֶת־זֶרַע תִּקְוָתוֹ הַנִּשָּׂאָה.

עוֹד עֲשִׁירָה אַדְמָתוֹ לְמַדָּי. וְאוּלָם הִנֵּה יָמִים בָּאִים אֲשֶׁר תִּהְיֶה הָאֲדָמָה הַזֹּאת עֲנִיָּה וְדַלָּה, אֲשֶׁר לֹא יַעֲלֶה וְלֹא יִצְמַח עוֹד מִמֶּנָה עֵץ נִשָּׂא.

אַלְלַי! הִנֵּה יוֹם בָּא אֲשֶׁר לֹא יַשְׁלִיךְ עוֹד הָאָדָם אֶת־חֵץ תְּשׁוּקָתוֹ מִמַּעַל לָאָדָם וְהָלְאָה וּמֵיתַר קַשְׁתּוֹ יִדַּף וְלֹא יוּנַף עוֹד!

רְאוּ הִנֵּה אָנֹכִי אוֹמֵר לָכֶם: רַק בִּהְיוֹת עוֹד בָּאָדָם תֹּהוּ וָבֹהוּ דַיּוֹ וְהוֹלִיד כֹּכָב אֲשֶׁר יְרַקֵּד. רְאוּ הִנֵּה אָנֹכִי אוֹמֵר לָכֶם: עוֹד יֶשׁ־בָּכֶם תֹּהוּ וָבֹהוּ.

אַלְלַי! הִנֵּה יוֹם בָּא אֲשֶׁר לֹא יוּכַל עוֹד הָאָדָם לְהוֹלִיד כֹּכָב אֲשֶׁר יְרַקֵּד. אַלְלַי! הִנֵּה יוֹם בָּא וְהָאָדָם יִהְיֶה בָּזוּי וְנִבְזֶה עַד־בִּלְתִּי יְכֹלֶת עוֹד לָבוּז לְנַפְשׁוֹ.

רְאוּ הִנֵּה אָנֹכִי מַרְאֶה לָכֶם אֶת־הָאָדָם הָאַחֲרוֹן. "מַה־לִי אַהֲבָה? מַה־לִי בְּרִיאָה? מַה־לִי תְּשׁוּקָה? מַה־לִי כֹּכָב?" – כָּכָה יִשְׁאַל הָאָדָם הָאַחֲרוֹן וּבְעֵינָיו יִקְרוֹץ.

וְהָאֲדָמָה תִּהְיֶה אָז קְטַנָּה וְעָלֶיהָ יְנַתֵּר הָאָדָם הָאַחֲרוֹן, אֲשֶׁר יַקְטִין כָּל־דָּבָר וְכָל־עִנְיָן. וּמִשְׁפַּחַת הָאָדָם הַזֶּה כִּמְעַט אֲשֶׁר לֹא תִּשָּׁמֶד, כַּאֲשֶׁר לֹא יִשָּׁמֶד פַּרְעוֹשׂ־הָאֲדָמָה; כִּי יַאֲרִיךְ הָאָדָם הָאַחֲרוֹן מִכָּל־אֲשֶׁר הָיָה לְפָנָיו.

"הִנֵּה אֲנַחְנוּ בָרָאנוּ אֶת־הָאֹשֶׁר" – כָּכָה יֹאמְרוּ בְנֵי־הָאָדָם הָאַחֲרוֹנִים וּבְעֵינֵיהֶם יִקְרֹצוּ.

וְאֶת־הַמְּחוֹזוֹת אֲשֶׁר שָׁם יִקֶּש עֲלֵיהֶם לִחְיוֹת יַעַזְבוּ, כִּי עַל־כֵּן דָּרוּשׁ לָהֶם חֹם, וְאִישׁ אֶת־שְׁכֵנוֹ יֶאֱהַב עוֹד וְיִתְרַפֵּק עָלָיו וְיִתְגָּרֵד בּוֹ: כִּי עַל־כֵּן דָּרוּשׁ לָהֶם חֹם.

וּבַחֲלוֹת אִישׁ וַאֲשֶׁר לֹא יַאֲמִין אִישׁ בְּאָחִיו וְתֵחָשֵׁב זֹאת לְחַטָּאָה: כָּל־אִישׁ יִזָּהֵר מְאֹד לְנַפְשׁוֹ בְלֶכְתּוֹ. וְרַק אֲשֶׁר יִהְיֶה עוֹד סָכָל וְתִגָּפֶינָה רַגְלָיו בָּאֲבָנִים אוֹ בִבְנֵי־אָדָם!

וּמְעַט רוֹשׁ מֵעֵת לְעֵת, כִּי כָכָה יִנְעֲמוּ הַחֲלוֹמוֹת. וַאֲשֶׁר־יִקַּח בָּאַחֲרוֹנָה רוֹשׁ הַרְבֵּה וְהָיָה הַמָּוֶת נָעִים.

וְעוֹד יַעֲמוֹל הָאָדָם וְעוֹד יַעֲבוֹד כִּי תִּהְיֶה הָעֲבוֹדָה שַׁעֲשֻׁעִים. וְאוּלָם תַּחְבֻּלּוֹת יִקְנוּ אֲשֶׁר־לֹא יְיַגְּעוּ הַשַּׁעֲשֻׁעִים אֶת־הַבָּשָׂר.

וְלֹא יִדַּל הָאָדָם וְלֹא יַעֲשִׁיר הָאָדָם: כִּי גַם שְׁנֵיהֶם יִהְיוּ לְמַשָּׂא. מִי יַחְפֹּץ עוֹד לִמְשֹׁל? וּמִי לִשְׁמוֹעַ? כִּי גַם שְׁנֵיהֶם יִהְיוּ לְמַשָּׂא.

וְרֹעֶה לֹא יִהְיֶה וְרַק עֵדֶר יִהְיֶה אֶחָד! אָז יִדְרוֹשׁ כָּל־אָדָם חֵלֶק כְּחֵלֶק שָׁוֶה, אָז יִהְיֶה מִשְׁפָּט אֶחָד וּמִדָּה אַחַת לַכֹּל: וּמִי אֲשֶׁר יָחוּש אַחֶרֶת וּבָא אִישׁ כָּזֶה לִרְצוֹנוֹ לְבֵית־הַמְּשֻׁגָּעִים.

"לְפָנִים הִשְׁתַּגְעוּ כָל יוֹשְׁבֵי תֵבֵל" – כָּכָה יֹאמְרוּ הַמְפֻנָּקִים וּבְעֵינֵיהֶם יִקְרֹצוּ.

וְהָאָדָם יִהְיֶה חָכָם וְאֶת־הַכֹּל יֵדָע אֲשֶׁר קָרָה וַאֲשֶׁר הָיָה: כָּכָה לֹא יִירָא אַחֲרִית, וְאִישׁ עִם־אָחִיו – פֶּן יֵחָבֵל לַבָּטֶן.

וְתַאֲוָה־מְעַט תִּהְיֶה לָאָדָם לַיּוֹם וְתַאֲוָה־מְעַט תִּהְיֶה לוֹ לַלַּיְלָה: וְאוּלָם כָּל אִישׁ יִשְׁמוֹר אֶת־שְׁלוֹם בְּשָׂרוֹ.

"אָכֵן אֲנַחְנוּ בָרָאנוּ אֶת־הָאֹשֶׁר" – כָּכָה יֹאמְרוּ בְּנֵי הָאָדָם הָאַחֲרוֹנִים וּבְעֵינֵיהֶם יִקְרֹצוּ. –

פֹּה תַמּוּ דִבְרֵי סָרַתּוּסְטְרָא הָאַחֲרוֹנִים אֲשֶׁר יִקָּרֵא לָהֶם גַם "פֵּתַח־דִּבְרֵי סָרַתּוּסְטְרָא": כִּי בְהַגִּיעוֹ עַד הַדְּבָרִים הָאֵלֶּה וְלֹא נָתַן לוֹ הָעָם לְדַבֵּר עוֹד וַיִּזְעַק וַיִּתְהוֹלֵל בְּתַעֲנוּגִים. תֶּן־לָנוּ, סָרַתּוּסְטְרָא, אֶת־הָאָדָם הָאַחֲרוֹן הַזֶּה, – כָּכָה הָיוּ דִּבְרֵי הָעָם הַצֹּעֲקִים – עֲשֵׂה אוֹתָנוּ לִבְנֵי־הָאָדָם אַחֲרוֹנִים כָּאֵלֶּה! כִּי אָז נַנִּיחַ לְךָ אֶת־הָאָדָם הָעֶלְיוֹן!" וְהָעָם מֵרִיעַ תְּרוּעָה גְּדוֹלָה וּמְמוֹלֵל בִּקְצֵה לְשׁוֹנוֹ. אָז יִתְעַצֵּב סָרַתּוּסְטְרָא וְאֶל־לִבּוֹ יֹאמַר:

"רַק אֵין הֵם מְבִינִים לִדְבָרַי: לֹא אָנֹכִי הַפֶּה לָאָזְנַיִּם הָאֵלֶּה.

הִנֵּה הִרְבֵּיתִי לָשֶׁבֶת בֶּהָרִים וּלְהַקְשִׁיב לְשִׂיחַ נְהָרוֹת וְעֵצִים:

הִנֵּה אָנֹכִי דֹבֵר אֲלֵיהֶם עַתָּה כְמִשְׁפַּט רוֹעֵי הָעִזִּים.

שׁוֹקֶטֶת נִשְׁמָתִי בְּקִרְבִּי וּבְהִירָה כֶהָרִים לִפְנֵי עֶת־צָהֳרָים – וְאוּלָם הֵמָּה חוֹשְׁבִים עָלַי אֲשֶׁר קַר אָנֹכִי וְאָנֹכִי לֵץ אֲשֶׁר יָלִיץ נוֹרָאוֹת.

וְהֵם מַבִּיטִים בִּי עַתָּה וּמְשַׂחֲקִים: וְאוּלָם גַּם בְּשַׂחֲקָם עוֹד שׂוֹנְאִים הֵם לִי. כְּקֶרַח יִהְיֶה בְשַׂחֲקָם".

אָז יֵעָשֶׂה דָבָר אֲשֶׁר יִדֹּם כָּל־פֶּה מֵחֲרָדָה וַאֲשֶׁר תָּקוּם כָּל־עָיִן. כִּי הִנֵּה הֵחֵל בֵּן־כֹּה וָכֹה הַמְּרַקֵּד עַל־הַחֶבֶל אֶת־מַעֲשֵׂהוּ: יָצָא הָאִישׁ מִפֶּתַח דֶּלֶת קְטָנָה וַיְהִי מִתְהַלֵּךְ עַל־הַחֶבֶל הַנִּמְתָּח בֵּין שְׁנֵי מִגְדָּלוֹת וְהָיָה כְתוֹלֶה עַל־פְּנֵי רְחוֹב הָעִיר וְעַל פְּנֵי כָל הָעָם מִלְמָעְלָה. אָז נִפְתְּחָה הַדֶּלֶת הַקְּטָנָה שֵׁנִית וְאִיש לָבוּשׁ שְׁלַל צְבָעִים אֲשֶׁר מַרְאֵהוּ כְמַרְאֵה לֵץ יָצָא דָלַג עַל־הַחֶבֶל וַיְמַהֵר וַיֵּחָפֵז אַחֲרֵי הָרִאשׁוֹן. וַיְהִי הוּא קֹרַא בְקוֹל גָּדוֹל נוֹרָא: "מַהֵר וָלֵךְ נְכֵה־רַגְלַיִם, מַהֵר וָלֵךְ עָצֵל, זוֹחֵל, לְבֶן־פָּנִים, לֶךְ מַהֶר פֶּן אָשׁוּף עֲקֵבְךָ בְּבֹהֶן רַגְלִי! מַה־לְּךָ פֹּה בֵּין מִגְדָּלוֹת, וּלְךָ נָאֲוָה לָשֶׁבֶת בַּמִּשְׁמָר בַּמִּגְדָּל, כִּי לַטּוֹב מִמְּךָ אַתָּה חוֹסֵם אֶת־הַדֶּרֶךְ!" וְכַאֲשֶׁר יְדַבֵּר כֵּן יִקְרַב הָלוֹךְ וְקָרַב הָלוֹךְ וְקָרַב אֵלָיו: וַיְהִי כַאֲשֶׁר לֹא־הָיָה עוֹד בִּלְתִּי רַק פֶּשַׂע אֶחָד מֵאַחֲרָיו, אָז נֶעֶשְׂתָה הַפַּלָצוּת אֲשֶׁר יִדּוֹם פִּתְאֹם כָּל־פֶּה מֵחֲרָדָה וְתָקוּם כָּל־עָיִן: – כִּי הִנֵּה נָתַן הַלֵּץ קוֹל־פְּחָדִים פִּתְאֹם כְּשָׂטָן מַשְׁחִית וַיִּתְנַשֵּׂא וַיִּקְפֹּץ קְפִיצָה אַחַת מִמַּעַל לְרֹאשׁ הָאִישׁ אֲשֶׁר חָסַם לוֹ אֶת־הַדֶּרֶךְ וַיִּפְסַח עָלָיו. וְהָאִישׁ בִּרְאוֹתוֹ אֶת־צָרוֹ וְהוּא הַמְּנַצֵּחַ, וַתַּעַזְבֵהוּ בִינָתוֹ וַיַּעֲזוֹב אֶת־הַחֶבֶל; אָז יַשְׁלִיךְ מִלְּפָנָיו אָת־הַמּוֹט אֲשֶׁר בְּיָדוֹ, וּכְמוֹ גִּלְגַּל־יָדַיִם וְרַגְלַיִם הִתְהַפֵּךְ בְּחִפָּזוֹן שִׁבְעָתַיִם מִן הַמּוֹט הַנּוֹפֵל וַיִּצְנַח וַיָּעָף אָרְצָה. וְכָל־הָעָם הָיָה פִתְאֹם כַּיָּּם בְּהָגִיחַ בּוֹ סְעָרָה: כִּי נָסוּ אִישׁ עַל־נַפְשׁוֹ וְאִישׁ עַל־פְּנֵי אָחִיו וְאִישׁ עַל־כָּתֵף רֵעֵהוּ. וּבַאֲשֶׁר חָשְׁבוּ כִי תִפּוֹל גּוּפַת הַנּוֹפֵל שָׁם הִתְמַלְּטוּ שִׁבְעָתַיִם.

וְסָרַתּוּסְטְרָא נִצָּב תַּחְתָּיו וּבַאֲשֶׁר עָמַד שָׁם נָפְלָה גוּפַת הָאִישׁ לְרַגְלָיו וְהִיא פְצוּעָה וּשְׁבוּרָה וְרַק עוֹד בָּהּ רוּחַ חַיִּים. אָז יִפְקַח הָאִישׁ אֶת־עֵינָיו, כִּי שָׁבָה אֵלָיו בִּינָתוֹ רֶגַּע. וַיַּרְא וְהִנֵּה סָרַתּוּסְטְרָא כוֹרֵעַ לְרַגְלָיו. וְהָאִישׁ יְדַבֵּר בָּאַחֲרוֹנָה לֵאמֹר: "מָה אַתָּה עֹשֶׂה בָזֶה? הִנֵּה מֵאָז יָדַעְתִּי כִי הַשָּׂטָן טוֹמֵן פַּח לִי. עַתָּה הִנֵּה הוּא מַחֲזִיק בִּי לְסָחֳבֵנִי סָחֹב וְהַשְׁלֵךְ אֶל־הַשְּׁאוֹל. הֲתֹאמַר לַעֲצַר־לוֹ בַעֲשׂוֹתוֹ?"

וְסָרַתּוּסְטְרָא עָנָה: "הִנֵּה נִשְׁבַּעְתִּי לָךְ, רֵעִי, כִּי מִכָּל־הַדְּבָרִים אֵין דָּבָר אֲשֶׁר אַתָּה אוֹמֵר בָּזֶה: אֵין שָׂטָן וְאֵין שְׁאוֹל. וְגַם נִשְׁמָתְךָ תְּמַהֵר לָמוּת בְּטֶרֶם עוֹד יָמוּת בְּשָׂרְךָ: וְלָכֵן אַל־נָא תִירָא עוֹד דָּבָר!"

וְהָאִישׁ נָשָׂא עֵינָיו וַיַּבֵּט כְּלֹא מַאֲמִין וְאַחֲרֵי־כֵן אָמַר: "אִם אֱמֶת כֹּל־אֲשֶׁר דִּבַּרְתָּ פֹּה כִּי־עַתָּה לֹא יֹאבַד־לִי דָבָר בֶּאֱבָד־לִי חַיָּי. אֵין־לִי אֵפוֹא יִתְרוֹן מִן־הַחַיָּה אֲשֶׁר לִמְּדוּהָ לְרַקֵּד בְּרָב־מַהֲלֻמּוֹת וּבְנִקְיוֹן שִׁנָּיִם".

וְסָרַתּוּסְטְרָא אָמַר: "לָמָּה תְדַבֵּר כַּדְּבָרִים הָאֵלֶּה? אִם הִשְׁלִיךְ־נַפְשְׁךָ מִנֶּגֶד הָיָה לְךָ לְמִשְׁלַח־יָד, לֹא יִמְצָא אִישׁ אָוֶן בָּזֶה. עַתָּה הִנֵּה הָיָה לְךָ מִשְׁלַח־יָדְךָ לִמְחִתָּה כִּי הִשִּׁיא עָלֶיךָ מָוֶת: וְאוּלָם תַּחַת כָּל־זֶה הִנְנִי וְאֶקְבָּרְךָ בְּעֶצֶם יָדִי".

וּכְדַבֵּר סָרַתּוּסְטְרָא אֶת־הַדְּבָרִים הָאֵלֶּה וְלֹא עָנָה עוֹד הָאִישׁ דָּבָר: וְרַק הֵנִיד בְּיָדוֹ וַיְהִי כִמְבַקֵּשׁ אֶת־יַד סָרַתּוּסְטְרָא לְבַעֲבוּר הוֹדוֹת לוֹ אֶת־חַסְדּוֹ.

ז

בֵּין כֹּה וָכֹה וְהָעֶרֶב קָרַב לָבֹא וַיְהִי הַחֹשֶׁךְ עַל־פְּנֵי רְחוֹב הָעִיר: אָז נָפוֹץ הָעָם אִישׁ לְעֶבְרוֹ, כִּי גַם הַחֲרָדָה וְגַם הַתַּאֲוָה לַחֲדָשׁוֹת תִּיעָפְנָה. וְסָרַתּוּסְטְרָא יָשַׁב עַל־יַד הַמֵּת עַל־הָאָרֶץ וַיְהִי עָזוּב לְמַחְשְׁבוֹתָיו וַיִּשְׁכַּח עֵת וָרָגַע. אָז יָרַד הַלַּיְלָה וְרוּחַ קָרָה נָשְׁבָה עַל־פְּנֵי הַבֹּדֵד. וַיָּקָם סָרַתּוּסְטְרָא וַיְדַבֵּר אֶל־לִבּוֹ לֵאמֹר:

אָכֵן הֱטִיבוֹתָ הַיּוֹם לָדוּג אֶת־דִּיגְךָ, סָרַתּוּסְטְרָא! וְלֹא נֶפֶשׁ אָדָם דַּגְתָּ כִּי־אִם נִבְלַת פֶּגֶר מֵת.

נֶאֱלָחִים חַיֵּי הָאָדָם בְּאֵין רַעֲיוֹן וּבְאֵין תַּכְלִית: יֶשׁ־אֲשֶׁר לֵץ מִתְהוֹלֵל יִהְיֶה לָהֶם לְגוֹרָל.

הָבָה וְאוֹר אֶת בְּנֵי־הָאָדָם אֶת רַעֲיוֹן חַיֵּיהֶם: הִנֵּה זֶה הָאָדָם הָעֶלְיוֹן, אֲשֶׁר יֵצֵא כַבָּרָק מִן־הָעָב הֶעָכוֹר הוּא הָאָדָם.

וְאוּלָם עוֹד רָחַקְתִּי מֵהֶם וְחוּשִׁי טֶרֶם יְדַבֵּר אֶל־חוּשֵׁיהֶם הָיִיתִי בְעֵינֵיהֶם לְעוֹמֵד בַּתָּוֶך בֵּין הַפֶּתִי וּבֵין נִבְלַת פֶּגֶר מֵת.

קֹדֵר הַלַּיְלָה וְקֹדְרִים דַּרְכֵי סָרַתּוּסְטְרָא. הָבָה נָא רֵעִי הַקַּר וְהַמֻּקְשֶׁה וְאֶשָׂאֲךָ אֶל־הַמָּקוֹם אֲשֶׁר־שָׁם אֶקְבָּרְךָ בְּעֶצֶם יָדִי".

ח

וּבִכְלוֹת סָרַתּוּסְטְרָא לְדַבֵּר אֶל־לִבּוֹ אֶת־הַדְּבָרִים הָאֵלֶּה וַיִּקַח אֶת־נִבְלַת הַמֵּת וַיָּשֶׂם עַל שִׁכְמוֹ וַיִּפֶן לְדַרְכּוֹ. הוּא לֹא־הִרְחִיק מְאַת צְעָדִים וְאִישׁ נִגַּש אֵלָיו בַּלָאט וַיְדַבֵּר חֶרֶשׁ, וַיַּכִּירֵהוּ סָרַתּוּסְטְרָא וְהִנֵּה הוּא – הַלֵּץ מִן־הַמִּגְדָּל. וְהָאִישׁ דִבֵּר אֵלָיו וַיֹּאמַר: "קוּם וְעָזַבְתָּ מַהֵר אֶת־הָעִיר הַזֹּאת, סָרַתּוּסְטְרָא, כִּי רַבִּים פֹּה שׂוֹנְאֶיךָ. שְׂנֵאוּךָ הַטּוֹבִים וְהַיְּשָׁרִים וְאָמְרוּ־לָךְ: זֶה אוֹיְבֵנוּ וּמְבַזֵּנוּ; וּשְׂנֵאוּךָ הַמַּאֲמִינִים אֶת־הָאֱמוּנָה הַשְּׁלֵמָה וְאָמְרוּ־לָךְ: זֶה הָרָע אֲשֶׁר נֶגֶד הָעָם. רַק בָּזֹאת מְצָאֲךָ טוֹב, כִּי שָׂחֲקוּ עָלֶיךָ: כִּי הִנֵּה דִּבַּרְתָּ כְּמוֹ לֵץ. רַק בָּזֹאת מְצָאֲךָ טוֹב כִּי הִתְחַבַּרְתָּ אֶל־הַכֶּלֶב הַמֵּת; יַעַן־אֲשֶׁר הִשְׁפַּלְתָּ כָּכָה אֶת־נַפְשְׁךָ, אֶת־נַפְשְׁךָ הִצַּלְתָּ הַיּוֹם. וְאוּלָם קוּם לֶךְ־לְךָ מַהֵר מִן־הָעִיר הַזֹּאת, פֶּן אֶקְפֹּץ מָחָר עָלֶיךָ וְאֶפְסַח גַּם עָלֶיךָ – אָנֹכִי הַחַי עַל־הַמֵּת". וּבְדַבֵּר הָאִישׁ אֶת־הַדְּבָרִים וַיֵּעָלֵם פִּתְאֹם. אָז יֵלֵךְ סָרַתּוּסְטְרָא לְדַרְכּוֹ בְּתוֹךְ הָרְחוֹבוֹת הָאֲפֵלוֹת.

וּבְבֹאו עַד לְשַׁעַר־הָעִיר וַיִּמְצְאוּ אוֹתוֹ הַמְּקַבְּרִים; וַיַּבִּיטוּ הָאֲנָשִׁים אֶל־פָּנָיו לְאוֹר הַלַּפִּיד וַיַּכִּירוּ אֶת סָרַתּוּסְטְרָא וַיִּלְעֲגוּ לוֹ מְאֹד. "רְאוּ הִנֵּה נֹשֵׂא סָרַתּוּסְטְרָא עִמּוֹ אֶת־הַכֶּלֶב הַמֵּת; אָכֵן גִּבּוֹר חַיִל סָרַתּוּסְטְרָא, כִּי־הָיָה לְקוֹבֵר מֵתִים! כִּי עַל־כֵּן יָדֵינוּ טְהוֹרוֹת מִדַּי מִהְיוֹתָן נוֹגְעוֹת אֶל־מִנְחַת מַרְחֶשֶׁת אֲשֶׁר כָּזֹאת. הֲיֹאמַר סָרַתּוּסְטְרָא לִגְנוֹב מִפִּי הַשָּׂטָן אֶת־בִּלְעוֹ? צְלַח וּרְכַב, סָרַתּוּסְטְרָא, וּרְאֵה טוֹב בַּאֲרֻחָתְךָ! וְאוּלָם הִשָּׁמֵר־לְךָ פֶּן יִהְיֶה הַשָּׂטָן גַּנַב־מִשְׁנֶה מִסָרַתּוּסְטְרָא – וְגָנַב גַּם אֶת־שְׁנֵיכֶם וְאָכַל אֶת־שְׁנֵיכֶם יַחְדָּו!" וַיִּשְׁחֲקוּ מְאֹד אִישׁ לְאָחִיו וַיַּטּוּ אֶת־רָאשֵׁיהֶם וַיִּתְלֶחָשׁוּ.

וְסָרַתּוּסְטְרָא לֹא עָנָה דָבָר עַל־הַדְּבָרִים וַיִּפֶן לְדַרְכּוֹ וַיֵּלַך. וַיְהִי הוּא הוֹלֵךְ שְׁתַּיִם שָׁעוֹת וְהוּא עוֹבֵר עַל־יְעָרוֹת וְעַל־בִּצֹּאת, אָז יִשְׁמַע עַד בְּלִי דַי אֶת־יִלְלַת הַזְּאֵבִים הָרְעֵבִים, וְהָרָעָב הֵחֵל לְהָצִיק לוֹ גַם הוּא. וַיַּעֲמֹד סָרַתּוּסְטְרָא וַיִּתְיַצֵּב לִפְנֵי בַּיִת בֹּדֵד, כִּי רָאָה בוֹ אוֹר נֵר.

וְסָרַתּוּסְטְרָא אָמַר: "הִנֵּה כַשׁוֹדֵד מִתְנַפֵּל עָלַי הָרָעָב. בִּיעָרוֹת וּבַאֲשֶׁר שָׁם הַבִּצֹּאת מִתְנַפֵּל עָלַי רְעָבִי וּבְעֶצֶם הַלָּיְלָה.

נִפְלָאִים דַרְכֵי רְעָבִי. יֶשׁ־אֲשֶׁר הוּא בָא לִי רַק אַחֲרֵי אֲרֻחָתִי, וְכַיוֹם הַזֶּה לֹא בָא לִי כָּל־הַיּוֹם: אֵי הָיָה כָּל־הַיּוֹם?"

וְסָרַתּוּסְטְרָא הִתְדַּפֵּק עַל שַׁעַר הַבַּיִת, וַיֵּצֵא אִישׁ זָקֵן אֵלָיו וְהוּא נֹשֵׂא אֶת־הַנֵּר בְּיָדוֹ. וַיִּשְׁאַל וַיֹּאמַר: "מִי־זֶה הַבָּא אֵלַי וְאֶל־שְׁנָתִי אֲשֶׁר נָדְדָה מִמֶּנִי?"

וְסָרַתּוּסְטְרָא אָמַר: "אֶחָד חַי וְאֶחָד מֵת. הָבָה תֶּן־לִי לֶאֱכוֹל וְלִשְׁתּוֹת, כִּי שָׁכַחְתִּי הַיּוֹם מֵאֱכוֹל וּמִשְּׁתּוֹת. מִי אֲשֶׁר יִתֵּן לָרָעֵב לֶחֶם, רַק אֶת־נַפְשׁוֹ הוּא מְכַלְכֵּל: כֹּה תֹאמַר הַחָכְמָה".

וְהַזָּקֵן פָּנָה וַיֵּלֵךְ וַיְּשָׁב בְּעוֹד רֶגַע וַיִּתֵּן לְסָרַתּוּסְטְרָא לֶחֶם וְיַיִן וַיֹּאמַר: "אָכֵן מְקוֹם אֵין־בְּרָכָה הַמָּקוֹם הַזֶּה לִרְעֵבִים, כִּי עַל־כֵּן בָּחַרְתִּי לָשֶבֶת פֹּה וְגַם הַחַיָּה וְגַם הָאָדָם הִנֵּה בָּאִים אֵלַי בִּבְדִידָתִי. וְאוּלָם רְאֵה צַו־נָא גַם אֶת־רֵעֲךָ אֲשֶׁר עִמְּךָ וְאָכַל וְשָׁתָה גַם הוּא, כִּי עָיֵף הוּא מִמֶּךָ". וְסָרַתּוּסְטְרָא עָנָה: "הִנֵּה רֵעִי מֵת, וְלָכֵן חָשַׁבְתִּי כִּי יִקְשֶׁה מִמֶּנִּי לְדַבֵּר עַל־לִבּוֹ". וְהַזָּקֵן הִתְעַבָּר וַיֹּאמַר: "מַה־לִּי וְלַאֲשֶׁר תֹּאמַר? מִי־אֲשֶׁר יִתְדַּפֵּק עַל־שַׁעַר בֵּיתִי, וְלָקַח הָאִישׁ הַזֶּה אֶת־כָּל אֲשֶׁר אֶתֶּן לוֹ וִיהִי מָה. אִכְלוּ וְסַעֲדוּ אֶת־לִבְּכֶם!" –

וְסָרַתּוּסְטְרָא עָבַר מִשָּׁם וַיֵּלֵךְ שֵׂנִית שְׁתַּיִם שָׁעוֹת, וְהוּא בוֹטֵחַ בַּכּוֹכָבִים וּבִמְסִלַּת אוֹרָם: כִּי הִסְכִּין סָרַתּוּסְטְרָא מֵעוֹדוֹ לִהְיוֹת נוֹדֵד בַּלַּיְלָה וַיְהִי אֹהֵב לְהַבִּיט כָּל־יָשֵׁן אֶל־פָּנָיו. וְכַאֲשֶׁר הִלְבִּינוּ פְּנֵי הַבֹּקֶר וַיֵּרְא סָרַתּוּסְטְרָא וְהִנֵּה הוּא בְתוֹךְ יַעַר עָבוֹת וְאֵין דָּרֶךְ. אָז הִשְׁכִּיב אֶת־נִבְלַת הַמֵּת בְּתוֹךְ עֵץ נָבוּב לִמְרַאֲשׁוֹתָיו, לְמַעַן הֱיוֹת לוֹ לְסִתְרָה מִן הַזְּאֵבִים, וְהוּא רָבַץ אַרְצָה וַיִּשְׁכַּב עַל־פְּנֵי הַדֶּשֶׁא. וַיִּישַׁן סָרַתּוּסְטְרָא וַיֵרָדֵם מַהֵר, כִּי עָיְפָה עָלָיו גְּוִיָּתוֹ וְאוּלָם נִשְׁמָתוֹ לֹא נָדָה וְלֹא נָעָה.

ט

וְסָרַתּוּסְטְרָא הֶאֱרִיךְ לִישׁוֹן, וַיִּתֵּן אֶת־הַשַּׁחַר לַעֲבוֹר עָלָיו וַיִּתֵּן לַעֲבוֹר עָלָיו גַּם אֶת־כָּל הַמּוֹעֵד אֲשֶׁר עַד הַצָּהֳרַיִם, אַחֲרֵי כֵן פָּקַח סָרַתּוּסְטְרָא אֶת־עֵינָיו וַיִּשְׁתָּאֶה וַיַּבֵּט אֶל־הַיַּעַר וְאֶל־הַדְּמָמָה אֲשֶׁר מִסָּבִיב, וַיִּשְׁתָּאֶה וַיַּבֵּט אֶל־נַפְשׁוֹ פְּנִימָה. אָז יִתְעוֹרֵר פִּתְאֹם, וַיְהִי כְּמוֹ חוֹבֵל בִּרְאוֹתוֹ יַבָּשָׁה פִּתְאֹם וַיִּצְהַל וַיָּרִיעַ: כִּי רָאָה אֱמֶת חֲדָשָׁה. וַיְּדַבֵּר סָרַתּוּסְטְרָא אֶל־לִבּוֹ וַיֹּאמַר:

הִנֵּה אוֹר נָגַהּ לִי: יֵשׁ־לִי חֵפֶץ בְּרֵעִים וַאֲשֶׁר חַיִּים יִהְיוּ, – וְאוּלָם אֵין לִי חֵפֶץ בְּרֵעִים מֵתִים וּבְפִגְרֵי נִבְלוֹת אָדָם אֲשֶׁר אֶשָּׁא אוֹתָם עִמִּי אֶל־כָּל אֲשֶׁר יִהְיֶה רוּחִי.

כִּי־אִם חֵפֶץ לִי בְרֵעִים אֲשֶׁר יֵלְכוּ אַחֲרַי, יַעַן כִּי חֲפֵצִים הֵם לָלֶכֶת אַחֲרֵי נַפְשָׁם הֵמָּה – וְאֶל־הַמָּקוֹם אֲשֶׁר יִהְיֶה רוּחִי.

הִנֵּה אוֹר נָגַהּ לִי: אַל נָא בְאָזְנֵי הָעָם יְדַבֵּר עוֹד סָרַתּוּסְטְרָא כִּי־אִם בְאָזְנֵי רֵעִים! אַל נָא יִהְיֶה סָרַתּוּסְטְרָא רֹעֶה וְכֶלֶב לְעֵדֶר.

לְנַשֵּׁל רַבִּים מֵאַחֲרֵי הָעֵדֶר – הִנֶּה לָזֹאת בָּאתִי. יִתְאַנְּפוּ נָא בִי עַם וָעֵדֶר: יְהִי סָרַתּוּסְטְרָא לְשׁוֹדֵד בְּעֵינֵי הָרֹעִים!

הִנֵּה אָנֹכִי קֹרֵא לָהֶם רֹעִים – וְהֵם קֹרְאִים לְנַפְשָׁם הַטּוֹבִים וְהַיְּשָׁרִים. הִנֵּה אָנֹכִי קֹרֵא לָהֶם רֹעִים – וְהֵם קֹרְאִים לְנַפְשָׁם הַמַּאֲמִינִים אֲשֶׁר לָאֱמוּנָה הַשְּׁלֵמָה.

הוֹי עַל הַטּוֹבִים וְהַיְּשָׁרִים! אֶת־מִי הֵמָּה שֹׁנְאִים מִכָּל־אָדָם? הֲלֹא אֶת־הָאִישׁ אֲשֶׁר יְשַׁבֵּר אֶת לוּחוֹת הָעֲרָכִים אֲשֶׁר לָהֶם, הוּא הַשּׁוֹבֵר, הוּא הָעוֹבֵר: – וְאוּלָם הוּא הֲלֹא בֹרֵא.

הוֹי עַל הַמַּאֲמִינִים אֲשֶׁר לְכָל־אֱמוּנוֹת! אֶת־מִי הֵמָּה שֹׁנְאִים מִכָּל־אָדָם? הֲלֹא אֶת־הָאִישׁ אֲשֶׁר יְשַׁבֵּר אֶת לוּחוֹת הָעֲרָכִים אֲשֶׁר לָהֶם, הוּא הַשּׁוֹבֵר, הוּא הָעוֹבֵר: – וְאוּלָם הוּא הֲלֹא בֹרֵא.

רֵעִים יְבַקֵּש בֹּרֵא וְלֹא פִגְרֵי נִבְלוֹת אָדָם, וְאַף לֹא עֲדָרִים וּמַאֲמִינִים. אֶת הָעוֹזְרִים עִמּוֹ לִבְרֹא, אוֹתָם יְבַקֵּשׁ בֹּרֵא, אֶת־כָּל אֵלֶּה אֲשֶׁר חֹרְתִים עֲרָכִים חֲדָשִׁים עַל לוּחוֹת חֲדָשִׁים.

רֵעִים יְבַקֵּשׁ בֹּרֵא, אֶת־הָעוֹזְרִים עִמּוֹ לִקְצוֹר: כִּי לְפָנָיו הִנֵּה בָּשֵׁל הַקָּצִיר לַכֹּל. וְאוּלָם מְאַת מַגָּלִים יֶחְסַר, וְלָכֵן הוּא עוֹקֵר שִׁבֳּלִים וְחָרָה לוֹ.

רֵעִים יְבַקֵּשׁ בֹּרֵא, אֶת־כָּל אֵלֶּה אֲשֶׁר יוֹדְעִים לִלְטוֹשׁ מַגָּלֵיהֶם. אָכֵן יִקָּרֵא לָהֶם הַמְּכַלִּים וּבוֹזֵי הַטּוֹב וְהָרָע – וְהֵמָּה הֲלֹא הַקּוֹצְרִים וְהַחֹגְגִים.

אֶת־הָעוֹזְרִים עִמּוֹ לִבְרֹא, אוֹתָם מְבַקֵּשׁ סָרַתּוּסְטְרָא, אֶת־הָעוֹזְרִים עִמּוֹ לִקְצֹר וְאֶת־הָעוֹזְרִים עִמּוֹ לָחֹג, אוֹתָם מְבַקֵּשׁ סָרַתּוּסְטְרָא: מַה־לּוֹ וְלָעֲדָרִים וְלָרֹעִים? מַה־לּוֹ וּלְפִגְרֵי נִבְלוֹת אָדָם?

וְאַתָּה, רֵעִי הָרִאשׁוֹן, שָׁלוֹם לְךָ! בְּעֶצֶם יָדִי קִבָּרְתִּיךָ בְּעֵצְךָ הַנָּבוּב וּבְעֶצֶם יָדִי הִסְתַּרְתִּיךָ מִן הַזְאֵבִים.

וְעַתָּה אֶפָּרְדָה נָא מֵעָלֶיךָ, כִּי אֵין לִי מוֹעֵד עוֹד. בֵּין שַׁחַר לְשַׁחַר בָּאָה לִי אֱמֶת חֲדָשָׁה.

וְרֹעֶה לֹא אֶהְיֶה וְקוֹבֵר לֹא אֶהְיֶה עוֹד לַמֵּתִים, וְאַף גַּם בְּאָזְנֵי הָעָם לֹא אָשׁוּב עוֹד לְדַבֵּר; הִנֵּה זֹאת לִי הַפַּעַם הָאַחֲרוֹנָה אֲשֶׁר דִּבַּרְתִּי בְאָזְנֵי מֵת.

אֶל הַבֹּרְאִים וְאֶל הַקּוֹצְרִים וְאֶל הַחוֹגְגִים אֶתְחַבָּר: אֶת הַקֶּשֶׁת אֲשֶׁר בֶּעָנָן אַרְאֶה אוֹתָם וְאֶת־כָּל שְׁלַבֵּי־הַמַּעֲלוֹת אֲשֶׁר לָאָדָם הָעֶלְיוֹן.

אֶל הַבּוֹדְדִים אָשִׁיר שִׁירָתִי וְאֶל אֲשֶׁר שְׁנַיִם שְׁנַיִם, וּמִי אֲשֶׁר לוֹ אָזְנַיִם לִשְׁמוֹעַ אֶת־מָה אֲשֶׁר לֹא יִשָּׁמַע וְהִכְבַּדְתִּי עָלָיו אֶת־אָשְׁרִי.

וְאֶל מַטָּרָתִי אֶשְׁאַף וְעַל־דַּרְכִּי אֵלֵךְ, וְעַל הַמְּפַגְּרִים וְעַל הַמִּתְמַהְמְהִים אֶפְסָח. כָּכָה בְלֶכְתִּי וְאָבְדוּ הֵמָּה!

י

אֶת־הַדְּבָרִים הָאֵלֶּה דִבֶּר סָרַתּוּסְטְרָא אֶל־לִבּוֹ וְהַשֶּׁמֶש עָמְדָה בַּצְּהֳרָיִם: אָז הִבִּיט הַשָּׁמַיְמָה כְשׁוֹאֵל – כִּי שָׁמַע קוֹל עוֹף אַדִּיר בְּעוּפוֹ. וּבְנָשְׂאוֹ אֶת עֵינָיו וַיַּרְא וְהִנֵּה נֶשֶׁר מְעוֹפֵף בַּשָּׁמַים, אֲשֶׁר יַעֲשֶׂה גַלְגָּל גָּדוֹל בְּעוּפוֹ, וְנָחָש תָּלוּי עָלָיו, אֲשֶׁר לֹא יִהְיֶה לוֹ כְשָׁלָל כִּי־אִם כְּרֵעַ: כִּי עַל־כֵּן הִקִּיף אֶת־צַוָּארוֹ סָבִיב.

וְסָרַתּוּסְטְרָא קָרָא: "הַחַיוֹת הָאֵלֶּה חַיּוֹתַי הֵן!" וַיִּשְׂמַח לִקְרָאתָן מְאֹד.

"הִנֵּה הַגֵּאֶה מִכָּל־חַי אֲשֶׁר תַּחַת הַשֶּׁמֶש וְהֶעָרוֹם מִכָּל־חַי אֲשֶׁר תַּחַת הַשֶּׁמֶש חָבְרוּ יַחְדָּו וַיִּפְשְׁטוּ לָתוּר אֶת־הָאָרֶץ.

כִּי חֶפְצוּ לָתוּר אֶת־הָאָרֶץ וְלִרְאוֹת הַעוֹד סָרַתּוּסְטְרָא חַי. וְאִם אָמְנָם חַי אֲנִי עוֹד?

גְדוֹלָה הָרָעָה לִהְיוֹת עִם־אָדָם מִהְיוֹת עִם־חַיּוֹת, וְהַדְּרָכִים אֲשֶׁר בָּהֶן יֵלֵךְ סָרַתּוּסְטְרָא מְלֵאוֹת הָרָעָה הַגְּדוֹלָה. תָּבאנָה נָא חַיּוֹתַי אֵלֶּה וְהִנְהִיגוּ אוֹתִי הֵן!"

וּבְדַבֵּר סָרַתּוּסְטְרָא אֶת־הַדְּבָרִים הָאֵלֶּה וַיִּזְכּוֹר אֶת־דִּבְרִי הַקָּדוֹשׁ אֲשֶׁר בַּיַּעַר וַיֵּאָנַח וַיֹּאמֶר אֶל־לִבּוֹ:

מִי יִתֵּן וְחָכַמְתִּי מֵאֲשֶׁר הִנְנִי! מִי יִתֵּן וְחָכַמְתִּי מֵרֵאשִׁיתִי כַּנָּחָשׁ אֲשֶׁר לִי!

אָכֵן שָׁאַלְתִּי לְנַפְשִׁי אֶת־אֲשֶׁר יִמָּנַע מִן הָאָדָם: כִּי־עַתָּה אֶשְׁאַל נָא אֶת־גַּאֲוָתִי אֲשֶׁר תֵּלֵךְ הִיא עִם־חָכְמָתִי תָמִיד!

וּבְבֹא יוֹם וְחָכְמָתִי תַעַזְבֵנִי: – כִּי הִנֵּה אוֹהֶבֶת חָכְמָתֵנוּ לָעוּף מִמֶּנוּ וָהָלְאָה! – וְעָפָה עוֹד גַּאֲוָתִי עִם־סִכְלוּתִי יַחְדָּו! –

כָּכָה הֵחֵל סָרַתּוּסְטְרָא לִשְׁקוֹעַ.