עָלֶֽיךָ; אִם תִּלָּחֵם בָּהֶם בְּחַֽיִל זֶה, תֵּבוֹשׁ בְּעֵינִי כׇל הַמְּלָכִים. (מו) לָכֵן שְׁלַח סְפָרִים בְּכׇל מְדִינוֹת מַלְכוּתֶֽךָ, וְיָבֹֽאוּ שָׁרֵי הַחֲיָלוֹת, וְלֹא יִשָּׁאֵר מֵהֶם אֶחָד; וְגַם פִּילִים מְלֻבָּשִׁים שִׁרְיוֹנִים יִהְיוּ עִמָּהֶם. (מז) וַיִּיטַב הַדָּבָר בְּעֵינֵי אַנְטְיוֹכוֹס הַמֶּֽלֶךְ, וַיִּשְׁלַח סְפָרִים לְכׇל מְדִינוֹת מַלְכוּתוֹ; וַיָּבֹֽאוּ שָׁרֵי עַם וָעָם, וְעִמָּהֶם פִּילִים מְלֻבָּשִׁים שִׁרְיוֹנִים. (מח) שֵׁנִית קָם בַּגְרִס הָרָשָׁע וַיָּבֹא לִירוּשָׁלָֽיִם; בָּקַע הַחוֹמָה וַיְנַתֵּק הַמָּבוֹא וַיִּפְרֹץ בַּמִּקְדָּשׁ שְׁלֹשׁ עֶשְׂרֵה פְּרָצוֹת, וְגַם מִן הָאֲבָנִים שִׁבֵּר עַד אֲשֶׁר הָיוּ כֶּעָפָר. (מט) וַיַּחֲשֹׁב בְּלִבּוֹ וַיֹּאמַר: הַפַּֽעַם הַזֹּאת לֹא יוּכְלוּ לִי, כִּי רַב חֵילִי וְעַזָּה יָדִי; וֵאלֹהֵי הַשָּׁמַיִם לֹא חָשַׁב כֵּן.
(נ) כִּשְׁמֹֽעַ חֲמֵֽשֶׁת בְּנֵי מַתִּתְיָה, קָֽמוּ וַיָּבֹֽאוּ לְמִצְפֵּה גִּלְעָד, אֲשֶׁר הָיְתָה שָׁם פְּלֵיטָה לְבֵית יִשְׂרָאֵל בִּימֵי שְׁמוּאֵל הַנָּבִיא. (נא) צוֹם גָּזָֽרוּ, וַיֵּשְׁבוּ עַל הָאֵֽפֶר לְבַקֵּשׁ רַחֲמִים מִלִּפְנַי אֱלֹהֵי הַשָּׁמָֽיִם; אָז נָפְלָה בְּלִבָּם עֵצָה טוֹבָה. (נב) וְהָיוּ שְׁמוֹתֵיהֶם: יְהוּדָה הַבְּכוֹר, שִׁמְעוֹן הַשֵּׁנִי, יוֹחָנָן הַשְּׁלִישִׁי, יוֹנָתָן הָרְבִיעִי, אֶלְעָזָר הַחֲמִישִׁי. (נג) וַיבָֽרֶךְ אוֹתָם אֲבִיהֶם קֹֽדֶם שֶׁשְּׁלָחָם לַמִּלְחָמָה, וַיֹּֽאמֶר לָהֶם: יְהוּדָה בְּנִי, אֲדַמֶּה אוֹתְךָ לִיהוּדָה בֶּן יַעֲקֹב אֲשֶׁר הָיָה נִמְשָׁל לְאַרְיֵה. (נד) שִׁמְעוֹן בְּנִי, אֲדַמֶּה אוֹתְךָ לְשִׁמְעוֹן בֶּן יַעֲקֹב אֲשֶׁר הָרַג יוֹשְׁבֵי שְׁכֶם. (נה) יוֹחָנָן בְּנִי, אֲדַמֶּה אוֹתְךָ לְאַבְנֵר בֶּן נֵר, שַׂר צְבָא יִשְׂרָאֵל. (נו) יוֹנָתָן בְּנִי, אֲדַמֶּה אוֹתְךָ לְיוֹנָתָן בֶּן שָׁאוּל אֲשֶׁר הָרַג עַם פְּלִשְׁתִּים. (נז) אֶלְעָזָר בְּנִי, אֲדַמֶּה אוֹתְךָ לְפִינְחָס בֶּן אֶלְעָזָר, אֲשֶׁר קַנָּא לֵאלֹהָיו וְהִצִּיל אֶת בְּנֵי יִשְׂרָאֵל. (נח) אַחַר זֶה קָֽמוּ חֲמֵֽשֶׁת בְּנֵי מַתִּתְיָה וַיִּלָּחֲמוּ בָּעַמִּים הָהֵם, וַיַּהַרְגוּ בָּהֶם הֶֽרֶג רָב; וַיֵּהָרֵג מֵהֶם יְהוּדָה.
