לִפְנֵי רִבּוֹן הָעוֹלָמִים וַיֹּאמַר: אֱלֹהַי וֵאלֹהֵי אֲבוֹתַי, אַבְרָהָם יִצְחָק וְיַעֲקֹב, אַל נָא תִּתְּנֵֽנִי בְּיַד הֶעָרֵל הַזֶּה, כִּי אִם יַהַרְגֵֽנִי יֵלֵךְ וְיִשְׁתַּבַּח בְּבֵית דָּגוֹן אֱלֹהָיו וְיֹאמַר: אֱלֹהַי נְתָנוֹ בְיָדִי. (כג) בְּאוֹתָהּ שָׁעָה פָּסַע עָלָיו שָׁלֹשׁ פְּסִיעוֹת, וַיִּתְקַע הַחֶֽרֶב בְּלִבּוֹ, וַיַּשְׁלֵךְ אוֹתוֹ חָלָל בַּעֲזָרַת הַקֹּֽדֶשׁ. (כד) עָנָה יוֹחָנָן וְאָמַר לִפְנֵי אֱלֹהֵי הַשָּׁמַֽיִם: אֱלֹהַי, אַל תָּֽשֶׂם עָלַי חֵטְא כִּי הָרַֽגְתִּי אֶת הֶעָרֵל הַזֶּה בְּבֵית הַמִּקְדָּשׁ; כֵּן תִּתֵּן עַתָּה אֶת כׇּל הָעַמִּים אֲשֶׁר בָּֽאוּ עִמּוֹ לְהָצֵר לִיהוּדָה וְלִירוּשָׁלָֽיִם. (כה) אָז יָצָא יוֹחָנָן בַּיּוֹם הַהוּא וַיִּלָּחֵם בָּעַמִּים, וְיַהֲרֹג בָּהֶם הֶֽרֶג רָב. (כו) מִסְפַּר הַהֲרוּגִים אֲשֶׁר הָרַג בַּיּוֹם הַהוּא שִׁבְעַת אֲלָפִים, אֲשֶׁר הָיוּ הוֹרְגִים אֵֽלֶּה לָאֵֽלֶּה. (כז) בְּשׁוּבוֹ בָּנָה עַמּוּד עַל שְׁמוֹ, וַיִּקְרָא לוֹ: מַכַּבִּי מֵמִית הַחֲזָקִים.
(כח) וַיְהִי כַּאֲשֶׁר שָׁמַע אַנְטְיוֹכוֹס הַמֶּֽלֶךְ כִּי נֶהֱרַג נִיקָנוֹר מִשְׁנֵֽהוּ, צַר לוֹ מְאֹד; וַיִּשְׁלַח לְהָבִיא בַּגְרִס הָרָשָׁע הַמַּטְעֶה אֶת עַמּוֹ. (כט) וַיַּֽעַן אַנְטְיוֹכוֹס הַמֶּֽלֶךְ וַיֹּֽאמֶר לְבַגְרִס: הַלֹּא יָדַֽעְתָּ אִם לֹא שָׁמַֽעְתָּ אֲשֶׁר עָשׂוּ לִי בְּנֵי יִשְׂרָאֵל; הָרְגוּ חֲיָלַי, וַיָּבֹֽזּוּ מַחֲנוֹתַי וְשָׂרָי. (ל) עַתָּה עַל מָמוֹנְכֶם אַתֶּם בּוֹטְחִים, אוֹ עַל בָּתֵּיכֶם לָכֶם הֵם; בֹּֽאוּ וְנַעֲלֶה עֲלֵיהֶם, וּנְבַטֵּל מֵהֶם הַבְּרִית אֲשֶׁר כָּרַת לָהֶם אֱלֹהֵיהֶם: שַׁבָּת, רֹאשׁ חֹֽדֶשׁ וּמִילָה. (לא) אָז קָם בַּגְרִס הָרָשָׁע וְכׇל מַחֲנוֹתָיו, וַיָּבֹֽאוּ לִירוּשָׁלָֽיִם. (לב) וַיַּהֲרֹג בָּהּ הֶֽרֶג רָב, וַיִּגְזֹר בָּהּ גְּזֵרָה גְּמוּרָה עַל שַׁבָּת, רֹאשׁ חֹֽדֶשׁ וּמִילָה. (לג) בִּהְיוֹת זֶה, כַּאֲשֶׁר הָיָה דְבַר הַמֶּֽלֶךְ נֶחְפָּז, מָצְאוּ אִישׁ אֲשֶׁר מָל בְּנוֹ, וַיָּבִֽיאוּ הָאִישׁ וְאִשְׁתּוֹ, וַיִּתְלוּ אוֹתָם כְּנֶֽגֶד הַיָּֽלֶד. (לד) וְגַם אִשָּׁה אֲשֶׁר יָלְדָה בֵן אַחֲרֵי מוֹת בַּעְלָהּ, וַתָּֽמׇל אוֹתוֹ לִשְׁמֹנָה יָמִים, וַתַּֽעַל עַל חוֹמַת יְרוּשָׁלַֽיִם וּבְנָהּ הַמָּהוּלעמוד:Philip Birnbaum - ha-Siddur ha-Shalem (The Daily Prayer Book,1949).pdf/742
הדף הזה עבר הגהה
717
מגלת החשמונאים
